Kòntròlnan planiá di tráfiko
Den oranan di atardi di djamars 2 di yüni, polis a tene kòntròl di tráfiko na diferente sitio. E kontrolnan tabata entre otro na E.E.G. Bulevar, Kaya Nikiboko Sùit, Kaya Andres A. Emerenciana i Kaya Amsterdam. Durante e kòntròlnan aki a para i kontrolá 49 vehíkulo i a duna 9 but. Ademas a konfiská un vehíkulo.
E butnan tabata pa e siguiente violashonnan:
-
1x pa manehá ku telefòn den man mientras ta stür;
-
4x pa manehá sin reibeweis bálido;
-
4x pa manehá sin seguro bálido.
Durante e kòntròl na Kaya Amsterdam a duna shofùr di un outo señal pa para. E shofùr a skohe pa desviá i evitá e kòntròl. Pa e motibu aki un patruya a bai tras di e vehíkulo. Riba Kaya Aruaco a duna e shofùr señal pa para pero el a sigui kore ku velosidat haltu. A surgi un persekushon kòrtiku ku a tèrminá na Kaya Zink. Aki a resultá ku e shofùr ta menor di edat i e no por a mustra un seguro bálido. A duna e shofùr but pa manehá sin reibeweis i sin seguro. Ademas a konfiská e outo i hib’é warda di polis.
Kòntròlnan di tráfiko ta kontinuá!
A konfiská arma di kandela i munishon despues di persekushon
Djadumingu 31 di mei, alrededor di 2 or di mardugá, un persekushon a tuma lugá den e bario di Tera Kòrá i Nikiboko. Un patruya a duna shofùr di un outo òrdu pa para riba Kaya Valdivia, pa motibu ku su lusnan di brek no tabata funshoná optimalmente i ademas e vehíkulo tabata kore zeilu riba kaminda. Na altura di Kaya Valdivia e outo a baha velosidat di kua dos pasahero a habri porta i trata na kore bai. Despues e vehíkulo a sigui kore ku velosidat haltu.
E patruya a sigui e outo den diferente kaya di kua e persekushon a tèrminá riba Kaminda Nieuw Amsterdam na altura di Kaya Konfó. Aki e pasahero a baha i kore bai mientras e shofùr di e vehíkulo a sigui kore. Polis a opta pa sigui ku un persekushon na pia tras di e sospechoso ku a baha for di e vehíkulo i a los tres tiru. E sospechoso a hui i pèrdè den skuridat. Polis a kondusí un investigashon na e sitio i a topa ku un arma di kandela i tambe munishon. A konfiská esakinan i mas despues a konfiská e vehíkulo na Kaminda Djabou pa mas investigashon.
Imágen: © KPCN