Detenshonnan pa manehá bou di influensia di alkohòl
Den e dianan ku a pasa, polis a detené shete(7) shofùr pa manehá bou di influensia di alkohòl.
Djaluna 25 di mei, alrededor di 3 or di mardugá, a detené un hòmber di inisial
J.M.C.G. di 38 aña di edat na Kaya Karpitan. Detenshon di e sospechoso a tuma lugá despues ku polis a risibí notifikashon tokante un outo práktikamente riba kaya mientras e shofùr ta drumí. Na yegada di polis a konstatá ku e shofùr tabata na soño i e outo su motor tabata sendé. Despues di vários intento, a logra saka e sospechoso for di e vehíkulo i a detené. A detené e sospechoso pa resistí fuerte kontra su detenshon, pa no kumpli ku òrdu di polis, destrukshon i pa manehá bou di influensia di alkohòl. Ademas e sospechoso no tabatin un reibeweis ku ta bálido na Boneiru.
Djaluna 25 di mei, alrededor di 2.10 or di mardugá, a detené un hòmber di inisial E.L.F. di 36 aña di edat na Hanchi Amboina. Un patruya a mira e sospechoso ta kore zeilu ku su vehíkulo i a dun’é señal pa para. Durante e kòntròl, a hasi un tèst di supla kuné i a resultá ku el a konsumí mas alkohòl ku ta pèrmití pa lei. A konfiská su reibeweis.
Djaluna 25 di mei, alrededor di 1.25 or di mardugá, a detené un dama di inisial N.L. di 34 aña di edat riba Kaya Korona. Un patruya a mira e sospechoso riba un skuter ku tur lus pagá. Ademas e sospechoso tabata mustra komportashon peligroso di manehá i no a duna oido pa sende lus di e vehíkulo. Pa e motibu aki a par’é pa kòntròl. Durante e kòntròl, a hasi un tèst di supla ku e sospechoso i a resultá ku el a konsumí mas alkohòl ku ta pèrmití pa lei. El a haña prohibishon di manehá pa 4 ora.
Djaluna 25 di mei, alrededor di 12.45 or di mardugá, a detené un hòmber di inisial J.D.E.R. di 23 aña di edat na Kaya Bonaire. Un patruya na altura di Kaya Grandi a mira e sospechoso pasa ku velosidat haltu riba un skuter i e no tabatin hèlm bistí. Pa e motibu aki a bai su tras i a duna e shofùr señal pa para pa un kòntròl. E sospechoso a nenga di sigui òrdu di polis i a sigui kore. Finalmente e sospechoso a para e vehíkulo na altura di un establesimentu di hóreka na Kaya Bonaire. Durante e kòntròl, e shofùr tabata mustra diferente karakterístika di un persona ku ta bou di influensia di alkohòl i a hasi un tèst di supla kuné. A resultá ku e sospechoso a konsumí mas alkohòl ku ta pèrmití pa lei. Ademas el a haña but pa manehá sin reibeweis i pa manehá sin hèlm bistí.
Djasabra 23 di mei, alrededor di 4.20 or di mardugá, a detené un hòmber di inisial J.J.J.J.C. di 37 aña di edat riba Kaya Nikiboko Sùit. E sospechoso a pega soño i a aksidentá ku su vehíkulo. Konforme e maneho di ‘botsen is blazen’, a hasi un tèst di supla ku e sospechoso i a resultá ku el a konsumí mas alkohòl ku ta pèrmití pa lei. E sospechoso a haña prohibishon pa manehá di 5 ora.
Djasabra 23 di mei, alrededor di 2.35 or di mardugá, a detené un hòmber di inisial A.J.M.Z. di 26 aña di edat na Hanchi Amboina. Un patruya a para e sospechoso pa kòntròl despues di a risibí notifikashon ku e tabata manehá di forma imprudente. Durante e kòntròl, e shofùr tabata mustra diferente karakterístika di un persona ku ta bou di influensia di alkohòl i a hasi un tèst di supla kuné. Aki a resultá ku el a konsumí mas alkohòl ku ta permití pa lei. E sospechoso no tin reibeweis i despues di mas investigashon a resultá ku e ta permanesé di forma ilegal riba nos isla. A entreg’é na e Departamentu di Supervishon di Estranhero (Vreemdelingen Toezicht) di KPCN i e mesun dia a deport’é pa su pais di orígen.
Djárason 20 di mei, alrededor di 11.45 or di anochi, a detené un hòmber di inisial H.S. di 39 aña di edat na Kaya Ramona. Un patruya a para e sospechoso pa kòntròl despues di a nota komportashon peligroso di manehá. Durante e kòntròl, a hasi un tèst di supla kuné i a resultá ku el a konsumí mas alkohòl ku ta permití pa lei. E sospechoso a haña prohibishon di manehá pa 1 ora.
A transportá tur sospechoso pa warda di polis pa kontinuá ku e trámitenan korespondiente. Aki nan lo haña un prosèsferbal tambe.
Kiebro den negoshi
Djadumingu 24 di mei a drenta keho di kiebro den un negoshi di sambuyá situá na Kaya Playa Lechi. Deskonosínan a haña akseso na e edifisio, a kousa destrukshon pero probablemente no a logra bai ku nada. Esaki debí ku un kompania di seguridat a logra frustra e ladronisia. Ta investigando e kaso.
