Turista ku a bai snòrkel ta fayesé
Djadumingu 8 di mart, alrededor di 5 or di atardi, ‘meldkamer’ sentral a risibí notifikashon tokante dos persona ku tabata snòrkel i a haña problema den laman na Lac Cai. Koriente fuerte di laman a hala e personanan mas afó i nan no por a regresá kosta riba nan mes forsa. A pidi asistensia di helikòpter di Wardakosta i tambe personal di ambulans pa duna asistensia. Finalmente a logra saka e víktimanan for di laman i mesora a kuminsá reanimá un di nan. Apesar di esfuerso di servisionan di emergensia, esaki no a duna e resultado deseá. E víktima, un hòmber turista di inisial P.J.M. di 66 aña di edat, a fayesé na e sitio. Personal di ambulans a hasi un chekeo médiko ku e otro viktima pero e no tabata mester di tratamentu médiko.
Siklista atraká
Djadumingu 8 di mart a drenta keho tokante un kaso di atrako ku a tuma lugá den oranan di anochi di djasabra 7 mart na Kaya Mendelssohn. Un persona deskonosí ku kapuchon riba kabes a sorprendé un siklista. E persona tabata agresivo i den un forsageo, el a ranka ámbos lus di e baiskel bai kuné. Ta investigando e kaso.
Kiebro den diferente negoshi
Djadumingu 8 di mart a drenta keho di kiebro den un negoshi di buseo na Kaya Industria. Deskonosínan a haña akseso na e edifisio i a bai ku entre otro telefònnan, ‘Ipads’ i sèn kèsh.
Djasabra 7 di mart a drenta keho di kiebro den un negoshi di buseo na Bulevar Gobernador N. Debrot. Deskonosínan a haña akseso na e edifisio pero no ta konosí ainda kiko tur a logra bai kuné.
Djasabra 7 di mart a drenta keho di kiebro den un negoshi na Kaya Amsterdam. Deskonosínan a haña akseso na e edifisio pero un kompania di seguridat a logra frustra e ladronisia. No ta konosí si a logra bai ku algun artíkulo.
Ta investigando e kasonan.
Detenshon pa maltrato
Djasabra 7 di mart, alrededor di 6 or di mainta, a detené un hòmber di inisial H.G.P. di 46 aña di edat na Kaya Emerita pa maltrato. Investigashon den e kaso ta kontinuá.
Detenshon pa manehá bou di influensia di alkohòl
Djabièrnè 6 di mart, alrededor di 9.30 or di anochi, a detené un hòmber di inisial J.E.R.M. di 37 aña di edat na Kaya Sonmontuno. E sospechoso tabata enbolbí den un aksidente entre dos outo. En konekshon ku e aksidente, a hasi un tèst di supla kuné. For di e tèst a resultá ku el a konsumí mas alkohòl ku e límite permití pa lei. E sospechoso a haña un prosèsferbal i un prohibishon di manehá pa 6 ora.
A transportá e sospechoso pa warda di polis pa kontinuá ku e trámitenan korespondiente.
A topa ku siklista ku a dualu den Bolivia
Djabièrnè 6 di mart, alrededor 7 or di anochi, ‘meldkamer’ sentral a risibí notifikashon tokante un siklista ku ta pèrdí den mondi den bisendario di Bolivia. Mesora a dirigí unidatnan polisial ku a kuminsá ku búskeda den e área. Afortunadamente, e siklista tabatin su telefòn kargá huntu kuné, ku e por a keda den kontakto ku sentralistanan pa informá su lokalidat. Debí na skuridat i tabata trata di un área basta grandi i difisil, a pidi yudansa di helikòpter di Wardakosta for di Kòrsou pa yuda ku e búskeda. Mientrastantu polis a kontinuá ku e búskeda i tabata yegando mas serka di e persona. Pa e motibu aki na yegada di helikòpter, mesora a lokalisá e siklista i a transport'é pa aeropuerto. E hòmber a deklará ku durante su paseo riba baiskel el a lora un hanchi robes di kua el a hañ’é na un sitio ku e no por a sali afó.
Polis a buska e siklista na aeropuerto i a transport’é pa warda di polis pa kontinuá ku e trámitenan korespondiente. E no mester a bai hòspital.
Kòntròl di tráfiko
Den oranan di atardi di djabièrnè 6 di mart, aspirantenan di Kuerpo Polisial Hulanda Karibense (KPCN) bou di supervishon di guiadónan di práktika, a tene un kòntròl di tráfiko dirigí riba seguridat den tráfiko. E kòntròl di tráfiko tabata den kuadro di nan periodo di stazje, kaminda ta pone e konosementu ku nan a atkirí den práktika. E kòntròl a tuma lugá riba Kaminda La Union.
Durante di e kòntròl a paga tinu prinsipalmente riba infrakshonnan den tráfiko. A kontrolá 10 vehíkulo i a duna 2 but pa e siguiente infrakshonnan:
1x pa manehá sin seguro bálido;
1x pa manehá sin reibeweis bálido, sin seguro bálido, sin faha di seguridat bistí i sin plachi di number dilanti; A konfiská e vehíkulo i bai warda di polis kuné.
Na e sitio a duna un shofùr atvertensia pa manehá ku dokumentu di seguro ku a vense.
Kuerpo Polisial Hulanda Karibense ta pidi komunidat pa duna e aspirantenan e espasio nesesario pa nan siña nan profeshon den práktika. Lo kontinuá ku e tipo di kòntròlnan aki na diferente sitio i ta atvertí tur outomobilista pa e dokumentunan nesesario, ta na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba nos isla.
Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.
Imágen: © KPCN
