A hòrta vehíkulo durante kiebro
Djaweps 2 di aprel a drenta keho di kiebro i ladronisia na un kompania na Kaya Watt. Deskonosínan a haña akseso na e edifisio i a bai ku entre otro algun telefòn, lèptòp, hèrmènt, un kantidat di sèn kèsh i klùis.
Alabes a bai ku un minivèn (cargovan) koló shinishi di e marka Suzuki, tipo Eeco, ku plachi di number B-18478 for di riba tereno di e kompania.
Polis ta pidi kualke persona ku a mira e vehíkulo ku a hòrta òf sa mas tokante e kiebro akí, pa tuma kontakto mesora via 911 òf via e liña di tep anónimo 9310.
Aksidente
Djárason 1 di aprel, alrededor di 7.30 or di anochi, ‘meldkamer’ sentral a risibí notifikashon tokante un aksidente riba Kaya Nikiboko Sùit, na altura di Kaya Avelino J. (Abechi) Cecilia. Na yegada di polis, a topa ku un hòmber heridá riba kaminda ku a kai for di su skuter. Ademas tabatin dos pikòp na e sitio ku probablemente tabata enbolbí den e aksidente. A hasi un tèst di supla ku tur esnan enbolbí, i a resultá ku no tabatin uso di alkohòl. Ambulans a transportá shofùr di e skuter pa hòspital pa tratamentu médiko. Departamentu di tráfiko di polis ta investigando kousa eksakto di e aksidente.
Ladronisia di plachi di number
Djárason 1 di aprel a drenta keho di ladronisia di un plachi di number, ku tabata pegá dilanti na un pikòp. E vehíkulo tabata stashoná pafó di tereno di un akomodashon turístiko na Bulevar Julio A. Abraham. Deskonosínan a lòs e plachi di number V-6620 i a bai kuné. Ta investigando e kaso.