Detenshonnan pa manehá bou di influensia di alkohòl
Den e wikènt ku a pasa, polis a detené sinku(5) shofùr pa manehá bou di influensia di alkohòl.
Djadumingu 1 di mart, alrededor di 11.15 or di anochi, a detené un hòmber di inisial M.M.F.F. di 59 aña di edat riba Kaya Jade. A para e sospechoso pa un kòntròl rutinario riba Kaya Piedra Presioso i a resultá ku e tabata manehá bou di influensia.
Djadumingu 1 di mart, alrededor di 10 or di anochi, a detené un hòmber di inisial B.D.L.S. di 26 aña di edat riba Kaya Nikiboko Nort. E sospechoso a drenta mondi ku su outo. A resultá ku e tabata manehá bou di influensia.
Djadumingu 1 di mart, alrededor di 3.15 or di mardugá, a detené un hòmber di inisial N.B. di 31 aña di edat riba Kaya Korona. A para e sospechoso pa un kòntròl despues ku polis a konstatá ku e tabata manehá ku velosidat haltu. For di un tèst di supla a resultá ku e tabata manehá bou di influensia.
Djasabra 28 di febrüari, alrededor di 3.15 or di mardugá, a detené un hòmber di inisial M.A.R.N. di 76 aña di edat na Hanchi Amboina. Un patruya a para e vehíkulo pa motibu di komportashon sospechoso di manehá. Durante di e kòntròl a hasi un tèst di supla kuné, di kua a resultá ku el a konsumí mas alkohòl ku ta permití na momentu ku bo ta manehá un vehíkulo.
Djabièrnè 27 di febrüari, alrededor di 10.55 or di anochi, a detené un dama di inisial S.F.E. di 41 aña di edat na Kaminda Lagun. E sospechoso a okashoná daño ku su vehíkulo na un kurá di kas riba e kaya menshoná. A resultá ku e tabata manehá bou di influensia.
A konfiská reibeweis di tur shofùr enbolbí i a transportá nan pa warda di polis pa kontinuá ku e trámitenan korespondiente. Aki nan lo haña un prosèsferbal tambe.
A konfiská outo ku plachi di number falsifiká
Djasabra 28 di febrüari, alrededor di 10 or di anochi, un patruya riba Kaya Andres A. Emerenciana a topa ku un outo ku tabata tin plachi di number falsifiká riba dje. For di investigashon a resultá ku e shofùr a haña but anteriormente pa e mesun infrakshon aki, pero e no a duna oido na esaki ni e no a kita e plachinan falsifiká. Na e sitio polis a duna e shofùr oportunidat pa kambia e plachinan falsifiká pa esnan original. Atrobe e shofùr no a kumpli ku esaki i polis a konfiská tantu e vehíkulo i e plachi di number falsifiká.
Kuerpo Polisial ta bolbe rekordá tur doño di vehíkulo ku ta pèrmití pa manehá solamente ku plachi di number original, emití pa OLB. Manehá un outo òf trùk sin plachi di number òf ku solamente un plachi di number, ta un infrakshon i por kondusí na but. E Lei ta konta tambe pa usuarionan di gòlfkar.
Kòntròl planiá di tráfiko
Den oranan di atardi di djasabra 28 di febrüari, a tene un kòntròl planiá di tráfiko na Kaya C.E.B. Hellmund. A para i kontrolá un total di diesun (11) vehíkulo, di kua a duna un (1) but.
-
E but tabata pa manehá sin faha di seguridat bistí.
Den oranan di mainta di djasabra 28 di febrüari tambe a tene un kòntròl planiá di tráfiko. E kòntròl a tuma lugá riba Kaya Internashonal. A para i kontrolá un total di bintikuater (24) vehíkulo, di kua a duna ocho (8) but.
E butnan tabata pa e siguiente violashonnan:
-
4x pa manehá sin seguro bálido;
-
4x pa manehá sin reibeweis bálido.
Durante e kòntròl aki, a konfiská un outo pa motibu ku a gara e shofùr na multiplé okashon ta manehá sin reibeweis. Ademas a bai ku un persona warda di polis pa motibu ku e no por a mustra un dokumentu di identifikashon bálido i pèrmit bálido di estadia. A entregá e persona na Koninklijke Marrechaussee(KMar) pa mas investigashon.
Polis lo sigi tene e kòntròlnan aki regularmente na kua lo aktua ku man duru na momentu ku shofùrnan no tin e dokumentunan na òrdu i tambe si no ta kumpli ku reglanan di tráfiko. Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225
Imágen: © KPCN