Outo ta dal den palu di lus
Djarason 8 di yüli, alrededor di 6.45 or di mainta, ‘meldkamer’ sentral a risibí notifikashon tokante un aksidente riba Kaminda Gurubu. Na yegada di polis a resultá ku un outo, pa motibu ainda deskonosí, a dal den un palu di lus. Personal di ambulans a presentá na e sitio pa duna e shofùr asistensia médiko pero no mester a transport’é pa hòspital. Konforme e maneho di ‘botsen is blazen’ a hasi tèst di supla ku e shofùr pero no tabatin indikashon tokante uso di alkohòl.
A konsekuensia di e impakto, e palu di lus a kèntel riba kaminda. Pa motibu di seguridat, polis a sera e kaya pa e instansia konserní por a repará e palu di lus i hasi e trabounan nesesario.
Detenshonnan pa manehá bou di influensia di alkohòl
Den e dianan ku a pasa, polis a detené tres(3) shofùr pa manehá bou di influensia di alkohòl.
Djamars 7 di yüli, alrededor di 11.45 or di anochi, a detené un hòmber di inisial K.F.S.G. di 31 aña di edat na Kaya Veenendaal. E sospechoso a dal ku su outo den un kurá. Konforme e maneho di ‘botsen is blazen’, a hasi tèst di supla kuné i a resultá ku el a konsumí mas alkohòl ku ta pèrmití pa lei. Ademas e sospechoso no tin reibeweis i no por a mustra dokumentunan di seguro. Pa e violashonnan aki, el a haña but.
Djamars 7 di yüli, alrededor di 3.55 or di mardugá, a detené un dama di inisial S.F.E. di 41 aña di edat na Kaya Skandèlchi. Un patruya a para e sospechoso den su vehíkulo pa kòntròl. E tabata mustra karakterístikanan di un persona ku ta bou di influensia di alkohòl i pa e motibu aki a hasi un tèst di supla kuné. A resultá ku el a konsumí mas alkohòl ku ta pèrmití pa lei. Despues di investigashon mas aleu a resultá ku e sospechoso no por a mustra un reibeweis pa motibu ku anteriormente a konfiská esaki pa e mesun violashon menshoná. Esaki ta e di tres biaha ku ta detené e sospechoso pa manehá bou di influensia di alkohòl.
Djaluna 6 di yüli, alrededor di 8.20 or di anochi, a detené un hòmber di inisial E.U.M. di 44 aña di edat na Hanchi Amboina. E sospechoso tabata enbolbí den un aksidente ku solamente daño material entre dos vehíkulo. Konforme e maneho di ‘botsen is blazen’, a hasi tèst di supla ku ámbos shofùr i a resultá ku e sospechoso a konsumí mas alkohòl ku ta pèrmití pa lei. A konfiská su reibeweis.
A transportá tur sospechoso pa warda di polis pa kontinuá ku e trámitenan korespondiente. Aki nan lo haña un prosèsferbal tambe.
Kiebro den establesimentu di hóreka
Den oranan di mardugá di djamars 7 di yüli, a drenta notifikashon tokante kiebro i ladronisia den un establesimentu di hóreka situá na Kaya Korona. Deskonosínan a haña akseso na e edifisio i probablemente a bai ku sèn kèsh i bebidanan alkohóliko. Ta investigando e kaso.