Detenshon pa manehá bou di influensia di alkohòl
Djabièrnè 19 di yüni, alrededor di 2.50 or di mardugá, a detené un dama di inisial J.E.D.D. di 21 aña di edat riba Kaya Amsterdam pa manehá bou di influensia di alkohòl. A para vehíkulo di e sospechoso pa motibu ku e tabata mustra komportashon sospechoso di manehá i tabata falta un lus patras. Durante e kòntròl a hasi un tèst di supla kuné i a resultá ku el a konsumí mas alkohòl ku ta pèrmití pa lei. A detené e sospechoso i a transport’é pa warda di polis pa kontinuá ku e trámitenan korespondiente. El a haña un prohibishon di manehá pa 4 ora i e lo haña un prosèsferbal tambe.
Outo na kandela
Djaweps 18 di yüni, alrededor di 9.15 or di anochi, ‘meldkamer’ sentral a risibí notifikashon tokante un outo na kandela den kurá di un kas na Tanki Matrimonio. Na yegada di polis i brantwer, a resultá ku e kandela tabata konsentrá parti dilanti di e vehíkulo, na altura di e bateria. Brantwer a paga e kandela. No tabatin herido. Korto sirkuito probablemente ta kousa di e kandela.
Peaton heridá despues di insidente
Djaweps 18 di yüni, alrededor di 9 or di anochi, a drenta notifikashon tokante un insidente riba Kaya Gilberto F. (Betico) Croes. A resultá ku un peaton a trapa riba un opheto di heru riba asera i resultá heridá. Mester a pidi asistensia di brantwer pa korta e opheto i liberá e viktima. Personal di ambulans a duna e víktima asistensia médiko i despues a transport’é pa hòspital pa tratamentu médiko mas avansá.
Shofùr di skuter heridá
Djaweps 18 di yüni, alrededor di 6 or di atardi, ‘meldkamer’ sentral a risibí notifikashon tokante un insidente riba Kaya Internashonal. Shofùr di un skuter a slep i kai. Pa e motibu aki el a resultá heridá. Ambulans a transportá e víktima pa hòspital pa tratamentu médiko. A hasi tèst di supla ku e víktima i no tabatin indikashon tokante uso di alkohòl. Polis a dirigí tráfiko temporalmente na e sitio.
Vários detenshon pa maltrato
Djaweps 18 di yüni, alrededor di 6.10 or di atardi, a detené un hòmber di inisial R.L.F. di 26 aña di edat na Kaya Petra pa maltrato. E sospechoso a maltratá un dama.
Djárason 17 di yüni, alrededor di 10.35 or di anochi, a detené un hòmber di inisial S.V. di 37 aña di edat na Bario Mexico pa maltrato. E sospechoso a maltratá un dama i bai ku su telefòn.
Djamars 16 di yüni, alrededor di 9.15 or di mainta, a detené un dama di inisial M.G.V.J. di 47 aña di edat na Kaya Linda pa maltrato severo. E sospechoso a maltratá un otro dama severamente.
Ta investigando e kasonan.
Kòntròl planiá di tráfiko
Den oranan di mainta di djaweps 18 di yüni, aspirantenan di polis huntu ku guiadónan di práktika a tene un kòntròl planiá di tráfiko riba Bulevar Julio A. Abraham. A para i kontrolá diessinku(15) vehíkulo i a duna dos but. Ambos but tabata pa manehá sin reibeweis bálido.
Kòntròlnan di tráfiko ta kontinuá!
Detenshon despues di kiebro den negoshi
Djaweps 18 di yüni, alrededor di 3.15 or di mardugá, ‘meldkamer’ sentral a risibí notifikashon tokante kiebro den un kompania di hür outo na Kaya Industria. Despues di investigashon mas aleu, alrededor di 3.25 or di mardugá a detené un sospechoso menor di edat, un mucha hòmber di inisial R.A.W. di 16 aña di edat na Bulevar Julio A. Abraham. E sospechoso tabata kuadra ku e deskripshon duná durante e kaso di kiebro menshoná. Investigashon den e kaso ta kontinuá.
Detenshon despues di persekushon
Djárason 17 di yüni, alrededor di 9 or di anochi, un patruya a tuma nota di un bròmer riba Hanchi Amboina i e shofùr no tabatin un hèlm bistí. A bai su tras i a tuma nota ku e bròmer no tabatin lus sendé i tampoko un plachi di number.
Pa motibu di e violashonnan menshoná, e agentenan a disidí pa aktivá e lusnan óptiko di e vehíkulo polisial (zwaailicht) i zonido di sirena pa para e shofùr pa un kòntròl. E shofùr a neglishá e señal pa para i a sigui kore. E patruya a kore tras di e bròmer den diferente kaya i a duna e shofùr vários biaha òrdu pa para. Finalmente e patruya a logra blòkia e bròmer.
E shofùr no por a identifiká su mes i ademas el a duna vários biaha un nòmber falsu. Alrededor di 9.10 or di anochi a detené e sospechoso, un mucha hòmber di inisial D.F.M.V. di 15 aña di edat pa no duna oido na òrdu di polis. A konfiská e bròmer i ademas e lo haña un prosèsferbal pa tur infrakshon kometé.
Ladronisia di hèrmènt for di kurá di kas
Djamars 16 di yüni, alrededor di 12.15 or di mèrdia, ‘meldkamer’ sentral a risibí notifikashon tokante dos persona, ámbos na pretu i ku kara tapá, ku a kaba bula sali for di un kurá di kas na Kaya Venus na Belnem. Ambos persona tabatin kaha di hèrmènt den man i a kore drenta mondi. Despues di investigashon mas aleu a resultá ku e sospechosonan a drenta e kurá di kas i bai ku kahanan di hèrmènt for di den un kuartu ku no tabata na lòk. Despues di búskeda den mondi, a topa ku e kahanan di hèrmènt ku e sospechosonan a bai kuné algun ratu promé.