Detenshonnan pa manehá bou di influensia di alkohòl
Den e wikènt ku a pasa, polis a detené tres(3) shofùr pa manehá bou di influensia di alkohòl.
Djaluna 6 di yüli, alrededor di 4 or di mardugá, a detené un hòmber di inisial D.D.S. di 23 aña di edat riba Kaya Korona. E sospechoso a dal ku su pikòp den un outo. Konforme e maneho di ‘botsen is blazen’, a hasi tèst di supla kuné i a resultá ku el a konsumí mas alkohòl ku ta pèrmití pa lei. A konfiská su reibeweis.
Djadumingu 5 di yüli, alrededor di 8.20 or di anochi, a detené un hòmber di inisial M.G.P. di 51 aña di edat riba Kaya Dr. Jose Girigorio Hernandez. Un patruya a duna e shofùr señal pa para despues ku a konstatá ku e tabata zeilu ku su vehíkulo riba kaminda. Durante kòntròl, e sospechoso tabata mustra karakterístika di un persona ku ta bou di influensia di alkohòl. A hasi un tèst di supla kuné i a resultá ku el a konsumí mas alkohòl ku ta pèrmití pa lei. A konfiská su reibeweis.
Djadumingu 5 di yüli, alrededor di 3.20 or di mardugá, a detené un hòmber di inisial R.F.B. di 37 aña di edat riba Kaminda Lagun. E sospechoso a dal ku su pikòp den un bòrchi di tráfiko. Konforme e maneho di ‘botsen is blazen’, a hasi tèst di supla kuné i a resultá ku e sospechoso a konsumí mas alkohòl ku ta pèrmití pa lei. Ademas e sospechoso no tin reibeweis i no por a mustra dokumentunan di seguro. Pa e violashonnan aki, el a haña but.
A transportá tur sospechoso pa warda di polis pa kontinuá ku e trámitenan korespondiente. Aki nan lo haña un prosèsferbal tambe.
Outo na kandela
Djaluna 6 di yüli, alrededor di 4 or di mardugá, ‘meldkamer’ sentral a risibí notifikashon tokante un outo na kandela na un kas na Mamparia Kutu. Na yegada di polis a resultá ku a logra paga e kandela ku un slan di awa. Esaki a evitá ku e kandela a ekspandé. E daño tabata mínimo i tabata konsentrá parti patras di e vehíkulo. For di investigashon mas aleu a resultá ku ta trata di un kaso di insendio. Ta investigando e kaso.
Kiebro den establesimentu di hóreka
Djadumingu 5 di yüli a drenta keho di kiebro i ladronisia for di un establesimentu di hóreka situá na Kaya Aurora. Deskonosínan a haña akseso na e edifisio i a bai ku dos televishon di e marka TCL i Oska, un telefòn di e marka Samsung Galaxy i bebidanan alkohóliko. Ta investigando e kaso.
Detenshon pa ladronisia di bòter di gas
Djasabra 4 di yüli a drenta keho di ladronisia di un bòter chikí di gas for di un kompleho di apartamentu na Kaya Papa Cornes. Relashoná ku e kaso aki, algun ratu despues riba e mesun dia, alrededor di 2.55 or di atardi, a detené un hòmber di inisial L.V.P. na Kaya Dr. Jose Girigorio Hernandez pa ladronisia. Investigashon den e kaso ta kontinuá.
Kiebro den kompania
Djasabra 4 di yüli a drenta keho di kiebro i ladronisia den un kompania na Kaya Korona. Deskonosínan a haña akseso na e edifisio i a bai ku dos ‘creditcard’ i un kaha di sèn ku kontenido. Mas despues a haña e kaha ku kontenido bèk. Ta investigando e kaso.
Detenshon pa ladronisia i destrukshon
Djasabra 4 di yüli, alrededor di 5.30 or di atardi, a detené un hòmber di inisial L.V.P. na warda di polis pa ladronisia i destrukshon. E sospechoso a destruí un kámara di seguridat na un supermerkado i a bai ku un lus solar. Investigashon den e kaso ta kontinuá.