Entradanan hudisial ku detenshon
Djamars 3 di mart, alrededor di 12.30 or di mèrdia, polis a tene entrada hudisial na tres diferente adrès relashoná ku un investigashon andando tokante un kaso di tiramentu ku a tuma lugá djabièrnè, 6 di febrüari 2026.
E entradanan hudisial a tuma lugá na Kaya De La Plata, Kaya Trupial i Kaya Amazona. En konekshon ku e kaso aki, a detené dos (2) sospechoso: un hòmber di inisial J.M.F.P. di 24 aña di edat i un mucha hòmber di inisial G.G.G.G.A. di 16 aña di edat.
Durante e entradanan hudisial a konfiská vários artíkulo ku ta relevante pa e investigashon i tambe supstansianan probablemente narkótiko.
Investigashon den e kaso aki ta kontinuá.
Kandela den outo
Djaluna 2 di mart, alrededor di 5.30 or di atardi, ‘meldkamer’ sentral a risibí notifikashon tokante kandela den un vehíkulo riba e lugá di parker di un supermarkado na Kaya Industria. Na e sitio a resultá ku stul di shofùr di un outo stashoná, a pega kandela. Doño di e vehikulo mes a pagá e kandela promé ku e servisionan di emergensia a yega na e sitio. Brantwer a hasi un kòntròl na e sitio pero no a konstatá ningun otro partikularidat. Segun doño di e vehikulo, e kandela a inisiá despues ku el a pone un laiter riba e stul ku probablemente no tabata kompletamente pagá, di kua a pone ku e stul a pega kandela.
Outo ta dal den kashi di koriente
Djaluna 2 di mart, alrededor di 2.35 or di mardugá, ‘meldkamer’ sentral a risibí notifikashon tokante un outo ku a dal den un muraya na Kaya Oktaaf. Na e sitio, polis a topa ku un outo ku a dal den un kashi di koriente. A resultá ku despues di e aksidente, e shofùr a kana bai su kas. Polis a top’é na su kas. E tabatin levemente heridá i personal di ambulans a dun’é tratamentu médiko. A hasi un tèst di supla kuné i no tabatin indikashon tokante uso di alkohòl. E shofùr no por a mustra un reibeweis i a haña but.