Notisia di polis di djárason 29 di aprel te ku djárason 6 di mei 2026

Djárason 6 di mei, alrededor di 6.30 or di mainta, a detené un hòmber di inisial M.Y.C. di 28 aña di edat na Kaya Proud. E sospechoso a dal ku su pikòp den kurá di un kas i kibra un pipa di awa. Ademas el a dal den un palu di lus. Konforme e maneho di ‘botsen is blazen’, a hasi un tèst di supla i a resultá ku el a konsumí mas alkohòl ku ta pèrmití pa lei. A konfiská su reibeweis.

Djadumingu 3 di mei, alrededor di 2.55 or di mardugá, a detené un hòmber di inisial E.F.E.E. di 36 aña di edat na Kaya Korona. Un patruya a konstatá ku e sospechoso a kometé infrakshon den tráfiko i a par’é pa kòntròl. E sospechoso no tabatin su reibeweis kuné i e tabata mustra diferente karakterístika di un persona ku ta bou di influensia di alkohòl. Pa e motibu aki a hasi un tèst di supla kuné i a resultá ku el a konsumí mas alkohòl ku ta pèrmití pa lei. Despues di un análisis di rosea, a duné òrdu pa entregá su reibeweis. Ademas el a haña but pa motibu ku no por a presentá un reibeweis na promé instante i pa kometé infrakshon den tráfiko dor di manehá den direkshon robes. Esaki ta e di dos biaha ku ta detené e sospechoso pa manehá bou di influensia di alkohòl. 

Djaweps 30 di aprel, alrededor di 9.45 or di anochi, a detené un hòmber di inisial M.H.R. di 71 aña di edat riba Kaya Dr. Jose Girigirio Hernandez. E sospechoso tabata enbolbí den un aksidente entre dos vehíkulo ku solamente daño material. Konforme e maneho di ‘botsen is blazen’, a hasi un tèst di supla i a resultá ku el a konsumí mas alkohòl ku ta pèrmití pa lei. El a haña prohibishon di manehá pa 3 ora.

Djárason 29 di aprel, alrededor di 9.50 or di anochi, a detené un hòmber di inisial E.F.D. di 31 aña di edat na Kaya Industria. E sospechoso tabata enbolbí den un aksidente entre dos vehíkulo ku solamente daño material. Konforme e maneho di ‘botsen is blazen’, a hasi un tèst di supla i a resultá ku el a konsumí mas alkohòl ku ta pèrmití pa lei. Despues di un análisis di rosea, el a haña òrdu pa entregá su reibeweis. 

A transportá tur sospechoso pa warda di polis pa kontinuá ku e trámitenan korespondiente. Aki nan lo haña un prosèsferbal tambe.

 

Detenshon pa maltrato 

Djamars 5 di mei, alrededor di 10.50 or di anochi, a detené un dama di inisial A.D.R.C. di 33 aña di edat na Kaya Fedalma pa maltrato. E sospechoso a maltratá dos dama. Ambulans a transportá ámbos víktima pa hòspital pa tratamentu médiko. Investigashon den e kaso ta kontinuá. 

Ladronisia di plachi di number 

Djamars 5 di mei a drenta keho di ladronisia di un plachi di number. E plachi di number tabata pegá riba un outo stashoná na Kaya Oro. Deskonosínan a lòs e plachi di number di dilanti, numerá B-17674 i a bai kuné. E kaso ta den investigashon.

Ladronisia for di kònteiner 

Djamars 5 di mei a drenta keho di ladronisia for di un kònteiner riba un tereno na Kaya Electròn. Deskonosínan a haña akseso na e kònteiner i bai ku un maletin ku un mashin di skruf. 

Djamars 5 di mei a drenta keho di ladronisia for di un kònteiner na Kaya Korona. Deskonosínan a haña akseso na e kònteiner i a bai ku entre otro un sleiptòl i un mashin di zag. 

E kasonan ta den investigashon.

Aksidente entre dos outo 

Djaluna 4 di mei, alrededor di 6.15 or di atardi, ‘meldkamer’ sentral a risibí notifikashon tokante un aksidente entre dos outo riba Kaya Libertador Simon Bolivar. Shofùr di outo 1 a lora un bògt muchu grandi i a resultá riba e banda kontrali di kaminda. Pa e motibu aki el a dal den outo 2 ku tabata aserkando. Shofùr di outo 1 tabata keha di doló i personal di ambulans a dun’é tratamentu médiko na e sitio mes. Konforme e maneho di ‘botsen is blazen’, a hasi tèst di supla ku ámbos shofùr pero no tabatin indikashon di uso di alkohòl. Shofùr di outo 2 a haña but pa manehá sin reibeweis i pa motibu ku no por a  presentá dokumentunan di seguro. 

