Detenshon pa manehá bou di influensia di alkohòl
Djárason 25 di mart, alrededor di 1.15 or di mardugá, a detené un hòmber di inisial E.J.s.J. di 60 aña di edat na Bulevar Gobernador N. Debrot pa manehá bou di influensia di alkohòl. E detenshon a tuma lugá despues ku a konstatá ku e sospechoso tabata mustra komportashon sospechoso di manehá i a dun’é señal pa para. Durante kòntròl a resultá ku e tabata mustra diferente karakterístika di un persona ku ta bou di influensia i a hasi un tèst di supla kuné. Aki a resultá ku e sospechoso a konsumí mas alkohòl ku ta permití pa lei. A detené i a bai warda di polis kuné pa un análisis di rosea. A konsekuensia di e resultado di esaki a konfiská su reibeweis. Ademas e lo haña un prosèsferbal.
Kòntròl planiá di tráfiko
Den oranan lat di anochi di djamars 24 di mart, a tene un kòntròl di tráfiko riba Kaya Libertador Simon Bolivar. Durante e kòntròl aki a para i kontrolá 31 vehíkulo i a duna seis (6) but.
E butnan tabata pa e siguiente violashonnan:
-
5x pa manehá sin seguro bálido;
-
1x pa manehá sin reibeweis bálido.
Banda di esaki a hasi tèst di supla ku shofùr di un vehíkulo pero e no a surpasá e limite di alkohòl permití pa lei.
Den oranan di mainta di e mesun dia tambe a tene kòntròl di tráfiko riba Bulevar Minguel A. Pourier na Rincon. Durante e kòntròl aki, a para i kontrolá 22 vehíkulo i a duna kuater (4) but.
E butnan tabata pa e siguiente violashonnan:
-
3x pa manehá sin seguro bálido;
-
1x pa manehá sin reibeweis bálido.
Kòntròlnan di tráfiko ta kontinuá!
A topa ku piesanan di skuter hòrtá
Djamars 24 di mart, polisia a risibí notifikashon ku a topa ku partinan di un skuter den mondi den besindario di Kaminda Gurubu. Na yegada di polis a konstatá ku e skuter tabata kompletamente desarmá. Tabata falta entre otro e motor i otro piesa. Despues di investigashon mas aleu a resultá ku ta trata di probablemente un skuter ku a hòrtá na aña 2024. A konfiská e piesanan di e skuter pa mas investigashon.
Ladronisia
Djaluna 23 di mart a drenta keho di ladronisia na Playa Pal’i Mangel (Donkey’s Beach) situá na E.E.G. Bulevar. Deskonosínan a bai ku bateria di un ‘fatbike’, miéntras e doño tabata piska. Ta investigando e kaso.