Ladronisia for di minimarket
Djawebs 9 di yüli a drenta keho di ladronisia for di un minimarket situá na Kaya Caribe. Un persona deskonosí a drenta e establesimentu i a bai ku algun merkansia sin paga. Ta investigando e kaso.
Entrada hudisial i detenshon pa violashon di Lei di arma di kandela
Den oranan di mèrdia di djawebs 9 di yüli, e Grupo di Tarea Spesial(GBO) i rishèrshi a tene entrada hudisial na un kas na Kaya Dradu. Durante e entrada hudisial, a detené un hòmber di inisial H.E.W. di 22 aña di edat pa Violashon di Lei di Arma di Kandela BES. En konekshon ku e investigashon, a konfiská diferente artíkulo relevante pa e investigashon. Investigashon den e kaso ta kontinuá.
Ladronisia for di vehíkulo na sitio di sambuyá
Djawebs 9 di yüli a drenta keho di ladronisia for di un pikòp stashoná na altura di e sitio di sambuyá na kasnan di katibu hel ‘red slaves’ situá riba E.E.G. Bulevar. Mientras e okupantenan tabata sambuyá, deskonosínan a bai ku entre otro un tas di bich di e marka Longechamps, paña, sèrbètè, slòf, un pòtmòni di e marka Offgrid i diferente karchi. Ta investigando e kaso.