Aksidente
Djadumingu 28 di yüni, alrededor di 2.25 or di atardi, ‘meldkamer’ sentral a risibí notifikashon tokante un aksidente riba Kaya Internashonal. Pa motibu ainda deskonosí, un shofùr a resultá ku su pikòp den mondi. A hasi tèst di supla ku e shofùr i no tabatin indikashon tokante uso di alkohòl. Ambulans a transportá tur tres okupante di e vehíkulo, di kua un menor di edat, pa hòspital pa tratamentu i chekeo médiko.
Detenshonnan pa manehá bou di influensia di alkohòl
Den e wikènt ku a pasa, polis a detené dos(2) shofùr pa manehá bou di influensia di alkohòl.
Djadumingu 28 di yüni, alrededor di 2.45 or di mardugá, a detené un hòmber di inisial A.J.A. di 29 aña di edat riba Kaya Gilberto F. (Betico) Croes. Un patruya a para e shofùr pa kòntròl despues ku a konstatá ku e tabata kore zeilu ku su vehíkulo. Durante kòntròl, e sospechoso tabata mustra diferente karakterístika di un persona ku ta bou di influensia di alkohòl. A hasi un tèst di supla kuné i a resultá ku el a konsumí mas alkohòl ku ta pèrmití pa lei. A konfiská su reibeweis.
Djasabra 27 di yüni, alrededor di 12.15 or di mardugá, a detené un hòmber di inisial M.A.R.N. di 76 aña di edat na Kaya Krabe. E sospechoso a dal ku su pikòp den un palu di lus. Konforme e maneho di ‘botsen is blazen’, a hasi tèst di supla kuné i a resultá ku e sospechoso a konsumí mas alkohòl ku ta pèrmití pa lei. A konfiská su reibeweis.
A transportá ámbos sospechoso pa warda di polis pa kontinuá ku e trámitenan korespondiente. Aki nan lo haña un prosèsferbal tambe.
Detenshon pa destrukshon
Djasabra 27 di yüni, alrededor di 4.50 or di mardugá, a detené un hòmber di inisial J.S.L. di 28 aña di edat na Kaya Carlos A. Nicolaas pa destrukshon. E sospechoso a destruí glas di un outo. Investigashon den e kaso ta kontinuá.