Aksidentenan entre skuter i outo
Djabièrnè 26 di yüni, alrededor di 7.40 or di mainta, ‘meldkamer’ sentral a risibí notifikashon tokante un aksidente entre un skuter i un outo riba Kaya Nikiboko Sùit. Na yegada di polis a resultá ku e skuter a dal patras di e outo. Konforme e maneho di ‘botsen is blazen’, a hasi tèst di supla ku ámbos shofùr i no tabatin indikashon tokante uso di alkohòl. Ambulans a transportá shofùr di e skuter pa hòspital pa tratamentu médiko mas avansá.
Djabièrnè 26 di yüni, alrededor di 8.10 or di mainta, ‘meldkamer’ sentral a risibí notifikashon tokante un aksidente entre un skuter i un outo riba E.E.G. Bulevar. Shofùr di e skuter no a wanta brek na tempu i a dal patras di e outo. Konforme e maneho di ‘botsen is blazen’, a hasi tèst di supla ku ámbos shofùr i no tabatin indikashon tokante uso di alkohòl. Ambulans a transportá shofùr di e skuter pa hòspital pa tratamentu médiko. Mas aleu shofùr di e skuter a haña but pa manehá sin seguro bálido. Polis a dirigi tráfiko na e sitio.
Detenshon i entrada hudisial pa violashon di Lei di Opio
Den oranan di mardugá di djabièrnè 26 di yüni, e Grupo di Tarea Spesial (Groep Bijzondere Opdrachten, GBO), a detené un hòmber di inisial G.A.B. di 49 aña di edat na Kaya Maria pa violashon di Lei di Opio BES. Detenshon di e sospechoso ta relashoná ku e investigashon andando di kua durante entrada hudisial na un kas na Kaya Maria riba djadumingu 14 di yüni, a topa ku un kantidat di supstansia narkótiko. Despues ku a detené e sospechoso, reshèrshinan di KPCN a tene entrada hudisial na e kas na e kaya menshoná i a konfiská artíkulonan relevante pa e investigashon. Investigashon den e kaso ta kontinuá.
Detenshon pa no sigui òrdu di polis i buracheria públiko
Djabièrnè 26 di yüni, alrededor di 2 or di mardugá, un patruya a konstatá ku tabatin bringamentu entre algun persona na altura di un establesimentu di hóreka na Kaya Bonaire. Aki polis a kita algun persona for di otro pa evitá ku nan ta bringa ku otro. Despues e situashon a kalma i e multitut a kuminsá bandoná e sitio. Mientrastantu a konstatá ku un hòmber na diferente okashon a trata na buska problema ku un otro hòmber. Pa evitá ku e situashon ta sali for di man, a duna e hòmber òrdu diferente biaha pa bandoná e sitio. E sospechoso no a sigui òrdu di polis pa bandoná e sitio i a detené. Alrededor di 3 or di mardugá, a detené e hòmber di inisial J.G.M. di 51 aña di edat na Kaya Bonaire pa no sigui òrdu di polis i buracheria públiko. E hòmber a purba bringa ku polis, a resistí kontra su detenshon, a dirigí menasa den direkshon di un agente i a intentá pa kita e arma di kandela for di e agente. Esaki no a logra i e arma a keda seif den su 'holster'.
Ladronisia for di algun kònteiner
Djaweps 25 di yüni a drenta keho di destrukshon i ladronisia for di tres diferente kònteiner riba tereno di un konstrukshon situá na Bulevar Gobernador N. Debrot. Deskonosínan a haña akseso na e kònteinernan i bai ku diferente hèrmènt. Ta investigando e kaso.
Kiebro na garashi di outo
Djárason 24 di yüni a drenta keho di kiebro na un garashi situá na Kaya Nikiboko Nort. Deskonosínan a haña akseso na e tereno i a bai ku un kantidat di hèrmènt i mashin. Ta investigando e kaso.
Entrada hudisial i detenshon
Den oranan trempan di mainta di djaweps 25 di yüni, e Grupo di Tarea Spesial (GBO) i reshèrshinan di KPCN a tene entrada hudisial na un kas na Kaya Cauca. E entrada hudisial ta relashoná ku e investigashon tokante e kaso di atrako armá ku a tuma lugá na ofisina di pòst riba 6 di mei 2025. Relashoná ku e investigashon andando, a detené un hòmber di inisial D.L.L. di 30 aña di edat. Tambe a konfiská artíkulonan relevante pa e investigashon. Investigashon den e kaso ta kontinuá.