Detenshonnan pa manehá bou di influensia di alkohòl
Den e dianan ku a pasa, polis a detené dos(2) shofùr pa manehá bou di influensia di alkohòl.
Djamars 14 di yüli, alrededor di 1.30 or di mardugá, a detené un hòmber di inisial J.M.F. di 28 aña di edat riba Kaminda Jato Bako. E sospechoso a dal ku su outo den un kurá. Konforme e maneho di ‘botsen is blazen’, a hasi tèst di supla kuné i a resultá ku el a konsumí mas alkohòl ku ta pèrmití pa lei. Ademas e sospechoso no tin reibeweis i no por a mustra dokumentunan di seguro. Pa e violashonnan aki, el a haña but.
Djaluna 13 di yüli, alrededor di 8.45 or di anochi, a detené un hòmber di inisial G.F.L.B. di 55 aña di edat riba Kaya Internashonal. E sospechoso tabata enbolbí den un aksidente ku solamente daño material entre dos vehíkulo. Konforme e maneho di ‘botsen is blazen’, a hasi tèst di supla i a resultá ku e sospechoso a konsumí mas alkohòl ku ta pèrmití pa lei. El a haña prohibishon di manehá pa 3 ora.
A transportá ámbos sospechoso pa warda di polis pa kontinuá ku e trámitenan korespondiente. Aki nan lo haña un prosèsferbal tambe.
KPCN ta hasi yamada na doño di outo bandoná
Pa basta tempu tin un outo stashoná riba kaminda públiko. Ta trata di un outo koló shinishi kla, di marka Hyundai, modèl i10 sin plachi di number. E vehíkulo ta stashoná na e krusada T ku ta konektá Kaya Noorwega i Kaya Inglatera na Playa Pariba i ta forma un situashon peligroso na e krusada.
Un súplika na doño di e vehíkulo pa kita e outo dentro di 7 dia. Un siman despues di e publikashon, lo laga kita e outo riba kosto di e doño. Pa mas informashon por tuma kontakto ku e polis di bario Jorge Wanga na number +599 795-2566.
