‘Hit and run’ ku herido
Djaweps 2 di yüli, alrededor di 10.25 or di anochi, ‘meldkamer’ sentral a risibí notifikashon tokante un aksidente riba Bulevar Gobernador N. Debrot. Shofùr di un skuter a resultá heridá despues ku un vehíkulo a alkans’é i a sigui kore despues di e aksidente. Ambulans a transportá e víktima pa hòspital pa tratamentu médiko.
Bo a mira algu òf bo tin mas informashon tokante e kaso di ‘hit & run’ aki? E ora ei tuma kontakto ku polis via 715 8000, 911 òf via e liña di tep anónimo 9310.
Detenshon pa menasa ku morto
Djaweps 2 di yüli, alrededor di 9.25 or di anochi, a detené un hòmber di inisial G.F.T. di 42 aña di edat na Kaya Rafaela pa menasa ku morto. Investigashon den e kaso ta kontinuá.
Tres detenshon despues di persekushon i konfiskashon di arma
Den mardugá di djaweps 2 di yüli, polis a detené tres sospechoso despues di un persekushon ku a kuminsá riba e sitio di stashoná outo di un supermerkado na Kaya Industria. Despues di a sigui e outo den algun kaya, e persekushon a terminá bèk riba Kaya Industria.
Un patruya a konstatá un vehíkulo sospechoso stashoná na e sitio i a opta pa hasi un kòntròl. Na momentu ku e patruya a yega mas serka, e shofùr a start e vehíkulo i a kore bai. A dun’é na diferente okashon señal pa para pero e shofùr a neglisha e òrdu i a hisa velosidat. Esaki a kondusí na un persekushon den algun kaya i finalmente polis a logra blòkia e outo.
Na momentu ku a para e vehíkulo, a detené e shofùr pa no sigui òrdu di polis. Durante e detenshon, polis a haña un tas ku un arma di kandela den dje. Mesora a detené e otro okupantenan den e outo, tur pa violashon di Lei di Arma di Kandela BES.
Ta trata di e shofùr, un hòmber di inisial J.G.S. di 26 aña di edat, un hòmber di inisial B.E.E. di 37 aña di edat i un dama di inisial J.A.H., tambe di 26 aña di edat. A konfiská e outo i tambe diferente otro artíkulo ku a topa den e vehíkulo, entre otro supstansia nárkotiko.
Ademas e shofùr tabata manehá bou di influensia di alkohòl i e lo pone esaki tambe aserka den su prosèsferbal. Despues di investigashon di e departamentu forénsiko di KPCN, a resultá ku ta trata di un arma di airu. Investigashon den e kaso ta kontinuá.
Polis ta sigui komprometé na garantisá seguridat riba nos isla i ta hasi un yamada na kualke persona ku tin informashon adishonal tokante poseshon ilegal di arma di kandela, pa mèldu esaki via 911 òf e number di tep anónimo 9310. Bo notifikashon por skapa bida.