Atrako armá
Djamars 23 di yüni, alrededor di 10.25 or di anochi, ‘meldkamer’ sentral a risibí notifikashon tokante un atrako armá riba Kaminda di Lagun. Dos persona máskulino, probablemente entre 17 pa 18 aña di edat di kua unu ku arma di kandela den man, a sorprendé un siklista i bou di menasa a bai ku su baiskel eléktriko(fatbike), telefòn, pòtmòni i su tas. Despues e sospechosonan a bandoná e sitio na pia i e otro riba e baiskel den direkshon ost.
KPCN ta pidi un i tur ku por a mira, tende òf sa algu tokante e atrako armá aki pa yama 715-8000 òf e liña di tep anónimo 9310.
Investigashon den e kaso ta andando.
Detenshon pa maltrato i pa manehá bou di influensia
Djamars 23 di yüni, alrededor di 6.20 or di atardi, ‘meldkamer’ sentral a risibí notifikashon tokante un dama ku a bula for di un vehíkulo riba Kaya Nikiboko Sùit i a resultá heridá. Na yegada di polis a resultá ku e víktima tabata pasahero di un vehíkulo i probablemente despues di un diskushon i maltrato, a bula for di outo mientras esaki tabata kore ainda. Personal di ambulans a duna e víktima tratamentu médiko i a transport’é pa hòspital. Na e sitio a detené e shòfur di e vehíkulo, e hòmber di inisial W.J.K. di 52 aña di edat pa manehá bou di influensia di alkohòl i pa maltrato.
Investigashon den e kaso ta kontinuá.
Detenshon pa manehá bou di influensia di alkohòl
Djamars 23 di yüni, alrededor di 5.40 or di atardi, a detené un dama di inisial E.M.D.W. di 33 aña di edat riba Kaya Korona pa manehá bou di influensia di alkohòl. E sospechoso a dal ku su outo tras di un otro outo. Konforme e maneho di ‘botsen is blazen’, a hasi tèst di supla ku ámbos shofùr i a resultá ku e sospechoso a konsumí mas alkohòl ku ta pèrmití pa lei. A detené i a hib’é warda di polis pa kontinuá ku e trámitenan korespondiente. A konfiská su reibeweis i e lo haña un prosèsferbal tambe.
Kòntròl planiá di tráfiko
Den oranan di atardi di djamars 23 di yüni, polis a tene kòntròl di tráfiko riba Kaminda La Union. Aspirantenan di polis huntu ku guiadónan di práktika a para i kontrolá dieskuater(14) vehíkulo.
A duna diesun(11) but pa e siguiente violashonnan:
-
5x pa manehá sin faha di seguridat bistí;
-
2x pa manehá sin seguro bálido;
-
1x pa manehá sin reibeweis bálido;
-
1x pa manehá sin hèlm bistí;
-
1x pa manehá mientras no tin bista kompletu for di stul di shofùr;
-
1x pa manehá sin ámbos plachi di number.
Durante e kòntròl a konfiská un machete. Tambe a detené un shofùr pa manehá bou di influensia di alkohòl. A hasi un tèst di supla kuné na e sitio debí ku e tabata mustra diferente karakterístika di un persona ku ta bou di influensia di alkohòl. E tèst a duna indikashon ku tin uso di alkohòl. Na warda di polis a hasi un análisis di rosea i a resultá ku e shofùr a konsumí alkohòl pero no a surpasá e límite pèrmití pa lei. A lag’é den libertat.
Kòntròlnan di tráfiko ta kontinuá!
Kiebro den establesimentu di hóreka
Djaluna 22 di yüni a drenta keho di kiebro den un establesimentu di hóreka na Kaya Korona. Deskonosínan a haña akseso na e edifisio i a bai ku entre otro un televishon ’40 inch’ di e marka Samsung i diferente bebida alkohóliko. Ta investigando e kaso.
Aksidente entre dos outo
Djaluna 22 di yüni, alrededor di 8.45 or di anochi, ‘meldkamer’ sentral a risibí notifikashon tokante un aksidente entre dos outo na altura di e krusada di Kaya Internashonal i Kaya Maximiliana (Chiana) Rosario. Pa falta di dunamentu di preferensia, e dos vehíkulonan a dal den otro. A hasi tèst di supla ku ámbos shofùr i no tabatin indikashon tokante uso di alkohòl. Personal di ambulans a hasi chekeo médiko ku ámbos shofùr, pero no mester a transportá ningun persona pa hòspital. Un di e shofùrnan a haña but pa manehá sin reibeweis i sin seguro bálido.
Imágen: © KPCN