Aksidente entre outo i skuter
Djaluna 1 di jüni, alrededor di 8.20 or di anochi, ‘meldkamer’ sentral a risibí notifikashon tokante un aksidente ku herido na altura di Kaya Andres. A. Emerenciana i Kaya Pos di Amor. Na yegada di polis, a resultá ku ta trata di un aksidente entre un outo i un skuter. Shofùr di e skuter a resultá heridá i ambulans a transport’é pa hòspital pa tratamentu médiko. A hasi tèst di supla ku shofùr di e outo, pero no tabatin indikashon di uso di alkohòl. Pa motibu di prioridat médiko, no por a hasi tèst di supla ku shofùr di e skuter. Shofùr di e skuter a haña but pa manehá sin reibeweis i sin seguro bálido. Ademas a konfiská e skuter i hib’é warda di polis.
Ladronisia di baiskel eléktriko
Djaluna 1 di jüni a drenta keho di ladronisia di un baiskel eléktriko. Deskonosínan a bai ku un ‘fatbike’ koló pretu, marka Ouxi modèl V8 Pro Max. E baiskel tabata stashoná na altura di un akomodashon turístiko riba Bulevar Julio A. Abraham.
Djadumingu 31 di mei a drenta keho di ladronisia di un baiskel eléktriko. Deskonosínan a bai ku un ‘fatbike’ koló pretu, modèl V8. E baiskel tabata stashoná riba un sitio di parker na altura di un establesimentu di hóreka na Kaminda di Lac.
Ta investigando e kasonan.
Aksidente entre dos vehíkulo
Djaluna 1 di jüni, alrededor di 7.35 or di mainta, ‘meldkamer’ sentral a risibí notifikashon tokante un aksidente entre dos outo riba Kaya Korona. Na yegada di polis a resultá ku un pikòp i un SUV a dal frontal den otro. Ambos shofùr a resultá heridá i ambulans a transportá nan pa hòspital pa tratamentu médiko. Pa motibu di prioridat médiko, no por a hasi tèst di supla ku e shofùrnan. A resultá ku shofùr di e pikòp a trata na desviá un aksidente ku e vehíkulo ku a para su dilanti. Pero debí ku brek di e pikòp no a funshoná, el a desviá i aksidentá frontal den un SUV aserkando den direkshon kontrali. ‘Takelwagen’ a tou ámbos vehíkulo for di e sitio.
Detenshonnan pa manehá bou di influensia di alkohòl
Den e wikènt ku a pasa, polis a detené seis(6) shofùr pa manehá bou di influensia di alkohòl.
Djaluna 1 di jüni, alrededor di 3 or di mardugá, a detené un hòmber di inisial C.A.C.R. di 44 aña di edat den ‘Centrumgebied’. E sospechoso a bèk ku su vehíkulo i dal den un outo di polis. Konforme e maneho di ‘botsen is blazen’, a hasi tèst di supla ku ámbos shofùr i a resultá ku e sospechoso a konsumí mas alkohòl ku ta permití pa lei. El a haña prohibishon di manehá pa 7 ora.
Djaluna 1 di jüni, alrededor di 2.20 or di mardugá, a detené un hòmber di inisial M.A.V.S. di 41 aña di edat na Hanchi Amboina. Detenshon di e sospechoso a tuma lugá despues ku un patruya a mira un vehíkulo stashoná ku porta habrí riba e kaya menshoná. E shofùr tabata na soño i e agentenan a disidí pa lant’é. Aki a konstatá ku e tabata mustra diferente karakterístika di un persona ku ta bou di influensia di alkohòl. Pa motibu ku e agentenan no a mir’é manehá e vehíkulo, a dun’é un prohibishon di manehá por eskrito. Na momentu ku e patruya a bandoná e sitio, e sospechoso tambe a bandoná e sitio den e vehíkulo. Aki a par’é i a hasi un tèst di supla kuné. A resultá ku el a konsumí mas alkohòl ku ta pèrmití pa lei. A detené i a konfiská su reibeweis.
Djadumingu 31 di mei, alrededor di 11.25 or di anochi, a detené un hòmber di inisial E.A.d.l.S.M. di 43 aña di edat riba Kaya Papa Cornes. E sospechoso a pèrdè kòntròl i dal ku su outo den un kashi di koriente riba e kaya menshoná. El a resultá heridá i personal di ambulans a dun’é tratamentu médiko na e sitio mes. Konforme e maneho di ‘botsen is blazen’, a hasi tèst di supla ku e sospechoso i a resultá ku e tabata manehá bou di influensia. A konfiská su reibeweis.
Djasabra 30 di mei, alrededor di 3.10 or di mardugá, a detené un dama di inisial N.J.F.B. di 18 aña di edat riba Kaya Internashonal. Un patruya a mira un skuter sin lus i a duna e shofùr señal pa para pa un kòntròl rutinario. Durante kòntròl, e sospechoso tabata mustra diferente karakterístika di un persona ku ta bou di influensia di alkohòl. A hasi un tèst di supla kuné i a resultá ku el a konsumí mas alkohòl ku ta pèrmití pa lei. A konfiská reibeweis di e sospechoso.
Djasabra 30 di mei, alrededor di 12.45 or di mardugá, a detené un dama di inisial L.M.A.S.T. di 22 aña di edat den ‘Centrumgebied’. E sospechoso tabata enbolbí den un aksidente entre dos vehíkulo ku solamente daño material. Konforme e maneho di ‘botsen is blazen’, a hasi tèst di supla ku ámbos shofùr i a resultá ku e sospechoso tabata bou di influensia di alkohòl. A detené i a konfiská su reibeweis.
