Kiebro den negoshi
Djárason 17 di yüni a drenta keho di kiebro den un negoshi na Kaya Prinsès Marie. Deskonosínan a haña akseso na e edifisio i a bai ku un lèptòp, iPad i un iPhone. Ta investigando e kaso.
A topa ku skuternan prosedente di ladronisia
Djamars 16 di yüni, alrededor di 6.40 or di anochi, ‘meldkamer’ sentral a risibí notifikashon ku den un kas bandoná na Kaya Tintorero, a topa ku skuternan probablemente prosedente di ladronisia. Na yegada di polis a resultá ku ta trata di tres skuter di e marka Kymco, modèl Agility, sin plachi di number. E skuternan tabata falta algun piesa i a konfiská nan pa mas investigashon. Riba tereno pafó di e kas polis a topa ku un otro skuter, ku tambe probablemente ta prosedente di ladronisia. A konfiská e skuter aki tambe pa mas investigashon. Despues di mas investigashon por konfirmá ku algun di e skuternan ta registrá ku un keho komo hòrtá. Investigashon den e kaso ta kontinuá.
Ladronisia di skuter
Djamars 16 di yüni a drenta keho di ladronisia di un skuter di e marka Kymco, modèl Agility ku plachi di number MF-5060. E skuter tabata stashoná riba un sitio di stashoná vehíkulo na altura di un establesimentu di hóreka riba Kaminda di Lac. Ta investigando e kaso.
Kòntròl planiá di tráfiko
Den oranan di atardi di djamars 16 di yüni, polis a tene kòntròl di tráfiko riba Kaya Korona. Aspirantenan di polis huntu ku guiadónan di práktika a para i kontrolá diesocho(18) vehíkulo. A kontrolá diferente vehíkulo ku tabata transportá garoshi (aanhangwagen) i remarkabel tabata ku e shofùrnan no tabatin e reibeweis adekuá.
A duna sinku(5) but pa e siguiente violashonnan:
-
3x pa manehá sin reibeweis bálido,
-
2x pa manehá sin seguro bálido;
Kòntròlnan di tráfiko ta kontinuá!
Detenshon pa enkubrimentu
Djamars 16 di yüni, alrededor di 10.20 or di mainta, a detené un hòmber di inisial B.F.S.F. di 29 aña di edat na Kaya Neerlandia pa enkubrimentu. A detené e sospechoso despues ku e doño legítimo di e skuter a rekonosé su skuter na momentu ku el a mira esaki. Despues di investigashon mas aleu a resultá ku e skuter ta registrá komo hòrtá despues ku a entregá un keho. A detené e sospechoso i konfiská e skuter.
Kòntròl planiá riba konsumo di alkohòl
Den oranan di anochi di djaluna 15 di yüni, polis a tene un kòntròl di tráfiko dirigí riba konsumo di alkohòl riba Kaya Nikiboko Nort. Durante e kòntròl, a kontrolá 38 shofùr riba uso di alkohòl ku un tèst di supla. E tèst aki ta mustra si un persona a konsumí mas alkohòl ku lei ta permití si bo ta manehá un vehíkulo. A duna un shofùr atvertensia pa motibu ku el a konsumi alkohòl i manehá pero e no a surpasá e limite permití pa lei.
A hasi tèst di supla ku un otro shofùr, un hòmber di inisial J.G.F.H. di 53 aña di edat, i a resultá ku el a konsumí mas alkohòl ku ta pèrmití pa lei. A detené pa manehá bou di influensia di alkohòl i el a haña un prohibishon pa manehá di 4 ora
KPCN ke hala atenshon di un i tur pa konsumí alkohòl ku límite si bo ta partisipá den tráfiko. Asina bo ta prevení situashon nan peligroso pa bo mes i pa otronan. Kore un vehíkulo bou di influensia di alkohòl ta un delito. Si bo sa ku bo ta bai sali i probablemente lo disidí di bebe mas alkohòl ku e kantidat permití pa manehá, traha sita ku un persona ku por hiba bo kas seif. Bo ta manehá bou di influensia di alkohòl? E ora ei bo por haña un but, un prohibishon (temporal) pa manehá, por konfiská bo reibeweis, un kastigu di prizòn òf un kombinashon di e kastigunan aki. E peso di e kastigu ta dependé di e seriedat di e situashon.
Kada shofùr den tráfiko ta responsabel pa nan mes, e okupantenan pero tambe sobrá hendenan rondó di dje. Un persona alertá, ta konta pa dos!
Aksidente entre garoshi i outo
Djaluna 15 di yüni, alrededor di 3.50 or di atardi, ‘meldkamer’ sentral a risibí notifikashon tokante un aksidente ku herido na Hanchi Amboina. Na yegada di polis a resultá ku un pikòp tabata trèk un garoshi (aanhangwagen) i e hak a kibra. Pa e motibu aki e garoshi a dal den un outo ku tabata aserkando for di direkshon kontrali. Shofùr di e outo i un pasahero a resultá heridá i ambulans a transportá ámbos pa hòspital pa tratamentu médiko. A hasi un test di supla ku shofr di e pikòp pero no tabatin indikashon tokante uso di alkohòl. Ademas shofùr di e pikòp a haña but pa manehá ku un reibeweis ku no ta bálido.