Detenshon pa manehá bou di influensia di alkohòl despues di komportashon peligroso den tráfiko
Djabièrnè 20 di mart, alrededor di 1.55 or di mardugá, a detené un hòmber di inisial D.E.L.C. di 46 aña di edat riba Kaya J.N.E. Craane. Detenshon di e sospechoso a tuma lugá despues ku polis a mira un ‘buggy’ ku sinku(5) persona riba Kaya Grandi di kua un di e personanan tabata riba dak di e vehíkulo. Polis a sigui e vehíkulo pero debí na tráfiko no por a yega serka. Na dado momentu polis a tuma nota ku e persona ku tabata riba dak di e ‘buggy’, a kai i resultá riba kaminda. Durante kòntròl a resultá ku shofùr di e ‘buggy’, tabata bou di influensia di alkohòl i a detené. A konfiská su reibeweis.
A transportá e sospechoso pa warda di polis pa kontinuá ku e trámitenan korespondiente. Aki e lo haña un prosèsferbal tambe.
Detenshon pa ladronisia na kunuku
Djaweps 19 di mart, alrededor di 2.10 or di atardi, a detené un hòmber di inisial J.M.F. di 28 aña di edat na warda di polis pa ladronisia. E detenshon ta relashoná ku un investigashon andando tokante un ladronisia ku a tuma lugá 8 di òktober 2025 na un kunuku na Nieuw Amsterdam. Investigashon den e kaso ta kontinuá.
Kòntròl di tráfiko
Den oranan di mainta di djaweps 19 di mart, aspirantenan di KPCN huntu ku guiadónan di práktika i otro agentenan a tene un kòntròl di tráfiko na Kaya Internashonal. Durante e kòntròl aki, a para i kontrolá diesdos(12) vehíkulo i a duna dos(2) but. E butnan tabata pa manehá sin seguro bálido i manehá sin reibeweis.
Algun ratu despues a tene un kòntròl di tráfiko na Kaya Amsterdam. Aki a kontrolá nuebe(9) outo i un(1) skuter. Aki a parti tres(3) but.
E butnan tabata pa e siguiente violashonnan:
-
1x pa manehá sin plachi di number dilanti;
-
1x pa manehá sin faha di seguridat bistí;
-
1x pa manehá ku telefòn den man mientras ta stür;
Tambe a duna dos atvertensia:
-
1x pa manehá sin seguro bálido:
-
1x pa no por mustra reibeweis.
-
Kòntròlnan di tráfiko ta kontinuá!