Djabièrnè 29 di mei, alrededor di 8.10 or di anochi, a detené un hòmber di inisial J.F.R. di 64 aña di edat riba Kaya Avelino J. (Abechi) Cecilia. Un patruya a konstatá ku e vehíkulo di e sospechoso tabata zeilu riba kaminda i ademas e tabata mustra komportashon sospechoso i peligroso di manehá. Pa e motibu aki a duna e shofùr señal pa para pa un kòntròl. Durante kòntròl, e sospechoso tabata mustra diferente karakterístika di un persona ku ta bou di influensia di alkohòl. A hasi un tèst di supla kuné i a resultá ku el a konsumí mas alkohòl ku ta pèrmití pa lei. A konfiská su reibeweis.
A transportá tur sospechoso pa warda di polis pa kontinuá ku e trámitenan korespondiente. Aki nan lo haña un prosèsferbal tambe.
Aksidente
Djadumingu 31 di mei, alrededor di 9.20 or di anochi, ‘meldkamer’ sentral a risibí notifikashon tokante un aksidente riba Bulevar Miguel A. Pourier di kua e shofùr tabata pegá den e vehíkulo. Mesora a dirigí brantwer i ambulans tambe na e sitio. Na yegada di polis a topa ku un pikòp ku basta daño material duars riba kaminda. Personal di brantwer a logra saka e shofùr for di e vehíkulo. E shofùr no tabata deseá asistensia di ambulans, e no por a mustra su reibeweis i ademas e tabata mustra diferente karakterístika di un persona ku ta bou di influensia di alkohòl. A hasi un tèst di supla kuné i a resultá ku el a konsumí mas alkohòl ku ta pèrmití pa lei. Na e momentu ei e sospechoso a opta pa bai ku ambulans pa kòntròl médiko. Despues di kòntròl médiko na hòspital, polis a opta pa bolbe hasi un tèst di supla kuné pero esaki sin e resultado deseá. Polis lo traha un prosèsferbal di e kaso.
Detenshon despues di bringamentu
Djadumingu 31 di mei, alrededor di 8 or di anochi, ‘meldkamer’ sentral a risibí notifikashon tokante bringamentu ku uso di arma blanku na un establesimentu di hóreka na Kaya Balau. Na yegada di polis a topa ku un grupo di persona. Tambe a tuma nota di un vehíkulo ku bentana destruí. Despues di investigashon mas aleu a detené dos sospechoso na e sitio. A detené e hòmber di inisial S.R.P.L. di 52 aña di edat pa menasa ku un arma i pa violashon di Lei di Arma BES. Tambe a detené un hòmber di inisial L.R.S. di 45 aña di edat pa maltrato. Investigashon den e kaso ta kontinuá.
Detenshon pa maltrato
Djadumingu 31 di mei, alrededor di 10 or di mainta, a detené un hòmber di inisial R.G.R.S. di 22 aña di edat na warda di polis pa maltrato. Investigashon den e kaso ta kontinuá.
Detenshonnan despues di tiramentu ku piedra
Djasabra 30 di mei, alrededor di 5.25 or di atardi, ‘meldkamer’ sentral a risibí notifikashon tokante problema entre bisiña na Kaya Theresa F. Ilario. Na yegada di polis a topa ku e personanan enbolbí. Despues di investigashon mas aleu a detené dos sospechoso na e sitio pa menasa i destrukshon. Ta trata di un hòmber di inisial J.J.L.J. di 37 aña di edat i un hòmber di inisial G.A.G.W. di 44 aña di edat. Investigashon den e kaso ta kontinuá.
Aksidente
Djasabra 30 di mei, alrededor di 12.50 or di mèrdia, ‘meldkamer’ sentral a risibí notifikashon tokante un aksidente riba Kaya Korona. Un outo a dal den un palu riba asera i e shofùr a resultá heridá. Ambulans a transportá e víktima pa hòspital pa tratamentu médiko. A hasi tèst di supla ku e shofùr, pero no tabatin indikashon di uso di alkohòl.
Aksidente ku skuter
Djabièrnè 29 di mei, alrededor di 6 or di atardi, un aksidente a tuma lugá na Kaya Gramèl. Pa motibunan ainda deskonosí, shofùr di un skuter a dal den muraya. Shofùr di e skuter a resultá heridá. Ademas e no tabatin hèlm bistí. Ambulans a transportá e víktima pa hòspital pa tratamentu médiko.
Detenshon pa intento di asesinato
Djaweps 28 di mei, alrededor di 4.40 or di atardi, a detené un hòmber di inisial H.N.J. di 75 aña di edat riba Bulevar Miguel A. Pourier pa menasa, intento di asesinato i intento di maltrato ku uso di un arma. Tambe a konfiská un opheto ku e sospechoso tabatin den su poder. Investigashon den e kaso ta kontinuá.
Kòntròl di velosidat
Djaweps 28 di mei a tene un kòntròl di tráfiko dirigí riba velosidat di vehíkulonan. E kòntròl a tuma lugá riba Bulevar Miguel A. Pourier. Ku un 'lasergun' a midi velosidat di vários outo ku tabata drenta Rincon i a duna shete(7) but pa surpasá e velosidat máksimo permití.
KPCN lo sigui tene kòntròlnan di velosidat na vários sitio riba e isla i ta atvertí outomobilistanan pa paga tinu riba nan velosidat. Den ‘bebouwde kom’ semper e velosidat máksimo ta 40 km/ora i pafó di esaki e ta 60 km/ora.
Imágen: © KPCN