KRALENDIJK - Kuerpo Polisial Hulanda Karibense (KPCN) i Ministerio Públiko BES ta start ku un akshon temporal pa entregá arma di kandela na Boneiru. Ku e akshon aki, habitantenan ta haña e oportunidat pa deshasí di un arma di kandela sin konsekuensia penal. E akshon ta parti di un aserkamentu konhunto den e parti Karibense di Reino pa redusí poseshon di arma di kandela ilegal i pa oumentá seguridat.
Na unda i ki ora
E akshon pa entregá arma di kandela ta tuma lugá di djaluna 23 di mart te ku djabièrnè 3 di aprel, tur dia di 2 or di atardi pa 8 or di anochi.
E sitio pa entregá arma di kandela ta e anterior kazèrne di VKB situá na Bulevar Gobernador N. Debrot.
Sin identifikashon i sin konsekuensia
E akshon aki tin un mensahe bon kla: bo no mester identifiká bo mes.
-
Bo no mester duna bo nòmber.
-
Bo no mester mustra un prueba di identifikashon
-
No ta registrá bo datonan òf identidat
-
No tin konsekuensia penal.
No ta importá ken bo ta òf kon bo a yega na e arma di kandela. Meta di e akshon aki ta pa kita armanan for di den komunidat na un manera seif.
Entregá di manera seif: asina aki bo tin ku hasié
Pa seguridat di tur hende, ta hopi importante pa bo sigui e instrukshonnan aki:
-
Sòru pa e arma di kandela ta deskargá
-
Si bo tin munishon, ten’é separá for di e arma
-
Hinka e arma di kandela den un tas firme, un saku òf un kaha
-
Sòru pa e arma di kandela no ta visibel pa otronan.
-
Bai stret na e sitio pa entregá arma i evitá di para innesesariamente na otro lugá
-
No saka e arma den públiko
-
Sigui semper instrukshon di e agentenan presente
-
Seguridat ta un responsabilidat komun. Esaki ta e momentu pa tuma un desishon konsiente. Huntu nos ta traha na un Boneiru kaminda no tin espasio pa arma di kandela.
Bo tin duda si ta seif pa bo mes transportá e arma? Tuma kontakto ku polis na 715 8000 i pidi pa bo polis di bario. Den konsulta por traha un sita pa buska e arma serka bo.
KPCN i Ministerio Públiko BES ta hasi un yamada enfátiko na un i tur pa probechá di e areglo aki. Un arma di kandela den kas ta trese riesgo pa bo, bo besindario i pa e isla. Dor di entregá esaki, bo ta kontribuí direktamente na un Boneiru mas seif.
Despues di 3 di aprel e oportunidat pa entregá arma sin konsekuensia ta terminá
KPCN i Ministerio Públiko ta hasi un yamada enfátiko na tur hende pa probechá di e periodo aki pa entregá arma di kandela. E akshon aki ta temporal. Despues di 3 di aprel e areglo ta kaduká, i polis huntu ku Ministerio Públiko lo aktua ku man duru kontra poseshon di arma di kandela ilegal.
Esei ta nifiká ku lo tin kòntròlnan intensivo i akshonnan dirigí.
Esaki ta bo chèns pa entregá bo arma boluntariamente i sin konsekuensia. Si bo laga e oportunidat aki pasa, bo ta kore riesgo ku nos mes lo bin busk’é serka bo – ku tur konsekuensia penal ku e ta trese kuné.
Imágen: © KPCN