Notisia di polis di djárason 4 di mart te ku djabièrnè 6 di mart 2026

Detenshon despues di bringamentu 

Djárason 4 di mart, alrededor di 10 or di anochi, ‘meldkamer’ sentral a risibí notifikashon tokante bringamentu entre algun persona na altura di un establesimentu di hóreka na Kaya Bonaire. Na yegada di polis no a topa ku bringamentu pero e personanan enbolbí ainda tabata presente. Dos di e personanan enbolbí tabatin herida visibel na kara. 

Despues di investigashon mas aleu na e sitio, a detené un hòmber di inisial R.E.N. di 36 aña di edat pa maltrato. Durante ku a listra e sospechoso a top’é ku un kuchú i a konfiská esaki.

Kòntròl di tráfiko dirigí riba plachi di number 

Polis a konstatá últimamente durante patruya i kòntròlnan di tráfiko, ku un kantidat supstansial di outo ta kore rònt ku plachi di number falsifiká òf ku solamente un plachi di number pegá na e vehíkulo. Kuerpo Polisial Hulanda Karibense (KPCN) ta enfatisá ku esaki no ta pèrmití pa lei i mester tin dos plachi di number bálido pegá riba e vehíkulo i bon visibel. P’esei lo vigilá èkstra riba esaki i aktua ku man duru.

P’esei djárason 4 di mart a tene un kòntròl di tráfiko dirigí riba presensia di ámbos plachi di number. E kòntròlnan a tuma luga na entre otro Kaya Nikiboko Nort, Kaya Korona i Kaya Amsterdam. Aki a para diferente vehíkulo i a duna but na shofùrnan ku no ta kumpli ku lei.

E resultado di e kòntròl ta lo siguiente:

• 10x shofùr a haña but pa manehá sin ámbos plachi di number pegá na e vehíkulo òf ku plachi falsifiká.

• 3x shofùr a haña but pa manehá sin reibeweis bálido (òf pa no por mustra esaki); 

• 2x shofùr a haña but pa manehá sin seguro bálido (òf pa no por mustra esaki);

• 1x shofùr a haña but pa manehá sin faha di seguridat bistí.

Durante e kòntròl na Kaya Amsterdam, ku un 'lasergun' a midi velosidat di vários outo ku tabata aserkando. 

Durante e kòntròl di velosidat a kontrolá vários vehíkulo i a duna un (1) but pa surpasá e velosidat máksimo permití. E shofùr aki tabata kore ku un velosidat di 85 km/ora; esaki ta 45 km/ora mas duru ku e velosidat permití di 40 km/ora. Alabes e shofùr aki tabata menor di edat, pues e no tin reibeweis. El a haña but pa surpasá e velosidat máksimo permití, pa manehá sin reibeweis i lo mèldu e kaso na HALT.

Polis lo sigui ku e tipo di kòntròlnan aki i lo vigilá èkstra riba plachinan di number durante tantu kòntròlnan rutinario komo kòntròl planiá. Falsifiká un plachi di number i falsifiká emblema di gobièrnu ta un echo kastigabel i por kondusí na asta konfiskashon. Kontrolá bo vehíkulo promé ku bo sali i sòru ku e ta kumpli ku tur eksigensia legal pa evitá un but of konfiskashon.

Kuater detenshon relashoná ku resistensia i agreshon durante kòntròl 

Den oranan di atardi di djaráson 4 di mart, ‘meldkamer’ sentral a risibí notifikashon tokante un ‘hit & run’ ku a tuma lugá na Kaya J.N.E. Craane i un deskripshon di e persona ku a kore bai. En konekshon ku esaki, polis a tene kòntròl den área di Waf di Piskadó na Playa Pabou, kaminda a topa ku un persona ku tabata kumplí ku e deskripshon duná.

Durante e kòntròl, a bin topa e persona ku supstansia probablemente narkótiko. Na e momentu ei a surgi resistensia i agreshon, tantu verbal komo físiko, kontra e agentenan presente. Aki a realisá tres detenshon. A detené un dama di inisial S.I.W. di 20 aña di edat, un hòmber di inisial J.R.A.B. di 23 aña di edat i e hòmber di inisial E.L.S. di 43 aña di edat. En konekshon ku e investigashon andando, riba djaweps 5 di mart, a detené un di kuater sospechoso, un hòmber di inisial J.E.G.T. di 21 aña di edat, na warda di polis. 

Ta sospechá e personanan aki di un òf mas di e siguiente violashonnan: maltrato di un ámtenar den funshon, violensia públiko, violashon di Lei di Opio, insulto, menasa i pa resistí detenshon. Investigashon den e kaso aki ta kontinuá.