Detenshonnan pa manehá bou di influensia di alkohòl
Den e wikènt ku a pasa, polis a detené kuater(4) shofùr pa manehá bou di influensia di alkohòl.
Djaluna 16 di mart, alrededor di 3.40 or di mardugá, a detené un hòmber di inisial F.G. di 26 aña di edat riba Kaya Korona. Un patruya a para e vehíkulo pa motibu ku e tabatin un lus di patras defekto. A resultá ku e tabata manehá bou di influensia. E sospechoso a haña un prohibishon di manehá pa 1 ora. Ademas el a haña un but pa manehá sin reibeweis bálido.
Djadumingu 15 di mart, alrededor di 3.45 or di atardi, a detené un hòmber di inisial R.A.B. di 62 aña di edat riba Kaya Nikiboko Sùit. E sospechoso tabata enbolbí den un aksidente ku herido entre dos vehíkulo na altura di Kaya Aripuana. A resultá ku e tabata manehá bou di influensia. A konfiská reibeweis di e sospechoso.
Djadumingu 15 di mart, alrededor di 2 or di mardugá, a detené un hòmber di inisial J.K.S. di 31 aña di edat riba Kaya Nikiboko Nort. Un patruya a para e vehíkulo pa motibu di komportashon sospechoso di manehá. For di un tèst di supla a resultá ku e tabata manehá bou di influensia. E sospechoso a haña un prohibishon di manehá pa 2 ora.
Djasabra 14 di mart, alrededor di 1.25 or di mardugá, a detené un hòmber di inisial S.L.K. di 21 aña di edat na Kaya Piedra Presioso. E sospechoso a kore drenta mondi ku su outo. Durante kòntròl a hasi un tèst di supla kuné, di kua a resultá ku el a konsumí mas alkohòl ku ta permití na momentu ku bo ta manehá un vehíkulo. E sospechoso a haña un prohibishon di manehá pa 2 ora. Ademas a resultá ku e sospechoso tabata manehá ku un plachi di number falsu i a konfiská esaki.
A transportá tur sospechoso pa warda di polis pa kontinuá ku e trámitenan korespondiente. Aki nan lo haña un prosèsferbal tambe.
Vehíkulo ta bòltu
Djadumingu 15 di mart, alrededor di 5 or di mardugá, ‘meldkamer’ sentral a risibí notifikashon tokante un vehíkulo ku a bòltu riba Kaya Internashonal. Na yegada di polis a topa ku un minivèn di bòltu i ainda e shofùr tabata den e vehíkulo. A resultá ku e shofùr a pèrdè kòntròl, dal den un palu di lus, despues di kua e vehíkulo a bòltu riba su banda. Konforme e maneho di ‘botsen is blazen’, a hasi un tèst di supla ku e shofùr, i no tabatin indikashon tokante uso di alkohòl. E shofùr a indiká ku e no mester di asistensia médiko.
Violashon di orario di sera
Den oranan di mardugá di djadumingu 15 di mart, alrededor di 3.20 or, polis a konstatá ku tabatin vários persona pegá ku un establesimentu di hóreka den ‘Centrumgebied’. Despues di un investigashon a resultá ku e negoshi tabata sirbi kuminda na kliente. Debí na violashon di e orario di sera, e establesimentu lo haña un prosèsferbal pa violashon di Lei di Bebida i Hóreka BES (de Drank- en Horecawet BES).
Detenshon pa menasa i maltrato
Djadumingu 15 di mart, alrededor di 1.45 or di atardi, a detené un hòmber di inisial A.J.R. di 20 aña di edat na warda di polis pa menasa i maltrato. Investigashon den e kaso ta kontinuá.
A konfiská vários fatbike
Polis resientemente a risibí vários keho tokante molèster dor di prinsipalmente menornan di edat riba baiskel eléktriko (fatbike).
Último tempu e molèster riba baiskel den sentro di siudat i den bario a oumentá. Molèster komo ku nan ta mustra komportashon iresponsabel den tráfiko dor di entre otro kore ku velosidat haltu, okashoná aksidente i kore bai, kore den direkshon prohibí, kore den multitut di hende, kore na grupo grandi mei mei di kaminda, kore sin lus i kore hasi kenshi riba kaminda públiko.
