Detenshonnan pa manehá bou di influensia di alkohòl
Den e dianan ku a pasa, polis a detené sinku(5) shofùr pa manehá bou di influensia di alkohòl.
Djabièrnè 15 di mei, alrededor di 4.45 or di mardugá, a detené un dama di inisial M.T.v.d.B. di 19 aña di edat riba Kaya Grandi. Un patruya a mira un skuter ku dos persona i a konstatá ku e pasahero no tabatin hèlm bistí. Pa e motibu aki a duna e shofùr señal pa para pa un kòntròl. Durante e kòntròl, e shofùr tabata mustra diferente karakterístika di un persona ku ta bou di influensia di alkohòl i a hasi un tèst di supla kuné. A resultá ku e sospechoso a konsumí mas alkohòl ku ta pèrmití pa lei. E sospechoso a haña prohibishon pa manehá di 5 ora.
Algun ora despues, alrededor di 6 or di mainta, polis a mira e sospechoso ta manehá un skuter riba Bulevar Gobernador N. Debrot mientras e tin un prohibishon pa manehá. A dun’é señal pa para, el a nenga di sigui òrdu di polis i a sigui kore. Finalmente e sospechoso a para na un kas na Kaya Heerlen i aki a bolbe detené pa manehá bou di influensia di alkohòl, pa neglishá òrdu di polis pa para i pa violashon di e prohibishon pa manehá.
Djabièrnè 15 di mei, alrededor di 3.10 or di mardugá, a detené un hòmber di inisial
R.J.B. di 25 aña di edat riba Bulevar Julio A. Abraham. Un patruya a mira e sospechoso riba un skuter, e tabata sin hèlm i tabata manehá den direkshon prohibí. Pa e motibu aki a par’é pa kòntròl. Durante e kòntròl, a hasi un tèst di supla ku e sospechoso i a resultá ku el a konsumí mas alkohòl ku ta pèrmití pa lei. A konfiská su reibeweis. Ademas el a haña but pa manehá sin hèlm bistí i pa manehá den direkshon prohibí.
Djaweps 14 di mei, alrededor di 3.40 or di mardugá, a detené un hòmber di inisial
S.R.S. di 35 aña di edat riba Kaya Nikiboko Nort. Un patruya a mira e sospechoso riba un motosaikel, e tabata sin hèlm bistí i a par’é pa un kòntròl. Durante e kòntròl, a hasi un tèst di supla kuné i a resultá ku el a konsumí mas alkohòl ku ta pèrmití pa lei. E sospechoso a haña prohibishon pa manehá di 2 ora.
Djaweps 14 di mei, alrededor di 3.25 or di mardugá, a detené un hòmber di inisial R.P.T. di 32 aña di edat na Kaya Kuadria. Un patruya a mira e sospechoso ta manehá un vehíkulo riba Kaya Nikiboko Nort mientras e tabatin un lus di dilanti ku no tabata funshoná. Pa e motibu aki a duna e shofùr señal pa para pa un kòntròl. E sospechoso a nenga di sigui òrdu di polis i a sigui kore. Despues di vários intento, a logra para e vehíkulo na Kaya Kuadria. Durante e kòntròl, a hasi un tèst di supla ku e sospechoso i a resultá ku el a konsumí mas alkohòl ku ta pèrmití pa lei. A konfiská su reibeweis.
Djaweps 14 di mei, alrededor di 3.20 or di mardugá, a detené un hòmber di inisial A.N.J. di 61 aña di edat na Kaya Kuadria. E sospechoso tabata manehá un outo sin plachi di number pegá dilanti i un patruya a par’é pa kòntròl. Ademas e tabata manehá ku su lusnan di emergensia (gevaarenlichten) sendé. Durante e kòntròl, e shofùr tabata mustra diferente karakterístika di un persona ku ta bou di influensia di alkohòl i a hasi un tèst di supla kuné. Despues di vários intento, el a supla korekto riba e aparato i a resultá ku el a konsumí mas alkohòl ku ta pèrmití pa lei. A konfiská reibeweis di e sospechoso.
A transportá tur sospechoso pa warda di polis pa kontinuá ku e trámitenan korespondiente. Aki nan lo haña un prosèsferbal tambe.
Detenshon pa menasa
Djabièrnè 15 di mei, alrededor di 1.30 or di mardugá, a detené un hòmber di inisial A.G.M. di 56 aña di edat riba Kaya Korona pa menasa. E sospechoso a menasá un persona ku morto. Ta investigando e kaso.
