Detenshon pa menasa i entrada hudisial
Djaweps 7 di mei, alrededor di 9.35 or di anochi, a detené un mucha hòmber di inisial D.X.G.M. di 13 aña di edat na Kaya Bototé pa menasa. E sospechoso a menasá alumnonan i dosente na skol. En konekshon ku e detenshon aki, a tene dos entrada hudisial. Ta trata di un kas na Kaya Mango i na Kaya Trupial. Durante e entradanan hudisial no a konfiská nada. Investigashon den e kaso ta kontinuá.
A konfiská arma di kandela despues di persekushon
Djaweps 7 di mei, alrededor di 2.35 or di atardi, un persekushon a tuma lugá den e bario di Antriol i a terminá na Kaya Gloria. Un patruya a duna shofùr di un pikòp òrdu pa para riba Kaya Papa Cornes, pa motibu ku e no tabatin plachi di number. E shofùr a ignorá e òrdu i a hisa velosidat. E patruya a sigui e pikòp i despues e shofùr a para e vehikulo na Kaya Gloria. Aki el a baha i kore bai. Polis a kondusí un investigashon na e sitio i a topa ku un arma di kandela i tambe munishon. A konfiská esakinan i e vehíkulo pa mas investigashon.
Despues di un búskeda, alrededor di 8.45 or di anochi, e sospechoso a presentá na warda di polis i a detené. Ta trata di un hòmber di inisial O.G.D. di 34 aña di edat. Investigashon den e kaso ta kontinuá.
Dos detenshon durante entrada hudisial
Djaweps 7 di mei, alrededor di 5 or di mardugá, e Grupo di Tarea Spesial (GBO) a detené dos sospechoso na un kas na Kaya Benue pa violashon di Lei di Arma di Kandela BES. Ta trata di un hòmber di inisial D.A.E. i un hòmber di inisial R.M.E., ámbos di 18 aña di edat. Ademas reshèrshinan a tene entrada hudisial na e kas i a konfiská artíkulonan relevante pa e investigashon. E detenshonnan ta en konekshon ku e investigashon andando relashoná ku e tiroteo fatal ku a tuma lugá djadumingu 8 di yüni 2025 na Kaya Prinsès Marie. E investigashon ta kontinuá.
Detenshon pa menasa
Djaweps 7 di mei, alrededor di 7.45 or di mainta, a detené un hòmber di inisial O.O.N. di 56 aña di edat na Kaya Dialma pa menasa. E sospechoso tabata probablemente bou di influensia di supstansianan narkótiko. E tabata agresivo i a menasá un persona ku morto. Ta investigando e kaso.
Kòntròl planiá di tráfiko ku detenshon
Den oranan di anochi di djárason 6 di mei, a tene un kòntròl di tráfiko riba Kaya Neerlandia. Durante e kòntròl aki a para i kontrolá 23 vehíkulo i a duna dies(10) but.
E butnan tabata pa e siguiente violashonnan:
-
7x pa manehá sin reibeweis bálido;
-
2x pa manehá sin seguro bálido;
-
1x pa manehá sin plachi di number pegá dilanti na e vehikulo.
Banda di esaki a hasi tèst di supla ku shofùr di un vehíkulo ku tabata mustra diferente karakterístika di un persona ku ta bou di influensia di alkohòl. A resultá ku el a konsumí mas alkohòl ku ta pèrmití pa lei. A detené e hòmber di inisial P.K.K. di 46 aña di edat. El a haña un prohibishon di manehá pa 3 ora, e lo haña un prosèsferbal i ademas el a haña but pa no por a mustra dokumentunan di seguro.
Kòntròlnan di tráfiko ta kontinuá!
Ladronisia den negoshi
Djárason 6 di mei, a drenta keho di ladronisia den un negoshi situá na Kaya Industria Nort. Un persona deskonosí a drenta e negoshi i a bai ku dos spiker di marka JBL, sin paga. Ta investigando e kaso.
Kiebro den minimarket
Djamars 5 di mei a drenta keho di kiebro den un minimarket situá na Kaya Neerlandia. Den oranan di mardugá, deskonosínan a haña akseso na e depósito di e negoshi i a bai ku entre otro dos kaha di bebida alkohóliko di e marka Lavish. Ademas e sospechosonan a hòrta un pikòp di e marka Nissan, tipo Frontier na momentu ku nan a bandoná e minimarket. Den oranan di mèrdia riba e mesun dia, polis a risibí notifikashon ku a topa ku e vehíkulo ku a bai kuné durante e kiebro, kimá na Onima. Ta investigando e kaso.