Detenshonnan pa manehá bou di influensia di alkohòl
Den e dianan ku a pasa, polis a detené dos(2) shofùr pa manehá bou di influensia di alkohòl.
Djaweps 16 di yüli, alrededor di 11.15 or di anochi, a detené un hòmber di inisial G.F.S. di 60 aña di edat riba Kaya C.E.B. Hellmund. Un patruya a para vehíkulo di e sospechoso despues ku a tuma nota ku e tabata kore zeilu riba kaminda i tabata mustra komportashon sospechoso di manehá. Durante e kòntròl, a hasi tèst di supla kuné pero e shofùr a supla tres biaha sin ku esaki a duna un resultado. A bai kuné warda di polis i a hasi un análisis di rosea kuné. A resultá ku e sospechoso a konsumí mas alkohòl ku ta pèrmití pa lei. Ademas e sospechoso no por a mustra un reibeweis i tampoko dokumentunan di seguro. A konfiská e vehíkulo di e sospechoso pa motibu ku diferente biaha polis a par’é i e no por a mustra un reibeweis ni seguro. Pa e violashonnan aki, el a haña but.
Djaweps 16 di yüli, alrededor di 3.15 or di mardugá, a detené un hòmber di inisial M.Y.C. di 28 aña di edat riba Kaya Rex. E sospechoso tabata manehá un skuter i durante un kòntròl riba Kaya Grandi, a neglishá òrdu di polis pa para. E agentenan a bai su tras i a logra par’é. Durante kòntròl, e sospechoso tabata mustra diferente karakterístika di un persona ku ta bou di influensia di alkohòl. A hasi un tèst di supla kuné i a resultá ku e sospechoso a konsumí mas alkohòl ku ta pèrmití pa lei. Despues di investigashon mas aleu, a resultá ku e sospechoso tabata manehá e vehíkulo mientras su reibeweis ta konfiská. Pa e motibu aki a konfiská e skuter di e sospechoso tambe.
A transportá ámbos sospechoso pa warda di polis pa kontinuá ku e trámitenan korespondiente. Aki nan lo haña un prosèsferbal tambe.
Kòntròl planiá di tráfiko
Den oranan di atardi di djaweps 16 di yüli, polis a tene kòntròl di tráfiko riba Kaya Internashonal. Durante e kòntròl a para i kontrolá seis(6) vehíkulo, di kua tres outo i tres skuter. A duna un but pa manehá sin hèlm bistí.
Kòntròlnan di tráfiko ta kontinuá!
Detenshon pa violashon di Lei di Opio
En konekshon ku un investigashon andando, djaweps 16 di yüli alrededor di 9.30 or di mainta, polis a detené un hòmber di inisial P.M.S. di 24 aña di edat riba Kaya Caribe pa violashon di Lei di Opio BES. Investigashon den e kaso ta kontinuá.
Detenshon pa maltrato i menasa
Djárason 15 di yüli, alrededor di 9.40 or di anochi, a detené un hòmber di inisial A.R.B. di 59 aña di edat na Kaya Mohicano pa maltrato i menasa. E sospechoso a maltratá un otro hòmber i menas’é. Investigashon den e kaso ta kontinuá.
Ladronisia for di gòlfkar
Djárason 15 di yüli a drenta keho di ladronisia for di un gòlfkar stashoná na kosta sùit. Mientras e okupantenan a baha i bai na kosta, deskonosínan a bai ku diferente tas. Den e tasnan tabatin entre otro karchinan, telefòn, Ipad, Apple Watch, sèn kèsh, artíkulonan di landa i personal. Ta investigando e kaso.