Detenshonnan pa manehá bou di influensia di alkohòl
Den e wikènt ku a pasa, polis a detené dos(2) shofùr pa manehá bou di influensia di alkohòl.
Djadumingu 19 di aprel, alrededor di 8 or di anochi, a detené un hòmber di inisial J.G.P.M. di 40 aña di edat na Kaya Patachi. E sospechoso tabata enbolbí den un aksidente ‘Hit and Run’ di kua e otro partido a logra blòki’é. Konforme e maneho di ‘botsen is blazen’, a hasi un tèst di supla i a resultá ku e sospechoso a konsumí mas alkohòl ku ta permití pa lei. Ademas e no por a mustra un reibeweis i seguro bálido. Pa esaki el a haña but.
Djabièrnè 17 di aprel, alrededor di 6 or di atardi, a detené un hòmber di inisial M.D.L.S. di 23 aña di edat na Kaya Korona. E sospechoso tabata enbolbí den un aksidente ku solamente daño material. Konforme e maneho di ‘botsen is blazen’, a hasi un tèst di supla i a resultá ku el a konsumí mas alkohòl ku ta permití pa lei. El a haña prohibishon di manehá pa 2 ora.
A transportá e sospechosonan pa warda di polis pa kontinuá ku e trámitenan korespondiente. Aki nan lo haña un prosèsferbal tambe.
Detenshon pa buracheria públiko
Djadumingu 19 di aprel, alrededor di 5 or di atardi, a detené un hòmber di inisial C.R.P.V. di 64 aña di edat na Kaya Filomena pa opstakulisá tráfiko mientras e ta bou di influensia di alkohòl i pa buracheria públiko. Polis a topa ku e sospechoso na soño den su vehíkulo mientras e tabata opstakulisá tráfiko na altura di Kaya Filomena i Kaya Dr. Jose Girigorio Hernandez. Ademas ora ku polis a lant’é for di soño, a konstatá holó fuerte di alkohòl, e no tabata ke duna oido na òrdu di polis i e sospechoso a bira agresivo. Pa e motibu aki a detené i a hib’é warda di polis pa kontinuá ku e trámitenan korespondiente.
Violashon di orario di sera
Den oranan di mardugá di djasabra 19 di aprel, alrededor di 3.45 or, polis a sera un lokalidat di hóreka na Kaya Libertador Simon Bolivar. Esaki pa motibu di violashon di e orario di sera pèrmití. Durante kòntròl, tabatin un grupo di mas o ménos 10 persona den e lokalidat. A sera e negoshi mesora i e doño a haña un prosèsferbal pa violashon di Lei di Bebida i Hòreka BES (de Drank- en Horecawet BES).
Kòntròl dirigí riba dòmtrùk
Den oranan di atardi i anochi di djasabra 18 di aprel, a tene un kòntròl rutinario na vários sitio. Durante e kòntròl a para i kontrolá diferente dòmtrùk ku ta transportá karga. E kòntròl tabata dirigí riba prinsipalmente tin un reibeweis, seguro bálido i plachi di number.
A kontrolá (11) diesun vehíkulo i a konstatá e siguiente violashonnan:
2x but pa manehá sin plachi di number bálido;
2x but pa manehá sin reibeweis bálido;
1x pa manehá sin seguro bálido;
1x a konfiská un plachi di number falsifiká;
4x atvertensia pa plachi di number.
KPCN ta hasi un apelashon na tur shofùr pa mantené nan mes na e reglanan di tráfiko. Durante e kòntròlnan aki agentenan lo sòru pa tur partisipante den tráfiko tene nan mes na e leinan preskribí pa nan mesun seguridat. Kòntròlnan di tráfiko ta kontinuá ku regularidat i violashon di lei tin konsekuensia.
Notifikashon di fivermentu
Den oranan di atardi di djasabra 18 di aprel, polis a risibí notifikashon tokante fivermentu i pustamentu ilegal na altura di Kaminda Yato Bako i entrada di Amboina. Ademas e partisipantenan tabata opstakulisá tráfiko. Na yegada di polis a konstatá un grupo di persona na e sitio, diferente skuter i ‘fatbike’ pero no tabatin fivermentu i pustamentu. Na yegada di polis, tur persona a bai for di e sitio. Dor di e akshon aki, a logra evitá ku e aktividat ilegal ta kontinuá.
Polis ta enfatisá ku kareda ilegal riba karetera públiko i fivermentu ta trese rísikonan grandi pa e partisipantenan mes, pa otro usuarionan di tráfiko i pa personanan ku ta para wak. Polis ta keda alerta pa e tipo di señalnan aki pa garantisá seguridat riba karetera públiko. Bo a mira un situashon peligroso òf preparashon pa karedanan ilegal? Notifiká esaki mesora na ‘meldkamer’ sentral via 911.