Detenshonnan pa manehá bou di influensia di alkohòl
Den e wikènt ku a pasa, polis a detené dos(2) shofùr pa manehá bou di influensia di alkohòl.
Djadumingu 17 di mei, alrededor di 12.20 or di mardugá, a detené un hòmber di inisial W.M.C.Q. di 40 aña di edat riba Kaya Andres A. Emerenciana. E sospechoso tabata enbolbí den un aksidente ku solamente daño material. Konforme e maneho di ‘botsen is blazen’, a hasi un tèst di supla i a resultá ku el a konsumí mas alkohòl ku ta pèrmití pa lei. Ademas a resultá ku e no tin reibeweis.
Djasabra 16 di mei, alrededor di 10 or di anochi, a detené un hòmber di inisial R.v.V. di 35 aña di edat na Kaya Internashonal. Un patruya a para e sospechoso pa kòntròl despues di a nota komportashon no usual di manehá. Durante e kòntròl, a hasi un tèst di supla kuné i a resultá ku el a konsumí mas alkohòl ku ta permití pa lei. A konfiská reibeweis di e sospechoso.
A transportá tur sospechoso pa warda di polis pa kontinuá ku e trámitenan korespondiente. Aki nan lo haña un prosèsferbal tambe.
Detenshon pa maltrato
Djasabra 16 di mei, alrededor di 11.25 or di mainta, a detené un hòmber di inisial J.S.P. di 21 aña di edat na Kaya Shoshori pa maltrato. E sospechoso a maltrata un menor di edat. Investigashon den e kaso ta kontinuá.
Outo na kandela
Djasabra 16 di mei, alrededor di 4.20 or di mardugá, ‘meldkamer’ sentral a risibí notifikashon tokante un outo na kandela na Kaya Kalipso. Na yegada di polis a resultá ku e kandela tabata konsentrá parti patras di e vehíkulo. Polis a trata na dominá e kandela pendiente personal di brantwer ku kòrtiku despues a yega na e sitio i a paga e kandela.
Polis a tuma keho di insendio i ta investigando e kaso.
Aksidente entre dos vehíkulo
Djabièrnè 15 di mei, alrededor di 3.50 or di atardi, ‘meldkamer’ sentral a risibí notifikashon tokante un aksidente entre dos vehíkulo na altura di e krusada di Kaya Internashonal i Kaya Maximiliana Rosaria. Pa falta di dunamentu di preferensia, un outo i un pikòp a dal den otro. Ambos vehíkulo tabatin daño konsiderabel. Dokumentonan di ámbos shofùr tabata na òrdu. E shofùrnan a hasi un tèst di supla i no tabatin indikashon di uso di alkohòl. Ambulans a presentá na e sitio pa duna tratamentu médiko na un di e shofùrnan enbolbí, pero no mester a transport’é pa hòspital.