Ladronisia di skuter 

Djadumingu 3 di mei a drenta keho di ladronisia di un skuter di e marka Sym, tipo Fiddle II ku plachi di number MF-4619. E skuter tabata stashoná dilanti di un kas na Kaya Frater Odulfinus i deskonosínan a bai kuné. E kaso ta den investigashon.

A konfiská outo sin dokumento 

Djaluna 4 di mei, alrededor di 1.45 or di mardugá, un patruya a mira un outo stashoná mei mei di kaminda na Kaya Kamari. E outo tabata sin lus, e no tabatin plachi di number patras i dos persona tabata tofer na dje. Na momentu ku e patruya a bira pa bèk pa un kòntròl, e outo i personanan a disparsé. Despues di un búskeda kòrtiku, a topa ku e outo den un kaminda di tera den serkania. A topa ku e personanan tambe ademas niun di dos (2) por a identifiká nan mes i tampoko presentá un reibeweis. Debí ku nan no tin reibeweis, nan no por a presentá dokumentonan di seguro i e outo no tin plachi di number pa ta riba karetera públiko, a konfiská e vehíkulo. Ademas e outo tabata falta diferente piesa tékniko. E doño por haña e vehíkulo bèk na momentu ku e por presentá un reibeweis bálido, dokumento di seguro i plachi di number.  

Ladronisia di pikòp 

Djaluna 4 di mei, alrededor di 7.40 or di mainta, ‘meldkamer’ sentral a risibí notifikashon ku a topa ku un vehíkulo deskonosí, probablemente prosedente di ladronisia, riba tereno di un kompania na Plantashi Aruba. Na yegada di polis a resultá ku ta trata di un pikòp di un kompania di hür outo. E vehíkulo tabata stashoná na altura di Te Amo Bich na Kaya Internashonal i deskonosínan a bai kuné den oranan di mardugá. A konfiská e pikòp pa mas investigashon. 

A pasa lòs tiru riba dos kas 

Djadumingu 3 di mei, polis a risibí notifikashon tokante un kaso di lòsmentu di bala riba un kas na Kaya Demerara. Deskonosínan a pasa i a lòs bala dos biaha den e mesun siman riba e kas. A konfiská hùls.

Den oranan lat di anochi di djadumingu 3 di mei, a drenta notifikashon tokante un otro kaso di lòsmentu di bala na un kas den Mamparia Kutu. Deskonosínan a pasa i a lòs bala riba e kas. Aki tambe a konfiská hùls.

No tabatin herido i e kasonan ta den investigashon.

KPCN ta pidi tur persona ku a mira, tende òf tin informashon tokante e kasonan aki pa tuma kontakto ku polis na 715 8000 òf via di e liña di tep anónimo 9310.

Kiebro den kas 

Djadumingu 3 di mei a drenta keho di kiebro den un kas situá na Kaya Maria. Deskonosínan a haña akseso na e kas i a bai ku entre otro un tablet, un telefòn selular, pasport, karchi di banko i sèn kèsh. 

Djasabra 25 di aprel a drenta keho di kiebro den un kas na Punt Vierkant. Deskonosínan a haña akseso na e kas i a bai ku entre otro shete(7) komprèsor di èrko i un èrko. 

E kasonan ta den investigashon.

Aksidente entre outo i bròmer 

Djasabra 2 di mei, alrededor di 1.15 or di mèrdia, ‘meldkamer’ sentral a risibí notifikashon tokante un aksidente ku herido riba Kaminda di Onima. Na yegada di polis a resultá ku ta trata di un aksidente entre un outo i un bròmer. Shofùr di e bròmer a resultá heridá i ambulans a transport’é pa hòspital pa tratamentu médiko. Konforme e maneho di ‘botsen is blazen’, a hasi tèst di supla ku ámbos shofùr pero no tabatin indikashon di uso di alkohòl. Debí ku tabatin zeta riba kaminda a konsekuensia di e aksidente, a pidi asistensia di brantwer pa basha santu.

