KARIBE HULANDES - Kuerponan Polisial di Karibe Hulandes den koperashon ku e Kolegio di Hefenan di Kuerpo, ta anunsia lansamentu di un akshon interinsular relashoná ku entrega di arma di kandela ilegal.
E inisiativa konhunto aki ta un kolaborashon di e organisashonan polisial di Karibe Hulandes ku koperashon di Ministerionan Públiko di Kòrsou, Sint Maarten, Aruba i Hulanda Karibense, inkluyendo Boneiru, Saba i Sint Eustatius.
Pa promé bia tur e islanan aki simultaneamente ta traha riba un akshon di entrega di arma di kandela ilegal. E meta prinsipal di e akshon kordiná aki ta, pa brinda tur esnan ku ta den poseshon di un arma di kandela ilegal, e oportunidat pa di un forma boluntario entregá esaki durante di un periodo determiná, sin ku e tin konsekuensia penal pa violashon di e lei di arma di kandela.
Ku e akshon kolektivo aki e islanan ke manda un mensahe fuerte: arma di kandela ilegal i violensia ku arma no ta wòrdu tolerá den nos komunidatnan.
Imágen: © KPCN
E proyekto ta reflehá e responsabilidat kompartí di tur e islanan pa halsa e seguridat públiko. E momento sinkronisá di e akshon ta demostrá e strategia regional di unidat, pa yega na redukshon di e kantidat di armanan di kandela ilegal ku tin den sirkulashon i asina prevení tambe e kantidat di violensianan ku arma di kandela.
A base di resultado di e akshon aki, e kuerponan huntu ku Ministerionan Públiko lo intensivá e esfuersonan. Esaki dor di ehersé kontròlnan i entradanan hudisial ku lo bai tene na tur parti i sitionan riba e islanan, buskando armanan di kandela ilegal.
Kuerponan polisial di tur e islanan ta hasi un yamada na tur siudadano pa asumí nan responsabilidat i kontribuí na sosiedatnan mas seif, dor di hasi bon uso di e oportunidat aki.
Dor di entregá bo arma di kandela ilegal awor, bo ta evitá di keda persiguí penalmente i ademas bo ta salba bida.
Mas detaye tokante temporada, lokalidat i prosedura pa entrega di arma di kandela, lo keda komuniká dor di kada kuerpo individualmente, den e dianan ku ta sigui.