Kòntròl planiá di tráfiko ta kondusí na detenshon i entrada hudisial
Den oranan di anochi di djadumingu 9 di ougùstùs, a tene un kòntròl planiá di tráfiko na Kaya Neerlandia. Aki a para i kontrolá nuebe(9) vehíkulo i a duna dos but. E butnan tabata pa manehá sin faha di seguridat bistí i pa manehá sin reibeweis bálido.
Durante kòntròl di un vehíkulo, a sinti un holó fuerte paresido na supstansianan narkótiko. A base di esaki, a listra den e vehíkulo. Aki a topa ku sakunan ku supstansia probablemente narkótiko. A detené e shofùr, un hòmber di inisial D.G.I.B. di 22 aña di edat pa violashon di Lei di Opio BES. A konfiská e sakunan i e vehíkulo pa mas investigashon.
En konekshon ku e investigashon, seguidamente a tene entrada hudisial na un kas den bario Amboina. Aki a konfiská entre otro supstansianan probablemente narkótiko i munishon. Investigashon den e kaso ta kontinuá.
A konfiská vehíkulo despues di molèster
Den oranan di anochi di djadumingu 9 di ougùstùs, a drenta notifikashon tokante un outo ku tabata okashoná molèster di zonido fuerte den Kaya Grandi i bisendario. E zonido fuerte tabata sali for di e mòfler di e vehíkulo. Esaki tabata kousa molèster pa diferente persona den e área i pa negoshinan. Despues di un búskeda den e área, un patruya a topa ku e vehíkulo ku tabata kuadra ku e deskripshon duná i ku na e momentu ei tabata den pleno akshon. A base di esaki a para e shofùr i a konfiská e vehíkulo. Ademas e shofùr a haña un but.
Ladronisia di baiskel eléktriko
Djadumingu 9 di ougùstùs a drenta keho di ladronisia di un baiskel eléktriko, koló pretu di e marka Tamobyke, modèl V20 PRO. E baiskel tabata stashoná den bisendario di un establesimentu di hóreka na altura di parke Wilhelmina na momentu ku deskonosínan a bai kuné. Ta investigando e kaso.
A hòrta pikòp durante ladronisia den kas
Djadumingu 9 di ougùstùs a drenta keho di ladronisia for di un kas situá na Kaya Beethoven. Deskonosínan a haña akseso na e kas i a bai ku entre otro sèn kèsh, prenda, oloshi i un pikòp (un kabina) koló shinishi skur di e marka FIAT, modèl FULLBACK, ku plachi di number V-4920. Ta investigando e kaso.
Aksidente entre outo i quad
Djasabra 8 di ougùstùs, alrededor di 11.50 or di anochi, ‘meldkamer’ sentral a risibí notifikashon tokante un aksidente frontal entre un outo i un ‘quad/raptor’ na altura di Kaya Lodewijk D. Gerharts i Kaya General Carlos M. Piar. Ambulans a transportá ámbos persona ku tabata riba e quad ku urgensia pa hòspital pa tratamentu médiko. Despues, ambulans a transportá shofùr di e outo tambe pa hòspital pa tratamentu médiko.
For di investigashon preliminar ku a hasi na e sitio a resultá ku e quad tabata direkshon di rotònde Sùrnan di Roosendaal i a pasa un vehíkulo su dilanti ku velosidat haltu, nèt na momentu ku un outo for di direkshon kontrali, a lora pa drenta Kaya General Carlos M. Piar. Ambos vehíkulo tabatin daño konsiderabel. Despues di e impakto, e outo a dal den un palu di lus. Konforme e maneho di ‘botsen is blazen’ a hasi tèst di supla ku shofùr di outo i no tabatin indikashon tokante uso di alkohòl. Pa motibu di prioridat médiko no por a hasi tèst di supla ku shofùr di e quad.