Bringamentu

Djasabra 2 di mei, alrededor di 2.10 or di mardugá, ‘meldkamer’ sentral a risibí notifikashon tokante bringamentu na altura di un establesimentu di hóreka na Kaya Bonaire. Na yegada di polis tabatin un públiko grandi presente i a topa ku un persona drumi abou. Presentenan a deklará ku e víktima ta bou di influensia di un òf otro supstansia, e tabata hopi agresivo i tabata trata di bringa ku tur presente. Pa evitá ku e situashon ta eskalá, presentenan a logra dominá e hòmber i pone na suela. Ademas e tabata for di su konosementu i heridá. Ambulans a transport’é pa hòspital pa tratamentu médiko. 

Aksidente ku herido 

Djabièrnè 1 di mei, alrededor di 9.50 or di anochi, ‘meldkamer’ sentral a risibí notifikashon tokante un aksidente ku herido na altura di e krusada di Kaminda Yato Bako i Kaya Macario (Cai) Sint Jago. Na yegada di polis a topa ku un persona heridá riba kaminda. Ambulans a transportá e víktima pa hòspital pa tratamentu médiko. Konforme e maneho di ‘botsen is blazen’, a hasi tèst di supla ku solamente un shofùr i no tabatin indikashon di uso di alkohòl. Pa motibu di prioridat médiko, no por a hasi e tèst di supla ku e otro shofùr. Ambos vehíkulo enbolbí tabatin daño konsiderabel.

Ladronisia di webu  

Djabièrnè 1 di mei a drenta keho di ladronisia di webu for di un kompania na altura di Punta Blanku. Deskonosínan a haña akseso na e tereno i a bai ku 8 kaha grandi ku ta kontené 12 palèt, ku kada un 30 webu. Djabièrnè 24 di aprel tambe a drenta keho di ladronisia di webu na e mesun kompania. E dia en kuestion, deskonosínan a bai ku 120 kaha di webu, ku kada un 12 webu. E kasonan ta den investigashon.

Selebrashon Dia di Rincon trankil i bou di kòntròl 

Kuerpo Polisial Hulanda Karibense (KPCN) ta wak bèk riba un Dia di Rincon 2026, éksitoso. Den liñanan general, e selebrashonnan a transkurí den un ambiente trankil i bou di kòntròl.

Durante di e paradanan di simadan, a kontrolá seguro di tur vehíkulo, tambe si e shofùrnan tin reibeweis bálido i e kategoria korekto pa manehá. Ademas tur shofùr a pasa e tèst di supla ku éksito. A atendé ku un shofùr pa motibu ku e no tabatin e kategoria korekto pa e vehíkulo ku e ta manehá, tambe a atendé ku un shofùr ku su reibeweis a kaduká i un shofùr ku no por a presentá dokumentonan di seguro. E shofùrnan aki no por a sigui manehá i mester a buska otro shofùr òf vehíkulo. 

Durante simadan di folklor, dia 29 di aprel, dos vehíkulo ku a daña a kousa ku e parada, a stanka te na momentu ku a remplasá nan. 

Durante di Dia di Rincon, Krus Kòrá i personal di ambulans a atendé ku diferente persona ku a bira malu i ku tabata rekerí tratamentu médiko.

Alrededor di 6 or di atardi, riba Dia di Rincon, despues di algun atvertensia a sera un establesimentu di hóreka na Bulevar Miguel A. Pourier. Motibu di esaki tabata bendementu di bebida alkohóliko den bòter di glas. Esaki ounke tur doño di establesimentu i stènt tabata na altura tokante e prohibishon di bende bebida den bòter di glas durante aktividatnan di tal magnitut. 

Ademas, den oranan di anochi a risibí notifikashon ku a topa ku vários vürwèrk peligroso na diferente sitio den Rincon. Debí ku no tabatin pèrmit pa tira vürwèrk i pa seguridat di tur persona presente, a konfiská esakinan.

Alrededor di 12 or di mardugá, a detené un hòmber di inisial A.J.R. di 20 aña di edat na Kaya Generoso. Detenshon di e sospechoso a tuma lugá despues ku polis a risibí notifikashon ku e sospechoso probablemente tabatin arma di kandela den su poder. Despues a drenta notifikashon ku e sospechoso a lòs tiru den laira i menasá un persona. A detené pa violashon di Lei di Arma di Kandela BES, menasa ku violensia públiko i destrukshon. No a topa ku e arma di kandela.

