A konfiská skuter despues di persekushon kòrtiku
Djamars 17 di mart, alrededor di 5.40 or di atardi, polis a mira un skuter riba Kaya Nikiboko Sùit. Ora e shofùr a tuma nota di presensia di polis, el a purba na hui. Despues di un persekushon kòrtiku, e shofùr a kai riba Kaya Erebato. E no a resultá heridá. Durante kòntròl a resultá ku e shofùr ta menor di edat i konsekuentemente e no por a mustra un reibeweis bálido. Alabes e no por a mustra dokumentunan di seguro, e tabata kore ku un plachi di number falsifiká i e no a duna oido na òrdu di polis pa para. A duna e shofùr but pa e infrakshonnan akí. A konfiská e skuter i e plachi di number falsifiká.
Aksidente entre dos outo
Djamars 17 di mart, alrededor di 5.15 or di atardi, polis a risibí notifikashon tokante un aksidente entre dos outo riba Kaya Korona. Un di e shofùrnan tabata keha di doló i ambulans a transport’é pa hòspital pa kòntròl médiko. E otro shofùr a haña but pa manehá sin seguro bálido. Konforme e maneho di ‘botsen is blazen’, a hasi un tèst di supla ku ámbos shofùr, i no tabatin indikashon di uso di alkohòl.
Polis ta sigui parti but pa manehá sin plachi di number bálido
Ultimo tempu, polis a tuma nota di un kantidat remarkabel di vehíkulo riba karetera públiko ku no ta kumpli ku e eksigensia legal pa loke ta plachi di number. Ta trata di prinsipalmente outonan ku ta kore rònt ku solamente un plachi di number pegá na e vehíkulo òf ku plachinan di number falsifiká. Kuerpo Polisial Hulanda Karibense (KPCN) ta enfatisá ku esaki no ta permití pa lei i e vehíkulo mester tin dos plachi di number bálido pegá i bon visibel. P’esei lo vigilá èkstra riba esaki i aktua ku man duru durante kòntròlnan di tráfiko i patruyanan rutinario riba presensia di plachinan di number bálido. A para diferente vehíkulo i a duna but na shofùrnan ku no ta kumpli ku lei.
- 180x shofùr a haña but pa manehá sin plachi di number, manehá ku plachinan inbálido/falsifiká òf pa manehá sin un plachi di number dilanti òf patras;
- 33x atvertensia (waarschuwing) pa plachinan ku no tabata bon visibel òf pa otro motibunan ku no ta kumpli ku e eksigensianan legal;
- 24x plachi di number falsifiká konfiská;
- 4x vehíkulo konfiská pa no manehá ku plachi di number original ku ta bálido òf pa otro motibu ku no ta kumpli ku lei.
Segun e Ordenansa di Tráfiko Boneiru 2019 (artíkulo 97, sup 1), tur vehíkulo motorisá, ku eksepshon di skuter, bròmer i motosaikel, mester tin dos plachi di number bálido i bon visibel. Bonaire www.polictiecn.com Unu na e parti dilanti i e otro na e parti patras di e vehíkulo. E eksepshon ta konta tambe pa quad i vehíkulonan ku un plachi di number Z.
Durante e kòntròlnan a konstatá spesífikamente e siguiente infrakshonnan:
- Falta di plachi di number: Vehíkulonan ku tin solamente un plachi di number (prinsipalmente plachi di number dilanti).
- Kore sin plachi di number: Vehíkulonan ku ta partisipá den tráfiko sin niun plachi di number bálido.
- Plachi di number falsifiká: Uso di plachinan trahá òf falsifiká ku no ta emití pa Entidat Públiko Boneiru (OLB).
Polis ta bolbe rekordá tur doño di vehíkulo, ku ta permití pa manehá solamente ku plachi di number original, emití pa OLB. Falsifiká un plachi di number i falsifiká emblema di gobièrnu ta un echo kastigabel i por kondusí na asta konfiskashon. Manehá un outo òf trùk sin plachi di number òf ku solamente un(1) plachi di number, ta un infrakshon i por kondusí na but. E Lei ta konta tambe pa usuarionan di gòlfkar riba karetera públiko.
Ademas, no ta pèrmití pa stroba e visibilidat di e plachi di number, por ehèmpel dor di usa tapa di plèstik ‘plastic cover’ muchu skur òf tras di winshil skur.
