Aksidente ku detenshon pa manehá bou di influensia
Djárason 20 di mei, alrededor di 2.40 or di mardugá, ‘meldkamer’ sentral a risibí notifikashon tokante un aksidente riba Bulevar Gobernador N. Debrot. Na yegada di polis a resultá ku un outo a dal den un pilá di betòn. E outo tabatin daño konsiderabel. Personal di ambulans a hasi kòntròl médiko ku esnan enbolbí. Konforme e maneho di ‘botsen is blazen’, a hasi un tèst di supla ku e shofùr di e outo i a resultá ku el a konsumí mas alkohòl ku ta pèrmití pa lei. A detené e hòmber di inisial B.S.v.d.H. di 19 aña di edat i a konfiská su reibeweis. Ademas e lo haña un prosèsferbal tambe.
Kas na kandela
Djárason 20 di mei, alrededor di 12.15 or di mardugá, ‘meldkamer’ sentral a risibí notifikashon tokante un kas na kandela na Kaminda Djabou. Na yegada di polis a konstatá ku vlamnan di kandela a dominá e kas i tabatin bastante desaroyo di huma. E persona ku tabata den e kas, a logra sali na tempu. Personal di ambulans a presentá na e sitio pa hasi chekeo médiko ku e víktima. Polis a sera e área rondó di e kas temporalmente pa tráfiko. Brantwer a paga e kandela. Kousa di e kandela ainda no ta konosí.
A topa ku skuter prosedente di ladronisia
Djamars 19 di mei, alrededor di 6.20 or di atardi, ‘meldkamer’ sentral a risibí notifikashon tokante algun hóben den un mondi na Kaya Missouri ku tabata tofer na un skuter. Na momentu ku a gara nan, nan a kore bai. Na yegada di polis a topa ku e skuter den mondi. Despues di investigashon na e sitio a resultá ku ta trata di un skuter ku djaluna 11 di mei, deskonosínan a bai kuné for di dilanti di un kas na Kaya Sirena.
A konfiská e skuter pa mas investigashon.
Detenshon pa intento di asesinato
Djamars 19 di mei, alrededor di 12.50 or di mèrdia, a detené un hòmber di inisial J.G.E.W. di 22 aña di edat na aeropuerto pa intento di asesinato. Koninklijke Marrechaussee a kondusí e detenshon i a entregá e sospechoso na KPCN. E detenshon ta den kuadro di un investigashon andando en konekshon ku un kaso di bringamentu ku a tuma lugá 11 di òktober 2025. Investigashon den e kaso ta kontinuá.
Imágen: © KPCN
Kòntròl planiá di trafiko
Den oranan di mainta di djamars 19 di mei, polis a tene kòntròl di tráfiko na Kaya Amsterdam. Durante e kòntròl aki a para i kontrolá 33 vehíkulo i a duna shete(7) but.
E butnan tabata pa e siguiente violashonnan:
- 1x pa manehá sin reibeweis bálido;
- 6x pa manehá sin seguro bálido;
Ademas a duna sinku atvertensia pa entre otro manehá sin faha di seguridat bistí i manehá ku reibeweis ku resien a kaduká.
Kòntròlnan di tráfiko ta kontinuá!
Kiebro den diferente negoshi
Djaluna 18 di mei a drenta keho di destrukshon i kiebro den un negoshi na Kaya Industria Pariba. Deskonosínan a haña akseso na e edifisio i a bai ku sèn kèsh i un tablet di e marka Samsung.
Djaluna 18 di mei a drenta keho di destrukshon i kiebro den un kompania di hür outo na Kaya Industria Pariba. Deskonosínan a haña akseso na e edifisio i a bai ku un stul di outo pa beibi (babyzitje).
Djaluna 18 di mei a drenta keho di destrukshon i kiebro den un negoshi na Kaya Industria Pariba. Deskonosínan a haña akseso na e edifisio i a bai ku entre otro kuater(4) telefon selular di e marka Samsung i sèn kèsh.
Ta investigando e kasonan.
Ladronisia for di diferente vehíkulo
Djaluna 18 di mei a drenta keho di ladronisia for di diferente vehíkulo stashoná riba un tereno na Bulevar Julio A. Abraham. Deskonosínan a haña akseso na e tereno i a bai ku 16x tayer di outo, 16x rim di outo, 68x bout di tayer i 1x bateria di outo ku ta pertenesé na vehíkulonan di servisio di Entidat Públiko Boneiru. A laga e vehíkulonan riba blòki. Ta investigando e kaso.
Molèster di hóbennan
Djadumingu 17 di mei, alrededor di 10 or di anochi, polis a risibí notifikashon tokante muchanan menor di edat ku tabata kometé akto di baldadi den Bario Santa Rosa i kousa molèster pa habitantenan. E hóbennan tabata tira piedra i webu riba outo i kas. Ademas nan tabata kousa destrukshon na tayernan di outo. Na yegada di polis a papia fuerte ku algun di e muchanan ku a topa i algun den presensia di nan mayor. Remarkabel ta ku algun di e muchanan no tabata bou di supervishon di nan mayor, mientras tabata anochi lat. Ademas algun mayor no a mustra interes pa papia ku polis tokante komportashon di nan yu. E polis di bario lo sigui vigilá e situashon.
Imágen: © KPCN