Imágen: © KPCN
A hòrta pikòp durante kiebro
Djaluna 11 di mei a drenta keho di kiebro na un garashi situá na Kaya Nikiboko Nort. Den oranan di mardugá di djadumingu 10 di mei, deskonosínan a haña akseso na e tereno i a bai ku entre otro un mashin di laba outo i un pikòp blanku di e marka Toyota, tipo Hilux, sin plachi di number. Ta investigando e kaso.
Djasabra 9 di mei a drenta keho di kiebro na un kompania di hür outo situá na Kaya Industria Pariba. Den oranan di mardugá, deskonosínan a haña akseso na e negoshi i a bai ku entre otro kuater ‘Ipad’, un kaha fuerte ku diferente yabi di outo i sèn kèsh. Tambe a bai ku un pikòp di e marka Toyota, tipo Hilux, ku plachi di number V-6915. Den oranan di mainta riba e mesun dia, alrededor di 6 or, polis a risibí notifikashon tokante un vehíkulo na kandela na altura di Kaminda di Lac. Brantwer a paga e kandela. Despues di investigashon a resultá ku ta trata di e pikòp ku a bai kuné durante e kiebro. Ta investigando e kaso.
Detenshon pa manehá bou di influensia di alkohòl
Djadumingu 10 di mei, alrededor di 4.40 or di atardi, a detené un hòmber di inisial D.T.T. di 36 aña di edat na Hanchi Amboina. E sospechoso a dal ku su outo den un palu di lus i seguidamente el a dal den un outo stashoná. Konforme e maneho di ‘botsen is blazen’, a hasi un tèst di supla ku e sospechoso i a resultá ku el a konsumí mas alkohòl ku ta permití pa lei. Ademas e no tin reibeweis. A transportá e sospechoso pa warda di polis pa kontinuá ku e trámitenan korespondiente. Aki e lo haña un prosèsferbal tambe.
Imágen: © KPCN
Ladronisia for di pikòp na sitio di sambuyá
Djadumingu 10 di mei a drenta keho di ladronisia for di un pikòp ku tabata stashoná na altura di e pir di salu riba E.E.G. Bulevar. Deskonosínan a bai ku un kámara di e marka Insta360 X5, modèl 8K 360 Action Cam, na momentu ku e doño tabata sambuyá. E kámara tabata den un tas di lomba, den e vehíkulo. Ta investigando e kaso.
Aksidente
Djasabra 9 di mei, alrededor di 10.40 or di anochi, ‘meldkamer’ sentral a risibí notifikashon tokante un aksidente riba Kaminda di Gurubu. Na yegada di polis a resultá ku shofùr di un outo a pèrdè kòntròl i dal den un palu di lus. E vehíkulo i e palu di lus tabatin daño konsiderabel. E shofùr a keda ileso i konforme e maneho di ‘botsen is blazen’, a hasi tèst di supla kuné, i no tabatin indikashon tokante uso di alkohòl.
Kòrtiku despues di e aksidente aki, alrededor di 10.45 or di anochi, a drenta notifikashon tokante un otro aksidente na e mesun sitio. Shofùr di un skuter no a pone muchu bon atenshon den tráfiko na e sitio, di kua el a pèrdè kòntròl i kai. El a resultá levemente heridá. Personal di ambulans a hasi un chekeo médiko ku tantu shofùr di e skuter i e shofùr di e outo na e sitio mes. Konforme e maneho di ‘botsen is blazen’, a hasi tèst di supla ku shofùr di e skuter tambe, i no tabatin indikashon tokante uso di alkohòl.
Aksidente entre outo i skuter
Djasabra 9 di mei, alrededor di 9 or di anochi, ‘meldkamer’ sentral a risibí notifikashon tokante un aksidente entre un outo i un skuter riba Kaya Korona. Pa falta di dunamentu di preferensia, e skuter a dal den e outo. Shofùr di e skuter a resultá heridá i ambulans a transport’é pa hòspital pa tratamentu médiko. Konforme e maneho di ‘botsen is blazen’, a hasi tèst di supla ku ámbos shofùr, i no tabatin indikashon tokante uso di alkohòl.
Kòntròl planiá di tráfiko
Den oranan di atardi di djasabra 9 di mei, polis a tene kòntròl di tráfiko riba Bulevar Gobernador N. Debrot. E kòntròl tabata pa mantené seguridat den tráfiko. Durante e kòntròl aki a para i kontrolá 12 vehíkulo. Aki a duna un but pa manehá sin reibeweis bálido.
Riba e mesun dia a tene un kòntròl di tráfiko na Kaya Neerlandia. Durante e kòntròl aki a para i kontrolá 11 vehíkulo i a duna 6 but.
E butnan tabata pa e siguiente violashonnan:
-
3x pa manehá sin seguro bálido;
-
3x pa manehá sin faha di seguridat bistí.
Kòntròlnan di tráfiko ta kontinuá!
Detenshon
Djasabra 9 di mei, alrededor di 5 or di mardugá, a detené un hòmber di inisial S.S.A. di 51 aña di edat na Kaya Ramona pa komèrsio di supstansianan narkótiko. Ademas pa resistí detenshon i pa no kumpli ku òrdu di polis. A konfiská un kantidat di sèn kèsh, diferente mashin di pisa i sakunan ku supstansianan probablemente narkótiko. Investigashon den e kaso ta kontinuá.
Aksidente entre vèn i skuter
Djabièrnè 8 di mei, alrededor di 5.25 or di atardi, ‘meldkamer’ sentral a risibí notifikashon tokante un aksidente ku herido riba Kaya Nikiboko Sùit. Pa falta di dunamentu di preferensia, e skuter a dal den e vèn. Shofùr di e skuter a resultá levemente heridá i personal di ambulans a dun’é tratamentu médiko na e sitio mes. Konforme e maneho di ‘botsen is blazen’, a hasi tèst di supla ku ámbos shofùr, i no tabatin indikashon tokante uso di alkohòl. Shofùr di e skuter a haña but pa manehá sin reibeweis bálido.
Detenshon pa ladronisia
Djabièrnè 8 di mei, alrededor di 12.40 or di mèrdia, a detené un hòmber di inisial E.A.R.M. di 44 aña di edat na warda di polis pa ladronisia. Djárason 6 di mei, e sospechoso a drenta un negoshi na Kaya Industria Nort i a bai ku dos spiker di marka JBL, sin paga. Investigashon den e kaso ta kontinuá.