Detenshonnan pa manehá bou di influensia di alkohòl
Den e dianan ku a pasa, polis a detené dos(2) shofùr pa manehá bou di influensia di alkohòl.
Djárason 22 di yüli, alrededor di 5.40 or di mainta, a detené un hòmber di inisial M.A.W.L. di 34 aña di edat riba Kaya Lodewijk D. Gerharts. E sospechoso a dal ku su outo den un poste di lus na altura di Kaya Grandi. Konforme e maneho di ‘botsen is blazen’, a hasi tèst di supla kuné i a resultá ku el a konsumí mas alkohòl ku ta pèrmití pa lei. A konfiská su reibeweis.
Djamars 21 di yüli, alrededor di 4.50 or di mardugá, a detené un hòmber di inisial H.E.F. di 55 aña di edat riba Kaminda Tras di Montaña. E sospechoso a resultá den mondi ku su vehíkulo. Konforme e maneho di ‘botsen is blazen’, a hasi tèst di supla kuné i a resultá ku e sospechoso a konsumí mas alkohòl ku ta pèrmití pa lei. A konfiská su reibeweis.
A transportá ámbos sospechoso pa warda di polis pa kontinuá ku e trámitenan korespondiente. Aki nan lo haña un prosèsferbal tambe.
Detenshon pa menasa ku un arma i buracheria públiko
Djamars 21 di yüli, alrededor di 6 or di atardi, a detené un hòmber di inisial E.M.M.P. di 25 aña di edat riba Kaya Industria pa menasa, ta den posishon di un arma i pa buracheria públiko. E sospechoso a kore tras di un dama ku un machete i a menas’é. Ademas e tabata bou di influensia di alkohòl. A konfiská e machete. Investigashon den e kaso ta kontinuá.
Ladronisia di baiskel (fatbike)
Djaluna 20 di yüli a drenta keho di ladronisia di un baiskel eléktriko ‘fatbike’, koló blou kla di e marka Tamobyke, for di un kas na Kaya Emerita. E baiskel tabata den sala di e kas i deskonosínan a bai kuné. Ta investigando e kaso.