Vehíkulonan na kandela i lòsmentu di bala
Djaluna 6 di aprel, alrededor di 7.40 or di anochi, ‘meldkamer’ sentral a risibí notifikashon tokante dos vehíkulo na kandela na Kaya Monseigneur Nieuwindt. Brantwer a paga e kandela. Ta investigando si ta trata di un kaso di insendio.
Algun ratu despues, alrededor di 8 or di anochi, a drenta notifikashon tokante un kaso di tiramentu na altura di Bario Mamparia Kutu. Na yegada di polis i reshèrshi a topa ku hùls na e sitio i a konfiská esakinan. No tin detenshon den e kaso aki i e investigashon ta andando. Tampoko no ta konosí si tabatin herido.
Mas aleu, ta investigando si e kasonan aki ta relashoná ku otro.
KPCN ta pidi tur persona ku a mira, tende òf tin informashon tokante e kasonan aki pa tuma kontakto ku polis na 715 8000 òf via e liña di tep anónimo 9310.
Detenshon pa insulto di ámtenar den funshon
Djadumingu 5 di aprel, alrededor di 5.10 or di mardugá, a detené un hòmber di inisial Y.A.C. di 24 aña di edat na Kaya Neerlandia pa insulto di un ámtenar den funshon. A detené e sospechoso despues ku el a kuminsá mete ku un detenshon durante un aksidente i a insultá polis na multiplé okashon. A transport’é pa warda di polis pa kontinuá ku e trámitenan korespondiente.
Detenshonnan pa manehá bou di influensia di alkohòl
Den e wikènt largu en konekshon ku siman santu, polis a detené seis(6) shofùr pa manehá bou di influensia di alkohòl.
Djadumingu 5 di aprel, alrededor di 5 or di mardugá, a detené dos shofùr. Ambos tabata enbolbí den un aksidente riba Kaya Neerlandia. A hasi un tèst di supla i a resultá ku ámbos a konsumí mas alkohòl ku ta permití pa lei. Ta trata di un hòmber di inisial R.S.C. di 31 aña di edat i un hòmber di inisial R.J.M. di 23 aña di edat. E sospechoso di inisial R.J.M. a haña prohibishon pa manehá di 4 ora i a konfiská reibeweis di sospechoso di inisial R.S.C..
Djadumingu 5 di aprel, alrededor di 1.05 or di mardugá, a detené un hòmber di inisial G.A. di 61 aña di edat riba Bulevar Gobernador N. Debrot. Un patruya a mira e sospechoso tabata zeilu ku su vehíkulo riba kaminda i a par’é pa kòntròl. Aki a resultá ku e tabata bou di influensia. A konfiská reibeweis di sospechoso.
Djasabra 4 di aprel, alrededor di 3.25 or di mardugá, a detené un hòmber di inisial M.S. di 45 aña di edat riba Kaya L.D. Gerharts. Un patruya a mira e sospechoso riba un skuter i sin hèlm bistí i a par’é pa kòntròl. Aki a resultá ku e tabata bou di influensia. A konfiská su reibeweis i e sospechoso lo haña but pa manehá sin hèlm bistí.
Djasabra 4 di aprel, alrededor di 1.50 or di mardugá, a detené un hòmber di inisial D.F.d.H. di 20 aña di edat riba Kaya Internashonal. Un patruya a mira un skuter ku dos persona riba dje i e shofùr no tabatin hèlm bistí. Ademas e skuter tabata kore zeilu riba kaminda. Pa e motibunan aki a para e skuter pa kòntròl. A resultá ku e sospechoso tabata manehá bou di influensia. A konfiská su reibeweis.
Djabièrnè 3 di aprel, alrededor di 12.20 or di mardugá, a detené un hòmber di inisial D.M.A.W. di 43 aña di edat na Kaya J.N.E. Craane. E sospechoso tabata enbolbí den un aksidente ku solamente daño material. Konforme e maneho di ‘botsen is blazen’, a hasi un tèst di supla i a resultá ku e sospechoso a konsumí mas alkohòl ku ta permití pa lei. El a haña prohibishon di manehá pa 6 ora.
A transportá tur sospechoso pa warda di polis pa kontinuá ku e trámitenan korespondiente. Aki nan lo haña un prosèsferbal tambe.
Ladronisia for di vehíkulo
Djadumingu 5 di aprel a drenta keho di ladronisia for di un outo ku tabata stashoná riba tereno di un iglesia situá na Kaya Korona. Deskonosínan a habri porta di e outo i a bai ku sèn kèsh for di un tas. Ta investigando e kaso.
Detenshon pa enkubrimentu
Djabièrnè 3 di aprel, alrededor di 9.05 or di anochi, a detené un hòmber di inisial A.J.C. di 42 aña di edat na warda di polis pa enkubrimentu. A detené e sospechoso despues ku el a mèldu komo doño di un skuter prosedente di ladronisia. Doño legítimo di e skuter a rekonosé su skuter na momentu ku el a mira esaki na Kaya Mandolin. A konfiská e skuter pa mas investigashon.
A kima vehíkulo hòrtá
Den oranan di mainta di djabièrnè 3 di aprel, alrededor di 9.40 or, ‘meldkamer’ sentral a risibí notifikashon ku algun siklista a mira un vehíkulo kimá na altura di e kuebanan na Onima. Na yegada di polis a resultá ku ta trata di e minivèn(cargovan) di e marka Suzuki, ku plachi di number B-18478, ku deskonosínan a bai kuné for di riba tereno di un kompania na Kaya Watt. No a topa ku e artíkulonan ku a bai kuné durante kiebro na e kompania. Investigashon den e kaso ta kontinuá.
Ladronisia di ‘fatbike’
Djaweps 2 di aprel a drenta keho di ladronisia di un baiskel eléktriko (fatbike). Deskonosínan a bai ku e baiskel ku tabata stashoná na altura di un establesimentu di horeka na Kaya C.E.B. Hellmund. Ta investigando e kaso.