Detenshon pa maltrato ku un arma
Djadumingu 12 di yüli, alrededor di 6 or di atardi, a detené un hòmber di inisial C.E.R.H. di 50 aña di edat na Kaya Aripuana pa maltrato ku un arma. E sospechoso a maltratá un otro hòmber ku un opheto. Ambulans a transportá e víktima pa hòspital pa tratamentu médiko. Investigashon den e kaso ta kontinuá.
Kòntròl planiá di tráfiko
Den oranan di mainta di djadumingu 12 di yüli, polis a tene kòntròl di tráfiko na dos sitio. Ta trata di un kòntròl na Kaya Internashonal i e otro riba E.E.G. Bulevar. Durante e kòntròl a para i kontrolá total bintitres(23) vehíkulo.
A duna kuater(4) but pa e siguiente violashonnan:
-
2x pa manehá sin reibeweis bálido:
-
1x pa manehá sin seguro bálido;
-
1x pa manehá sin faha di seguridat bistí.
Kòntròlnan di tráfiko ta kontinuá!
Detenshon despues di molèster ku ‘fatbike’
Den oranan lat di atardi di djasabra 11 di yüli, ‘meldkamer’ sentral a risibí notifikashon tokante molèster di hóbennan riba ‘fatbike’ na altura di un parke di mucha na Playa Pabou. Despues a drenta otro notifikashon tokante molèster di e mesun grupo di hóben na altura di parke Wilhelmina. Na yegada di polis, e hóbennan no tabata na e sitio. Di forma proaktivo, a para i kontrolá diferente hóben ku a topa riba ‘fatbike’den e área. Ademas a papia fuerte ku tur riba nan komportashon i pa pasa e mensahe pa otronan. Durante kòntròl di un ‘fatbike’ na Kaya Libertador Simon Bolivar, a resulta ku e baiskel ta prosedente di ladronisia despues ku e doño a entregá keho. A konfiská e ‘fatbike’ hòrtá i a detené e hóben, un mucha hòmber di C.Z.P. di 16 aña di edat pa enkubrimentu.
Último tempu molèster di muchanan riba baiskel den sentro di siudat a oumentá. Molèster dor ku nan ta manehá iresponsabel den tráfiko. Entre otro kore hòp, kore na grupo grandi mei mei di kaminda, kore sin lus òf kore den multitut di hende ets.
KPCN kier enfatisá ku lo atendé di manera estrikto i si ta nesesario, lo tuma medidanan ku ta kuadra. Komo ku mayoria biaha ta trata di muchanan menor di edat, KPCN ke hasi un apelashon na mayornan tambe pa papia ku e yu tokante su komportashon i e konsekuensianan ku esaki por trese kuné. Por ehèmpel ku hasiendo esaki ta pone e seguridat di tantu otronan komo di e hóben mes na peliger.
Bo ta kousa molèster ku bo baiskel, e ora ei por kita bo baiskel i hib’é warda di polis.
Detenshonnan pa manehá bou di influensia di alkohòl
Den e wikènt ku a pasa, polis a detené dos(2) shofùr pa manehá bou di influensia di alkohòl.
Djasabra 11 di yüli, alrededor di 2.40 or di mardugá, a detené un dama di inisial M.J.J.M. di 52 aña di edat riba Kaya Lodewijk D. Gerharts. E sospechoso tabata enbolbí den un aksidente ku su outo. Konforme e maneho di ‘botsen is blazen’, a hasi tèst di supla kuné i a resultá ku el a konsumí mas alkohòl ku ta pèrmití pa lei. A konfiská su reibeweis.
Djabièrnè 10 di yüli, alrededor di 6.30 or di anochi, a detené un hòmber di inisial A.A.R. di 56 aña di edat riba Kaya Korona. Un patruya a duna e shofùr señal pa para despues ku a konstatá komportashon sospechoso di manehá. Durante kòntròl, e sospechoso tabata mustra karakterístika di un persona ku ta bou di influensia di alkohòl. A hasi un tèst di supla kuné i a resultá ku el a konsumí mas alkohòl ku ta pèrmití pa lei. El a haña prohibishon pa manehá di 4 ora.
A transportá tur sospechoso pa warda di polis pa kontinuá ku e trámitenan korespondiente. Aki nan lo haña un prosèsferbal tambe.
Kayak ku dos persona ta bòltu den laman
Djabièrnè 10 di yüli, alrededor di 12.15 or di mèrdia, ‘meldkamer’ sentral a risibí notifikashon tokante un persona ku a haña problema den laman na Sorobon i a guli awa. Na yegada di polis, presentenan a logra saka e víktima i tresé na kantu en espera di ambulans. Mientras polis tabata na e sitio, por a komprondé ku tabatin un di dos víktima, un menor di edat, ku tambe a haña problema den laman i a guli awa. Un testigu a deklará na polis ku ámbos persona tabata riba un kayak i a bòltu den laman. Ambulans a transportá ámbos víktima pa hòspital pa kòntròl i tratamentu médiko.
Kòntròl di velosidat
Djabièrnè 10 di yüli a tene un kòntròl di tráfiko dirigí riba velosidat. E kòntròl a tuma lugá riba Kaminda Tras di Montaña. Ku un 'lasergun' a midi velosidat di vários vehíkulo aserkando. Durante e kòntròl a duna sinku(5) shofùr but pa surpasá e velosidat máksimo pèrmití.
KPCN lo sigui tene kòntròlnan di velosidat na vários sitio riba e isla i ta atvertí outomobilistanan pa paga tinu riba nan velosidat. Den ‘bebouwde kom’ semper e velosidat máksimo ta 40 km/ora i pafó di esaki e ta 60 km/ora.
Ladronisia di outo
Djabièrnè 10 di yüli a drenta keho di ladronisia di un vehíkulo ku tabata stashoná na Kaya Mandolin. Ta trata di un outo koló ‘rose gold’ di e marka Toyota, tipo Vitz, ku plachi di number B-6193. Ta investigando e kaso.
