Antesala Simadan di mucha pa Dia di Rincon
Den oranan di atardi di djamars 28 di aprel a tuma lugá e Antesala Simadan di Mucha den Rincon. E Simadan a start 4.25 or di atardi na Kaya Encarnacion B. Sint Jago i a sigui pa Kaya Commerce i Bulevar Miguel Pourier. Total 4 grupo i 7 vehíkulo a partisipá den e parada. Polis a kontrolá tur shofùr riba reibeweis bálido i tambe dokumento di seguro. Un shofùr no por a mustra dokumento di seguro i un otro shofùr su reibeweis a kaduká. A saka tur dos shofùr i vehíkulo for di e parada.
Tambe a hasi tèst di supla ku shofùrnan i tur a pasa esaki ku éksito.
E kòntròlnan aki ta esensial pa seguridat di un i tur ku ta partisipá den e parada i e públiko kantu di kaya. KPCN lo ta presente na tur parada di Simadan i ta rekordá tur shofùr pa sòru di tin tur e dokumentunan nesesario i pa no konsumí alkohòl na momentu ku bo ta manehá. Kòntròlnan por tuma lugá na kualke momentu durante e parada.
Bai Rincon seif: Paga tinu riba bo velosidat i no manehá bou di influensia!
KPCN ta bolbe rekordá un i tur pa paga tinu riba bo velosidat i no manehá bou di influensia di alkohol! Nos ke pa tur hende yega Rincon i yega kas seif. P’esei, KPCN ta hasi yamada urgente na un i tur:
-
Paga tinu riba bo velosidat. E kaminda pa Rincon por ta drùk. Ahustá bo velosidat i manehá responsabel.
-
No bebe alkohòl i manehá. Manera a resultá e dianan ku a pasa, alkohòl den tráfiko a kondusí na aksidentenan. Evitá ku abo ta kousa di un aksidente. Si bo ta konsumí alkohòl, no manehá. Regla un shofùr pa hiba bo kas sano i salvo.
Laga nos huntu hasi e fiesta kultural aki unu seif!
Kòntròl planiá di tráfiko
Den oranan di mainta di djamars 28 di aprel, polis a tene kòntròl di tráfiko riba Bulevar Miguel A. Pourier. E kòntròl tabata pa mantené seguridat den tráfiko. Durante e kòntròl aki a para i kontrolá 21 vehíkulo, di kua 2 trùk, 1 skuter i 18 outo. Aki a duna diferente but.
E butnan tabata pa e siguiente violashonnan:
-
2x pa manehá sin reibeweis bálido;
-
4x pa manehá sin seguro bálido;
-
1x pa manehá sin faha di seguridat bistí.
Kòntròlnan di tráfiko ta kontinuá!
