Polis ta sigui aktua kontra fivermentu òf pustamentu ilegal
Den oranan di atardi di djadumingu 12 di aprel, polis a aktua riba e aktividat di fivermentu òf pustamentu ilegal ku ta tuma lugá durante fin di siman riba Kaminda di Sorobon. Apesar ku ta ampliamente konosí ku riba karetera públiko e tipo di aktividat aki ta ilegal, tòg un públiko grandi ku ta konsistí di tambe menornan di edat te ku beibi resien, ta skohe pa ta presente i partisipá na esaki.
Pa garantisá seguridat di un i tur, polis tabata preventivamente na e sitio. Dor di e akshon aki, a logra evitá ku e aktividat ilegal a kontinuá.
Polis ta enfatisá ku kareda ilegal riba karetera públiko òf fivermentu ta trese rísikonan grandi pa e partisipantenan mes, pa otro usuarionan di kaminda i pa personanan ku ta para wak. Polis ta keda alerta pa e tipo di señalnan aki pa garantisá seguridat riba kaya públiko. Bo a mira un situashon peligroso òf preparashon pa karedanan ilegal? Notifiká esaki mesora na ‘meldkamer’ sentral via 911.
Detenshonnan pa manehá bou di influensia di alkohòl
Den e wikènt ku a pasa, polis a detené dos(2) shofùr pa manehá bou di influensia di alkohòl.
Djadumingu 12 di aprel, alrededor di 1.40 or di atardi, a detené un hòmber di inisial A.N. di 60 aña di edat na Kaya Maria. E sospechoso tabata enbolbí den un aksidente ku solamente daño material. Konforme e maneho di ‘botsen is blazen’, a hasi un tèst di supla i a resultá despues ku e sospechoso a konsumí mas alkohòl ku ta permití pa lei. El a haña prohibishon di manehá pa 5 ora.
A transportá e sospechoso pa warda di polis pa kontinuá ku e trámitenan korespondiente i tambe haña un prosèsferbal.
Djadumingu 12 di aprel, alrededor di 11.15 or di mainta, ‘meldkamer’ sentral a risibí notifikashon tokante un aksidente ku herido na Kaya Para Mira. Na yegada di polis a resultá ku ta trata di un aksidente entre un vèn di karga i un ‘crosser’. Shofùr di e ‘crosser’ a resultá heridá i a transport’é ku ambulans pa tratamentu médiko. Konforme e maneho di 'botsen is blazen', a hasi tèst di supla ku shofùr di e vèn. E tèst di supla a duna indikashon di uso di alkohòl. For di un análisis di rosea na warda di polis a resultá ku e sospechoso a konsumí alkohòl, pero no a surpasá e límite pèrmití pa lei. A lag’é den libertat.
Kòntròl planiá di tráfiko
Den oranan di mardugá di djadumingu 12 di aprel, a tene un kòntròl di tráfiko riba e Kaminda ku ta kondusí pa Rincon i Playa. E kòntròl tabata dirigí riba seguridat den tráfiko i prinsipalmente tin un reibeweis i seguro bálido. Ademas preventivamente a stashoná vehíkulonan polisial na puntonan stratégiko i patruyá riba e kaminda menshoná pa hasi shofùrnan konsiente di nan velosidat i komportashon den tráfiko despues di un evenemento ku a tuma lugá na Rincon.
A kontrolá (13) diestres vehíkulo i tur dokumentu tabata na òrdu. No tabatin ningun partikularidat. Kòntròlnan di tráfiko ta kontinuá!
Akshon di listramentu preventivo
Den kuadro di un òrdu emití pa Fiskal mayó di Ministerio Públiko pa listramentu preventivo basá riba e Lei di Arma di Kandela BES, Kuerpo Polisial Hulanda Karibense(KPCN) a tene kòntròl den e periodo di 8 di aprel te ku 11 di aprel 2026. Durante e akshon aki, a kontrolá tantu persona komo vehíkulo. A bishitá vários sitio i establesimentu di hóreka. E akshon tabata na entre otro Tera Kòrá, Nikiboko, Playa, Antriol, Nort’i Saliña i Rincon.
Durante di e akshon a konfiská i òf laga destruí supstansianan probablemente narkótiko. Tambe a duna atvertensia na algun shofùr ku tabatin artíkulo den nan vehíkulo ku por usa komo arma.
Listramentu preventivo
Fiskal mayó ta outorisá kuerpo polisial pa listramentu preventivo. Esaki ta nifiká ku por listra tur hende den sierto áreanan di riesgo di seguridat designá sin ku ta nesesario ku tin sospecho òf indikashon pa hasi esei.
Polis ta konta ku bo(so) koperashon. Esun ku nenga di koperá ku listramentu preventivo ta kore riesgo di detenshon.
Bringamentu ku herido i dos detenshon
Djasabra 11 di aprel, alrededor di 1.15 or di mardugá, un patruya a tuma nota di un bringamentu na altura di un establesimentu di hóreka na altura di Kaya Grandi. Den presensia di polis, un di e personanan enbolbí a heridá e otro ku un bòter. Pa e motibu aki a pidi asistensia di ambulans na e sitio i a detené ámbos sospechoso. A transportá e sospechoso heridá pa hòspital pa tratamentu médiko. A detené e hòmber di inisial G.F.G.G. di 47 aña di edat pa maltrato ku un arma i un hòmber di inisial F.P. di 49 aña di edat pa menasa i violashon di Lei di Arma BES. A konfiská un arma blanku (stanley mes) tambe na e sitio. Investigashon den e kaso ta kontinuá.
Bringamentu ta kondusí na detenshon
Djabièrnè 10 di aprel, alrededor di 7 or di anochi, un agente na sivil a mira dos persona tras di otro riba Kaya Marcela di kua unu tabatin un bate den su man. Na dado momentu un di e personanan a maltratá e otro ku e bate. E agente na sivil a logra entremeté i kita ámbos persona for di otro. Ademas e agente a konfiská e bate pa mas investigashon.
Mientrastantu e agente a kuminsá duna asistensia na e persona heridá mientras tabata warda riba asistensia di ambulans. Aki a ripará ku un di e personanan a regresá ku baranka den man i a dirigí esaki na dos okashon den direkshon di e agente i e persona heridá. Dado momentu e agente a hañ’é obligá di saka su arma reglamentario i lòs un tiru di atvertensia. Aki a detené e hòmber di inisial F.G.W. di 27 aña di edat pa maltrato ku un arma i maltrato severo. E agente na sivil tambe a entregá keho di intento di maltrato ku un arma. Investigashon den e kaso ta kontinuá.
Ladronisia di ‘fatbike’
Djabièrnè 10 di aprel a drenta keho di ladronisia di un baiskel eléktriko (fatbike) di e marka EB2 PRO. Deskonosínan a bai ku e baiskel ku tabata stashoná ku lòk di kadena den Kaya Grandi. Ta investigando e kaso.
Detenshon violashon Lei di Opio
En konekshon ku un investigashon andando, djamars 7 di aprel, alrededor di 11 or di mainta, a detené un hòmber di inisial J.J.O.A. di 24 aña di edat na altura di Plaza Reina Wilhelmina pa Violashon di Lei di Opio BES. Investigashon den e kaso ta kontinuá.
Imágen: © KPCN
