Detenshon pa maltrato
Djaluna 20 di yüli, alrededor di 7.35 or di mainta, a detené un hòmber di inisial G.M.A.E. di 27 aña di edat na Kaya Mercedes pa maltrato. E sospechoso a maltrata un otro hòmber durante un bringamentu. Investigashon den e kaso ta kontinuá.
Atrako armá
Djaluna 20 di yüli, alrededor di 12.50 or di mardugá, ‘meldkamer’ sentral a risibí notifikashon tokante un atrako armá na un bar situá na Bulevar Gobernador N. Debrot. Tres atrakadó, bistí kompletamente na pretu ku kara tapá, a drenta e establesimentu i menasá e trahadónan ku arma di kandela, mara nan i tapa nan boka. Tambe nan a maltratá un di e trahadónan. E sospechosonan a logra bai ku sèn kèsh, merkansia i dokumentunan personal.
For di investigashon preliminar a resultá ku e sospechosonan a drenta e bar for di alrededor di 11 or di anochi di djadumingu 19 di yüli, i alrededor di 12.45 or di mardugá di djaluna 20 di yüli a bandoná e sitio den direkshon di Kaya Dialma.
KPCN ta pidi un i tur ku por a mira, tende òf sa algu tokante e atrako armá aki pa yama 715-8000 òf e liña di tep anónimo 9310.
Investigashon den e kaso ta andando.
Vandalismo i destrukshon riba Kaya Internashonal
Durante fin di siman, polis a risibí varios notifikashon tokante destrukshon riba Kaya Internashonal. E destrukshon a tuma lugá entre e rotònde na Kaya Industria i aeropuerto.
Na e sitio, polis a topa ku difrente persona ku nan vehíkulo a haña daño. Segun e víktimanan, hóbennan ku tabata skonde den mondi den e área menshoná a kometé e destrukshon. Nan tabata tira piedra riba vários vehíkulo pasando. Polis a tuma keho di e víktimanan i ta investigando e kasonan.
Kuerpo Polisial Hulanda Karibense (KPCN) ta pidi un i tur ku por a mira òf tende algu, òf ku tin grabashon di kámara den e área, pa tuma kontakto ku polis via 715-8000 òf via e liña di tep anónimo 9310.
Polis ta hasi un yamada urgente tambe na mayornan i kuidadónan pa papia ku nan yu(nan) tokante e riesgonan i konsekuensianan di tira piedra riba vehíkulo. E orarionan ku esaki ta sosodé no ta normal pa un menor di edat ta riba kaya sin supervishon di un adulto. Tambe ta pidi mayornan insistentemente pa puntra nan yunan si nan ta enbolbí den esaki i, si esei ta e kaso, pa mèldu na warda di polis. Mayornan, ta na altura di unda bo yu(nan) ta i papia ku nan tokante nan komportashon.
Detenshon pa maltrato i destrukshon
Djadumingu 19 di yüli, alrededor di 10.15 or di anochi, a detené un hòmber di inisial J.I.A. di 48 aña di edat na Kaminda Gurubu pa maltrato i destrukshon. E sospechoso a maltrata dama i destruí un propiedat. Investigashon den e kaso ta kontinuá.
Detenshon pa destrukshon
Djadumingu 19 di yüli, alrededor di 2.40 or di mardugá, a detené un dama di inisial E.L.C.G. di 20 aña di edat riba tereno di un establesimentu di hóreka na Kaminda di Lac pa destrukshon. E sospechoso a destruí tayernan di un outo. Tambe a konfiská un arma blanku. Investigashon den e kaso ta kontinuá.
Skuter konfiská
Den oranan lat di anochi di djasabra 18 di yüli, un patruya a tuma nota di un skuter riba Kaya Korona i e shofùr no tabatin hèlm bistí. A para e shofùr pa kòntròl na altura di Kaya Karpitan i e no por a mustra un reibeweis i tampoko dokumentunan di seguro di e skuter. A dun’é but pa maneha sin reibeweis, sin seguro i sin hèlm bistí. A konfiská e skuter pa motibu ku diferente biaha polis a para e shofùr i a dun’é but pa e violashonnan menshoná. A transportá e skuter pa warda di polis.
Ladronisia motornan di boto
Djasabra 18 di yüli a drenta keho di ladronisia di tres motor di boto for di un tereno na Kaya Electron. Ta trata di motornan di e marka Yamaha tipo Enduro, ku deskonosínan a bai kuné. Ta investigando e kaso.
Detenshon pa maltrato i destrukshon
Djabièrnè 17 di yüli, alrededor di 8.10 or di anochi, a detené un dama di inisial D.A.C. di 20 aña di edat riba Kaminda Djabou pa maltrato i destrukshon. E sospechoso tabata enbolbí den un bringamentu i a maltratá un dama. Tambe el a destruí un pasport. Tambe a konfiská un hacha ku e sospechoso a menasá kuné. Investigashon den e kaso ta kontinuá.
Dos detenshon i arma di kandela konfiská
Den oranan di tra’i mèrdia di djabièrnè 17 di yüli, ‘meldkamer’ sentral a risibí notifikashon tokante un persona ku probablemente arma di kandela den su poder. Polis mesora a inisiá un búskeda i a logra lokalisá e vehíkulo ku e sospechoso tabata move aden. A para e outo riba Kaya Industria i durante kòntròl a topa ku un arma di kandela. Mesora a pasa ofer pa detené e dos okupantenan di e vehíkulo pa violashon di Lei di Arma di Kandela BES.
Ta trata di dos hòmber di inisial A.M.D.G.N. di 60 aña di edat i S.V. di 37 aña di edat. A konfiská tantu e vehíkulo i otro artíkulonan ku ta relevante pa e investigashon. Algun ratu despues riba e mesun dia, en konekshon ku e kaso aki, a tene dos entrada hudisial. Na un kas na Playa i otro den bario Mexico. Aki tambe a konfiská varios artíkulo ku ta di importansia pa e investigashon.
Investigashon den e kaso ta kontinuá.
Ladronisia di karné
Djabièrnè 17 di yüli a drenta keho di ladronisia di diferente karné for di un kunuku den e área di
Kaminda Nieuw Amsterdam. Ta trata di total bintitres(23) karné deskonosínan a bai kuné.
E kaso ta bou di investigashon.