Aksidente ku herido
Djárason 15 di aprel, alrededor di 11.15 or di mainta, ‘meldkamer’ sentral a risibí notifikashon tokante un aksidente ku herido riba Bulevar Minguel A. Pourier. A dirigí tantu polis i dos ambulans pa e sitio. Na yegada di polis a resultá ku un outo, pa motibunan te ainda deskonosí, a dal den un baki di betòn. A transportá tres okupante ku ambulans pa hòspital pa tratamentu médiko. A hasi tèst di supla ku e shofùr i no tabatin indikashon di uso di alkohòl.
Detenshon pa menasa, resistí detenshon i pa no kumpli ku òrdu di polis
Djárason 15 di aprel, alrededor di 9.30 or di mainta, a detené un hòmber di inisial R.M.W.E. di 60 aña di edat na altura di un ofisina den ‘Centrumgebied’. A detené e sospechoso pa menasa di un ámtenar den funshon, pa resistí detenshon i pa no kumpli ku òrdu di polis. E detenshon a tuma lugá despues ku e sospechoso no kier a sigui òrdu di polis, a menasá un agente polisial i resistí detenshon. A transport’é pa warda di polis pa e trámitenan konserní.
Detenshon pa insulto di ámtenar den funshon i manehá bou di influensia
Djárason 15 di aprel, alrededor di 3.55 or di mardugá, a detené un hòmber di inisial K.A.G. di 20 aña di edat na Kaya Amsterdam pa insulto di un ámtenar den funshon, pa no kumpli ku òrdu di polis, pa resistí detenshon, buracheria públiko, i pa manehá bou di influensia di alkohòl.
A detené e sospechoso despues ku e tabata kore zeilu riba su skuter i na momentu ku polis a par’é, el a kuminsá insultá i resistí fuertemente. A inform’é ku e ta detené, i el a kore bai. Aki a surgi un persekushon na pia despues di kua a logra detené.
A transport’é pa warda di polis pa kontinuá ku e trámitenan korespondiente. Ademas e lo haña un prosèsferbal pa manehá sin reibeweis i pa manehá bou di influensia di alkohòl.
Vehíkulo na kandela
Djamars 14 di aprel, alrededor di 2.15 or di mardugá, ‘meldkamer’ sentral a risibí notifikashon tokante un kandela na Kaya J.E. Nicolaas. Na yegada di polis a resultá ku kabina di un vehíkulo, ku ta usa komo trùk di kuminda, tabata na kandela. Polis a evakuá e habitantenan den bisendario pa motibu ku e kandela a kuminsá ekspandé. Kòrtiku despues brantwer a yega na e sitio i a logra dominá e kandela.
Polis a tuma keho di insendio i ta investigando e kaso.
Detenshonnan pa no kumpli ku òrdu pa para i pa violashon di Lei di Identifikashon
Den oranan di mardugá di djamars 14 di aprel, a tuma lugá un persekushon ku a terminá ku tres detenshon na Kaminda Lagun. Un patruya a duna shofùr di un outo señal pa para pa un kòntròl riba Kaya Caribe, pero e shofùr a ignorá e señal pa para. E patruya a sigui e vehíkulo den diferente kaya, i finalmente a logra blòkia e vehíkulo.
Durante e kòntròl, e shofùr a deklará inisialmente ku el a konsumí alkohòl i no ta disponé di un reibeweis. A hasi un tèst di supla kuné i a resultá ku el a konsumí mas alkohòl ku ta permití pa lei. Ademas e otro okupantenan no por a identifiká nan mes.
A detené tur okupante i a konfiská e vehíkulo. Ta trata di e shofùr, e hòmber di inisial A.J.M.H. di 32 aña di edat pa no a kumpli ku òrdu di polis. Tambe a detené un hòmber di inisial C.J.L. di 36 aña di edat i un mucha hòmber di inisial F.C.M. di 17 aña di edat, ámbos pa violashon di Lei di Identifikashon BES. A transportá tur pa warda di polis pa e trámitenan konserní.