Esaki tabata e kaso atrobe e wikènt ku a pasa den sentro di suidat. Polis a atendé ku vários hóben riba fatbike tokante notifikashon di molèster risibí dor di nan komportashon. Tambe a konfiská kuater(4) fatbike pa mas investigashon.
KPCN kier enfatisá ku lo atendé di manera estrikto ku e komportashon aki i ku si ta nesesario, lo tuma medidanan ku ta kuadra dor di entre otro konfiská e baiskel. Komo ku mayoria biaha ta trata di muchanan menor di edat, KPCN ke hasi un apelashon na mayornan tambe pa papia ku e yu tokante su komportashon i e konsekuensianan ku esaki por trese kuné. Por ehèmpel ku daño na terseronan (material òf persona) ta kastigabel i por tin konsekuensianan finansiero. Pero tambe ku hasiendo esaki ta pone e seguridat di tantu otronan komo di e hóben mes na peliger. Bo ta kousa molèster ku bo baiskel, e ora ei por kita bo baiskel i hib’é warda di polis.
Kòntròl planiá di tráfiko
Den oranan di mainta di djasabra 14 di mart, aspirantenan di polis a tene un kòntròl planiá di tráfiko riba Kaya Amsterdam. A para i kontrolá seis(6) vehíkulo, di kua a duna dos(2) but. Ambos but tabata pa manehá sin seguro bálido (òf pa no por mustra esaki).
Polis lo sigui tene e kòntròlnan aki regularmente, na kua lo aktua ku man duru na momentu ku shofùrnan no tin nan dokumentunan na òrdu òf no kumpli ku reglanan di tráfiko. Si bo no tene bo mes na e reglanan, bo por haña un but.
Detenshon pa maltrato i menasa
Djabièrnè 13 di mart, alrededor di 10.50 or di anochi, a detené un hòmber di inisial L.J.F. di 31 aña di edat na Kaya Embira pa maltrato i menasa. Investigashon den e kaso ta kontinuá.
Bròmer konfiská
Den oranan di anochi di djabièrnè 13 di mart, polis a risibí vários notifikashon tokante molèster di zonido duru di un bròmer den Kaya Grandi i bisendario. Na yegada di polis a topa ku e bròmer den akshon. E shofùr no a para di kua a surgi un persekushon kòrtiku ku a terminá na Kaya Tintorero den Antriol. E shofùr no por a mustra un reibeweis ni seguro bálido. Alabes e no tabatin hèlm bistí. A dun’é but pa e infrakshonnan menshoná i a konfiská e bròmer. A transportá e vehíkulo pa warda di polis.
Kòntròl riba violashon di Lei di Opio
Den oranan di anochi di djabièrnè 13 di mart, polis a tene kòntròl dirigí riba violashon di Lei di Opio na altura di un establesimentu di hóreka situá na Kaya Monseigneur Nieuwindt. Durante patruya, e agentenan a sinti un holó fuerte di supstansia probablemente narkótiko prosedente for di personanan na e sitio. P’esei a opta pa tene un kòntròl dirigi riba e personanan presente na e sitio i listra vehíkulonan. Aki a konfiská un kantidat chikitu di supstansia probablemente narkótiko i un ‘grinder’.
Aksidente entre pikòp i skuter
Djabièrnè 13 di mart, alrededor di 4.30 or di atardi, ‘meldkamer’ sentral a risibí notifikashon tokante un aksidente ku herido na Kaya Nikiboko Sùit. Na yegada di polis a resultá ku ta trata di un aksidente entre un pikòp i un skuter. E skuter ku tabata kore riba ‘fietspad’ a dal den e pikòp na momentu ku esaki a lora pa drenta un sitio di parker. Personal di ambulans a duna shofùr di e skuter tratamentu médiko na e sitio mes i no mester a transport’é pa hòspital. Shofùr di e pikòp a haña but pa manehá sin reibeweis i sin seguro bálido. Shofùr di e skuter a haña but pa manehá sin reibeweis bálido. Konforme e maneho di ‘botsen is blazen’, a hasi tèst di supla ku ámbos shofùr, i no tabatin indikashon tokante uso di alkohòl.