Detenshon pa kiebro i enkubrimentu
Djadumingu 24 di mei, alrededor di 11.10 or di mainta, a detené un hòmber di inisial D.E.G.Q. di 27 aña di edat na Kaya Dr. Jose G. Hernandez en konekshon ku diferente kaso di kiebro, ladronisia i enkubrimentu. Ademas a konfiská diferente artíkulo ku e sospechoso tabatin kuné, tur prosedente di ladronisia. Investigashon den e kaso ta kontinuá.
Ladronisia for di vehíkulo na sitio di sambuyá
Djasabra 23 di mei a drenta keho di ladronisia for di un outo ku tabata stashoná na altura di ‘1000 steps’ riba Kaminda Turístiko. Mientras e okupantenan tabata snòrkel, deskonosínan a bai ku entre otro un tas, dos pòtmòni ku kontenido, sèn kèsh, un telefòn di e marka Samsung i un brel di solo di e marka Micheal Kors. Ta investigando e kaso.
Ladronisia di outo
Djasabra 23 di mei a drenta keho di ladronisia di un outo koló shinishi di e marka Toyota, modèl Yaris. E outo tabata stashoná dilanti di un kompleho di apartamentu na Kaya Nikiboko Nort. Entre djabièrnè 22 di mei i djasabra 23 di mei, deskonosínan a bai ku e outo. Den oranan di mainta di djadumingu 24 di mei, polis a topa ku e vehíkulo menshoná na Kaya Blenchi. A konfiská e vehíkulo pa mas investigashon.
Detenshon pa violashon di Lei di Arma di Kandela
Djasabra 23 di mei, alrededor di 2 or di mardugá, a detené un hòmber di inisial R.H.B. di 32 aña di edat riba Kaya Grandi pa violashon di Lei di Arma di Kandela BES, destrukshon i pa no kumpli ku òrdu di polis. Detenshon di e sospechoso a tuma lugá despues ku polis a risibi notifikashon di un persona agresivo i ku probablemente arma di kandela na altura di un establesimentu di hóreka na Kaya Bonaire. Ta investigando e kaso.
Ladronisia di baiskel eléktriko
Djasabra 23 di mei a drenta keho di ladronisia di un baiskel eléktriko. Deskonosínan a bai ku un ‘fatbike’ koló pretu, di e marka Ouxi, tipo H9. E baiskel tabata stashoná na un establesimentu di hóreka na E.E.G. Bulevar.
Djabièrnè 22 di mei a drenta keho di ladronisia di un baiskel eléktriko. Deskonosínan a bai ku un ‘fatbike’ koló pretu, modèl V8. E baiskel tabata stashoná na un fèlt di futbòl na Kaminda Lac.
Ta investigando e kasonan.
Kiebro den kas
Djabièrnè 22 di mei a drenta keho di kiebro den un kas na Kaya Graciela. Deskonosínan a haña akseso na e edifisio i a bai ku entre otro sèn kèsh i un tas di kueru ku kontenido. Ta investigando e kaso.
Detenshon pa intento di ladronisia
Djabièrnè 22 di mei, alrededor di 1.50 or di mardugá, a detené un hòmber di inisial R.D.M. di 25 aña di edat na Kaya J.N.E. Craane pa intento di ladronisia. Un empleado di seguridat na un establesimentu di hóreka a gara e sospechoso na momentu ku el a purba bai ku bòter di alkohòl, sin paga. Na yegada di polis a detené.
Detenshon pa maltrato i destrukshon
Djaweps 21 di mei, alrededor di 1 or di mèrdia a detené un hòmber di inisial D.R.D.V. di 21 aña di edat na Kaya Piedra Pretu pa maltrato i destrukshon. A detené e sospechoso en konekshon ku un kaso di maltrato di un persona i destrukshon di un vehíkulo ku a tuma lugá 7 di febrüari último. Ta investigando e kaso.
A detené hòmber agresivo
Djárason 20 di mei, alrededor di 6.30 or di anochi, a detené un hòmber di inisial J.B.I.P. di 30 aña di edat na Kaya Monseigneur Nieuwindt pa insulto di un ámtenar den funshon, destrukshon i pa opstruí òrdu públiko bou di influensia di alkohòl. A detené e sospechoso despues ku polis a risibí notifikashon tokante un persona agresivo na altura di un supermerkado i e situashon tabata menasá di sali for di man.
Na yegada di polis, a hiba un kombersashon ku e sospechoso despues di kua el a pusha un agente. Aki e agente a hasi uso di su ‘pepperspray’ pa dominá e sospechoso i detené. Durante ku e sospechoso tabata den e vehíkulo polisial pendiente transportashon, el a insultá un agente polisial. Ademas el a destruí e porta i glas di e vehíkulo polisial. A transport’é pa warda di polis pa e tramité nan korespondiente.
Aksidente entre outo i skuter
Den oranan di mainta di djárason 20 di mei, ‘meldkamer’ sentral a risibí notifikashon tokante un aksidente entre un outo i un skuter na altura di e krusada di Kaya Internashonal i Kaya Maximiliana Rosaria. E outo a dal den e skuter ku tabata su dilanti. Ambos shofùr a hasi un tèst di supla i no tabatin indikashon di uso di alkohòl. Ambulans a transportá shofùr di e skuter pa hòspital pa tratamentu médiko. Ademas el a haña but pa no por a mustra un reibeweis i seguro bálido.