Kòntròl di velosidat
Den oranan di mèrdia di djawebs 14 di mei, a tene un kòntròl di tráfiko dirigí riba velosidat di vehíkulonan. E kòntròl a tuma lugá riba Kaya Internashonal. Ku un 'lasergun' a midi velosidat di vários outo ku tabata aserkando.
Durante e kòntròl di velosidat a kontrolá vários vehíkulo i a duna sinku(5) but.
E butnan tabata pa siguiente violashonnan:
- 3x pa surpasá e velosidat máksimo permití;
- 1x pa manehá sin seguro balido;
- 1x pa manehá sin reibeweis bálido.
KPCN lo sigui tene kòntròlnan di velosidat na vários sitio riba e isla i ta atvertí outomobilistanan pa paga tinu riba nan velosidat. Den ‘bebouwde kom’ semper e velosidat máksimo ta 40 km/ora i pafó di esaki e ta 60 km/ora.
Den oranan di mainta riba e mesun dia, a tene un kòntròl di tráfiko riba Kaya Internashonal. Aki a para i kontrolá diesdos(12) vehíkulo. Dokumentunan di tur vehíkulo tabata na òrdu.
Kòntròlnan di tráfiko ta kontinuá.
Aksidente Kaminda Sorobon
Djaweps 14 di mei, alrededor di 10 or di mainta, ‘meldkamer’ sentral a risibí notifikashon tokante un aksidente riba Kaminda di Sorobon. Na e sitio a topa ku e shofùr ku ainda tabata den e vehíkulo. E pikòp tabata kantu di kaminda i ku daño na e parti dilanti. E víktima tabata konsiente, pero e no por a splika kiko a pasa. A hasi un tèst di supla kuné i no tabatin indikashon tokante uso di alkohòl. Personal di ambulans a kontrolá e víktima i a hib’é hòspital pa mas investigashon.
Kòntròl planiá riba konsumo di alkohòl
Den oranan di mardugá di djawebs 14 di mei, Kuerpo Polisial Hulanda Karibense (KPCN) a tene un kòntròl di tráfiko dirigí riba konsumo di alkohòl riba Kaya Libertador Simon Bolivar. Durante e kòntròl, a kontrolá 12 shofùr riba uso di alkohòl ku un tèst di supla. E tèst aki ta mustra si un persona a konsumí mas alkohòl ku lei ta permití si bo ta manehá un vehíkulo. Aki a detené un persona pa manehá bou di influensia di alkohòl i a duna kuater(4) but. E butnan tabata pa manehá sin faha di seguridat bistí, manehá sin reibeweis bálido i pa manehá sin seguro bálido.
Durante e kòntròl, un shofùr a neglishá òrdu di polis pa para. E shofùr a sigui kore i kòrtiku despues polis a logra para e vehíkulo riba Kaya L.D. Gerharts. Durante e kòntròl a resultá ku e shofùr no por a mustra un reibeweis ni seguro bálido. E shofùr a haña but pa manehá sin reibeweis, sin seguro i pa neglishá òrdu di polis pa para.
Algun ratu despues, durante e kòntròl dirigí riba uso di alkohòl, a para un vehíkulo. A hasi tèst di supla ku un shofùr, un dama di inisial C.T. di 30 aña di edat, i a resultá ku el a konsumí mas alkohòl ku ta pèrmití pa lei. A detené e dama pa manehá bou di influensia di alkohòl i el a haña un prohibishon pa manehá di 4 ora
KPCN ke hala atenshon di un i tur pa konsumí alkohòl ku límite si bo ta partisipá den tráfiko. Asina bo ta prevení situashon nan peligroso pa bo mes i pa otronan. Kore un vehíkulo bou di influensia di alkohòl ta un delito. Si bo sa ku bo ta bai sali i probablemente lo disidí di bebe mas alkohòl ku e kantidat permití pa manehá, traha sita ku un persona ku por hiba bo kas seif. Bo ta manehá bou di influensia di alkohòl? E ora ei bo por haña un but, un prohibishon (temporal) pa manehá, por konfiská bo reibeweis, un kastigu di prizòn òf un kombinashon di e kastigunan aki. E peso di e kastigu ta dependé di e seriedat di e situashon.
Kada shofùr den tráfiko ta responsabel pa nan mes, e okupantenan pero tambe sobrá hendenan rondó di dje. Un persona alertá, ta konta pa dos!