Detenshon pa manehá bou di influensia di alkohòl
Djabièrnè 24 di aprel, alrededor di 3.35 or di mardugá, a detené un hòmber di inisial B.M.T. di 22 aña di edat riba Kaya Nikiboko Zuid. Un patruya a para e sospechoso den su vehíkulo pa un kòntròl rutinario. Durante kòntròl a resultá ku e sospechoso ta bou di influensia di alkohòl. A transportá e sospechoso pa warda di polis pa kontinuá ku e trámitenan korespondiente. Aki el a haña prohibishon di maneha pa 2 ora i e lo haña un prosèsferbal tambe.
Ladronisia for di vehíkulo
Djaweps 23 di aprel a drenta keho di ladronisia for di un bùs ku tabata stashoná na altura di un establesimentu di hóreka na Sorobon. Deskonosínan a habri porta di e vehíkulo i a bai ku un tas di lomba ku kontenido. Ta trata di un tas di e marka Kipling ku entre otro dokumentunan, paña i sèn kèsh. Ta investigando e kaso.
Detenshon riba laman
Den oranan di mainta di djaweps 23 di aprel, e Grupo di Tarea Spesial (GBO) ku asistensia di e tim marítimo di KPCN a detené un hòmber di inisial C.S.A.S di 31 aña di edat riba boto den laman. A detené e sospechoso pa violashon di Lei di Arma di Kandela BES, menasa i violensia públiko. E detenshon ta den kuadro di un investigashon andando en konekshon ku un kaso di bringamentu riba 10 di òktober 2025. Relashoná ku e detenshon, a tene dos entrada hudisial. Ta trata di un kas na Bario den Tera i na Hato. No a topa ku nada relevante pa e investigashon. Investigashon den e kaso ta kontinuá.
Kiebro na akomodashon turístiko
Djaweps 23 di aprel a drenta keho di kiebro na un akomodashon turístiko na Bulevar Gobernador N. Debrot. Deskonosínan a haña akseso na un apartamentu i a bai ku un oloshi di sambuyá di e marka Garmin.
Djaweps 23 di aprel a drenta keho di kiebro na e mesun akomodashon turístiko na Bulevar Gobernador N. Debrot. Deskonosínan a haña akseso na un otro apartamentu i a bai ku entre otro un GoPro 13, oloshi di sambuyá di e marka Garmin, diferente kargadó, un tas di lomba i un pòtmòni ku karchinan i sèn kèsh.
Ta investigando ámbos kaso.
Kòntròl planiá di tráfiko
Den oranan di mèrdia di djárason 22 di aprel, a tene un kòntròl di tráfiko riba Kaya Korona. E kòntròl tabata dirigí riba tin un reibeweis i seguro bálido, faha di seguridat bistí i manehá ku telefòn den man. Durante e kòntròl aki a para i kontrolá 32 vehíkulo i a duna diferente but.
E butnan tabata pa e siguiente violashonnan:
-
3x pa manehá sin seguro bálido;
-
3x pa manehá sin reibeweis bálido;
-
1x pa manehá sin faha di seguridat bistí.
Kòntròlnan di tráfiko ta kontinuá!
Ladronisia hèlm di skuter
Djamars 21 di aprel a drenta keho di ladronisia di un hèlm di skuter. E hèlm tabata bou di asiento di e skuter ku tabata stashoná riba tereno di un establesimentu di hóreka na Kaminda di Lac. Ta investigando e kaso.