Polis lo kontinuá intensivamente ku e kòntròlnan akí den e próksimo dianan.
Detenshon pa destrukshon
Djamars 17 di mart, alrededor di 10 or di mainta, polis a detené un sospechoso menor di edat, un mucha muhé di inisial A.B.R.A. na warda di polis pa destrukshon. Kuerpo Polisial Hulanda Karibense (KPCN) a entregá keho di destrukshon i a agregá su mes komo partido perhudiká den e proseso penal. Investigashon den e kaso ta kaso.
Entrada hudisial ku detenshon
Den oranan di mainta di awe, djamars 17 di mart, reshèrshinan di KPCN a tene entrada hudisial na un kas na Kaya Monseigneur Nieuwindt. E entrada hudisial ta relashoná ku un investigashon di kehonan tokante estafa. Relashoná ku e investigashon andando, a detené dos persona. Ta trata di un hende hòmber di inisial S.J.J.J. di 44 aña di edat i un dama di inisial S.Y.S.D.M.J. di 18 aña di edat. Mas aleu a konfiská artíkulonan relevante pa e investigashon. Investigashon den e kaso ta kontinuá.
Detenshon pa maltrato
Djaluna 16 di mart, alrededor di 9.05 or di anochi, polis a detené un hòmber di inisial A.A.J.M. di 24 aña di edat na un kas den Amboina pa maltrato. E detenshon a tuma lugá despues ku un dama a mèldu na warda di polis i a entregá keho di maltrato. Despues di un búskeda, un ratu despues a topa ku e sospechoso i a detené. A transportá e sospechoso pa warda di polis i a presenté dilanti di un fiskal ouksiliar. Investigashon den e kaso ta kontinuá.
Kòntròl planiá di tráfiko
Den oranan trempan di anochi di djamars 17 di mart, aspirantenan di KPCN huntu ku guiadónan di práktika i otro agentenan a tene un kòntròl di tráfiko riba Kaminda Tras di Bonaire www.polictiecn.com Montaña. Durante e kòntròl aki, a para i kontrolá seis(6) vehíkulo di kua sinku(5) outo i un(1) bròmer.
E butnan ku a duna na Kaminda Tras di Montaña ta pa e siguiente infrakshonnan:
- 2x pa manehá sin plachi di number dilanti;
- 2x pa manehá sin reibeweis bálido;
- 1x pa manehá sin seguro bálido.
Durante e kòntròl aki a duna un (1) but pa surpasá e velosidat máksimo permití. E shofùr aki tabata kore ku velosidat di 90 km/ora; esaki ta 30 km/ora mas duru ku e velosidat permití di 60 km/ora. Alabes e shofùr aki no tabatin reibeweis i no por a mustra dokumentunan di seguro di e vehíkulo. El a haña but pa surpasá e velosidat máksimo permití, pa manehá sin reibeweis i manehá sin dokumentunan di seguro.
Algun ratu despues a tene un kòntròl di tráfiko na Kaya Korona. Aki a kontrolá diesnuebe(19) vehíkulo, di kua diesseis(16) outo, un(1) skuter i dos(2) bròmer.
E butnan ku a duna na Kaya Korona ta pa e siguiente violashonnan:
- 5x pa manehá sin reibeweis bálido;
- 3x pa manehá sin seguro bálido;
- 1x pa manehá ku plachi di number fálsifiká. A konfiská e plachi di number.
Durante e kòntròl aki a konfiská un bròmer di kua e shofùr no por a mustra ningun dokumentu pa manehá riba karetera públiko. Kòntròlnan di tráfiko ta kontinuá!
Outo a bòltu
Djaluna 16 di mart, alrededor di 11.30 or di mainta, ‘meldkamer’ sentral a risibí notifikashon tokante un outo ku a bòltu riba Kaminda Lac. Na yegada di polis a topa ku un outo di bòltu riba su banda. A resultá ku e shofùr a pèrdè kòntròl den un bògt di kua e vehíkulo a bòltu riba su banda. E shofùr mes a logra sali for di e vehíkulo i a indiká ku e no mester di asistensia médiko. Dokumentunan di seguro di e vehíkulo i reibeweis di e shofùr tabata na òrdu. Konforme e maneho di ‘botsen is blazen’, a hasi un tèst di supla ku e shofùr, i no tabatin indikashon di uso di alkohòl.