Algun ratu despues, alrededor di 12.25 or di mardugá di djabièrnè 1 di mei, a detené un di dos sospechoso den e kaso aki na Kaya Generoso pa violashon di Lei di Arma di Kandela BES. Ta trata di un hòmber di inisial S.M.J. di 25 aña di edat. Investigashon den e kaso ta kontinuá.

Tambe a risibí notifikashon di dos kaso di bringamentu. Unu na altura di Kaya Milon i e otro riba Bulevar Miguel A. Pourier na altura di Kaya Encarnacion B. Sint Jago. A konfiská un machete. No tabatin herido i tampoko detenshon.

Kuerpo Polisial Hulanda Karibense pronto lo sinta na mesa ku e organisadónan di Dia di Rincon pa evaluá e selebrashon, i ta wak dilanti riba un siguiente edishon seif i éksitoso. 

A konfiská bròmer despues di persekushon 

Djaweps 30 di aprel, alrededor di 10.10 or di mainta, un patruya a mira un bròmer sin plachi di number na altura di rotònde sùrnan di Roosendal. Tambe e agentenan a konstatá otro puntonan ku a hala atenshon i a duna e shofùr señal pa para riba Kaya Nikiboko Sùit. Shofùr di e bròmer no a duna oido na e òrdu i a hisa velosidat. El a pasa diferente vehíkulo i sòru pa un situashon peligroso den tráfiko. Djis despues e shofùr a para e bròmer riba e kaya menshoná. E no por a presentá un reibeweis bálido. A konfiská e bròmer i e shofùr a haña but pa manehá sin reibeweis, sin plachi di number i pa no duna oido na òrdu di polis pa para. 

Detenshon pa destrukshon i intento di insendio 

Djaweps 30 di aprel, alrededor di 5.30 or di mainta, a detené un hòmber di inisial J.S.L. di 28 aña di edat na Kaya Jean B.F. Vitte pa destrukshon i intento di insendio. E sospechoso a kometé destrukshon na un vehíkulo i a trata di pega un kas na kandela. E kasto ta den investigashon.

Aksidente 

Djaweps 30 di aprel, alrededor di 1.15 or di mardugá, ‘meldkamer’ sentral a risibí notifikashon tokante un aksidente ku herido riba Kaya Neerlandia. Na yegada di polis, a resultá ku ta trata di un aksidente entre un outo i un skuter. Pa evitá un aksidente, shofùr di e skuter a trata na desviá un outo ku tabata subi kaminda i a pèrdè kòntròl. El a kai i e skuter a bai dal den un otro vehíkulo ku tabata aserkando. Shofùr di e skuter a resultá heridá i ambulans a transport’é pa hòspital pa tratamentu médiko. A hasi tèst di supla ku shofùr di e outo, pero no tabatin indikashon di uso di alkohòl. Pa motibu di prioridat médiko, shofùr di e skuter no por a hasi e tèst di supla. 

Pikòp ta aksidentá den vehíkulo stashoná 

Djaweps 30 di aprel, alrededor di 12.15 or di mardugá, ‘meldkamer’ sentral a risibí notifikashon tokante un aksidente ku herido riba Bulevar Gobernador N. Debrot. Na yegada di polis, a resultá ku ta trata di un aksidente entre dos vehíkulo. Un pikòp(vehikulo 1) tabata bai direkshon nort riba e kaya menshoná na momentu ku diripiente un outo a sali su dilanti for di Kaya P.N. Antonio Neuman. Pa evitá un aksidente ku e auto aki, el a desviá pero a bai dal den un vehíkulo stashoná kantu di kaminda. Un pasahero di e pikòp a resultá heridá i ambulans transport’é pa hòspital pa tratamentu médiko. A hasi tèst di supla ku shofùr di e pikòp, pero no tabatin indikashon di uso di alkohòl. 

Ladronisia ku violensia 

Djabièrnè 1 di mei a drenta keho di un kaso di ladronisia ku violensia ku a tuma lugá djárason 29 di aprel na Kaya Sonmontuno. Den oranan di anochi riba e dia menshoná, alrededor di 10’or, dos hòmber deskonosí a aserká un peaton i a maltrat’é. Despues nan a push’é na suela i a kita su tas ku kontenido for di dje. Despues di e atrako, ámbos sospechoso a hui na pia den direkshon di Hanchi Amboina. 

Polis ta pidi un i tur ku por a mira, sa algu tokante e atrako òf tin informashon ku por ta relevante pa e investigashon, pa mèldu esaki via 715 8000 òf e liña di tep anónimo 9310.

Investigashon den e kaso ta andando.