Detenshonnan pa maltrato
Djárason 1 di yüli, alrededor di 6.10 or di mainta, a detené un hòmber di inisial W.A.O. di 41 aña di edat na Kaya Rafaela pa maltrato.
Djamars 30 di yüni, alrededor di 7.10 or di anochi, a detené un hòmber di inisial S.V. di 37 aña di edat na Kaminda Yato Bako pa maltrato.
Ta investigando ámbos kaso.
Detenshonnan pa manehá bou di influensia di alkohòl
Den e dianan ku a pasa, polis a detené dos(2) shofùr pa manehá bou di influensia di alkohòl.
Djárason 1 di yüli, alrededor di 4.35 or di mardugá, a detené un dama di inisial I.P.P. di 57 aña di edat den ‘centrumgebied’. Un patruya a konstatá ku e sospechoso tabata kore zeilu riba su skuter. Durante kòntròl, e sospechoso tabata mustra diferente karakterístika di un persona ku ta bou di influensia di alkohòl. A hasi un tèst di supla kuné i a resultá ku el a konsumí mas alkohòl ku ta pèrmití pa lei. A konfiská su reibeweis. Esaki ta e di tres(3) biaha ku ta detené e sospechoso pa manehá bou di influensia di alkohòl i a konfiská su skuter.
Djárason 1 di yüli, alrededor di 2.35 or di mardugá, a detené un dama di inisial M.P. di 19 aña di edat den ‘centrumgebied’. Un patruya a para un gòlfkar ku kuater pasahero den ‘centrumgebied’. E gòlfkar tabata kore den direkshon prohibí. A hasi tèst di supla ku e shofùr i a resultá ku e sospechoso a konsumí mas alkohòl ku ta pèrmití pa lei. El a haña un prohibishon di manehá pa 6 ora.
A transportá ámbos sospechoso pa warda di polis pa kontinuá ku e trámitenan korespondiente. Aki nan lo haña un prosèsferbal tambe.
Outo ta dal den muraya
Djaluna 29 di yüni, alrededor di 10 or di mainta, ‘meldkamer’ sentral a risibí notifikashon tokante un outo ku a dal den muraya di un kompania na Kaya Industria i e shofùr a resultá heridá. Na yegada di polis a resultá ku un muraya di kurá i e outo tabatin daño. Ambulans a transportá e shofùr pa hòspital pa tratamentu médiko. Pa motibu di prioridat médiko, no por a hasi un tèst di supla ku e shofùr. Tur dokumentu nesesario tabata na òrdu.