Detenshon pa manehá bou di influensia di alkohòl
Djárason 10 di yüni, alrededor di 4 or di mardugá, a detené un hòmber di inisial R.A.T.M. di 22 aña di edat riba Kaya Gilberto F. (Betico) Croes. Un patruya a para vehíkulo di e sospechoso pa motibu ku e tabata manehá sin lus sendé. Durante kòntròl e tabata mustra diferente karakterístika di un persona ku ta bou di influensia di alkohòl. Pa e motibu aki a hasi un tèst di supla kuné i a resultá ku el a konsumí mas alkohòl ku ta permití pa lei. A detené e sospechoso i a transport’é pa warda di polis pa kontinuá ku e trámitenan korespondiente. A konfiská su reibeweis i e lo haña un prosèsferbal tambe.
Kiebro den supermerkado
Djárason 10 di yüni a drenta keho di kiebro den un supermerkado situá na Kaya Industria. Deskonosínan a haña akseso na e supermerkado i a bai ku un montante di sèn kèsh for di un seif. Ta investigando e kaso.
Ladronisia di baiskelnan eléktriko
Djamars 9 di yüni a drenta keho di ladronisia di un baiskel eléktriko. Deskonosínan a haña akseso na un kas na Kaya Delta i bai ku un ‘fatbike’ koló pretu, modèl V8.
Djamars 9 di yüni a drenta keho di ladronisia di un baiskel eléktriko ku tabata stashoná dilanti di un kompleho di apartamentu na Kaya Sabana. Ta trata di un ‘fatbike’ koló pretu, di e marka EB2.
Djaluna 8 di yüni a drenta keho di ladronisia di un baiskel eléktriko (fatbike). Deskonosínan a bai ku e baiskel ku tabata stashoná riba tereno di un kas na Kaya Korona.
Ta investigando e kasonan.
Kòntròl planiá di tráfiko
Den oranan di mainta di djamars 9 di yüni, polis a tene kòntròl di tráfiko riba Kaya Gilberto F. (Betico) Croes. Durante e kòntròl aki a para i kontrolá diferente vehíkulo, entre otro trùk i bùs.
A duna seis(6) but pa e siguiente violashonnan:
-
Pa manehá sin reibeweis bálido;
-
Pa manehá sin seguro bálido;
-
Pa manehá sin faha di seguridat bistí.
Dos trùk no por a sigui nan ruta debí ku e shofùrnan no por a mustra dokumentunan korekto. Ademas a duna atvertensia pa manehá sin ámbos plachi di number.
Kòntròlnan di tráfiko ta kontinuá!
Ladronisia di lus LED
Djaluna 8 di yüni a drenta keho di ladronisia di un lus LED. E lus tabata pegá riba un baiskel eléktriko (fatbike). Deskonosínan a bai ku e lus LED na momentu ku e baiskel tabata stashoná riba tereno di un skol na Kaya Amsterdam. Ta investigando e kaso.