Persekushon ta terminá ku detenshon
Den oranan di mardugá di djasabra 8 di ougùstùs, alrededor di 1.40 or, un patruya a mira un outo riba Kaya Caroni. Na momentu ku e shofùr a mira e vehíkulo polisial, el a hisa su velosidat. Pa e motibu aki polis a bai tras di e outo i a aktivá e lusnan óptiko(zwaailicht) i sirena pa para e vehíkulo pa un kòntròl. E shofùr a neglishá e señal pa para i a sigui kore ku velosidat haltu. A dun’é na diferente okashon señal pa para pero e shofùr no a duna oido na e òrdu di polis. Esaki a kondusí na un persekushon den diferente kaya.
Finalmente un otro patruya a logra blòkia e outo riba Kaya Prinsès Marie. Pa e motibu aki e vehíkulo polisial i un outo stashoná kantu di kaya a haña daño material. Na e momentu ei, e shofùr no tabata ke habri portanan di e outo. Pa e motibu aki e agentenan a hañanan obligá pa kibra bentananan di e outo pa por detené e shofùr. Ta trata di un mucha hòmber di inisial A.J.C. di 16 aña di edat. A detené pa no duna oido na òrdu di polis. Debí na e aksidente, konforme e maneho di ‘botsen is blazen’ a hasi tèst di supla ku e sospechoso i e agente polisial. No tabatin indikashon tokante uso di alkohòl. A konfiská outo di e sospechoso pa mas investigashon.
Detenshonnan pa manehá bou di influensia di alkohòl
Den e dianan ku a pasa, polis a detené dos(2) shofùr pa manehá bou di influensia di alkohòl.
Djabièrnè 7 di ougùstùs, alrededor di 3.10 or di mardugá, a detené un hòmber di inisial S.J.I.A. di 46 aña di edat riba Kaya Internashonal. Un patruya a para e sospechoso despues ku a mir’é manehá ku velosidat haltu i e tabata kore zeilu riba kaminda. E no por a mustra un reibeweis i a haña but pa esaki. Debí na su komportashon di manehá, a hasi un tèst di supla kuné i a resultá ku el a konsumí mas alkohòl ku ta pèrmití pa lei. El a haña prohibishon di manehá pa 6 ora i un prosèsferbal.
Djabièrnè 7 di ougùstùs, alrededor di 2.25 or di mardugá, a detené un hòmber di inisial N.A.M.V. di 36 aña di edat riba Kaya Industria. Un patruya a para e sospechoso pa kòntròl despues ku a tuma nota di un vehíkulo ku su lusnan di patras i lusnan di brek no tabata funshoná. Durante kòntròl e sospechoso tabata mustra diferente karakterístika di un persona ku ta bou di influensia di alkohòl. Ademas el a duna di konosé ku e no tin reibeweis. E sospechoso despues di vários intento, a nenga di koperá pa hasi e tèst di supla i análisis di rosea di e forma korekto. Pa esaki e lo haña un prosèsferbal.
A transportá e sospechosonan pa warda di polis pa kontinuá ku e trámitenan korespondiente.
Detenshon en konekshon ku kaso di hinkamentu
En konekshon ku e investigashon tokante e kaso di hinkamentu ku a tuma lugá den oranan di mardugá di djadumingu 2 di ougùstùs na altura di un bar na Kaya Korona, di kua un persona a resultá heridá, Koninklijke Marechaussee(KMar) a hasi detenshon di un sospechoso na aeropuerto di Boneiru riba djaweps 6 di ougùstùs. Ta trata di un hòmber di inisial A.M.A.F.F. di 32 aña di edat. A entregá e sosechoso na reshèrshi di KPCN ku lo kontinuá ku e investigashon.
Aksidente entre outo i fatbike
Djárason 5 di ougùstùs, alrededor di 9.50 or di anochi, ‘meldkamer’ sentral a risibí notifikashon tokante un aksidente na altura di e krusada di Kaya Kanari, Kaya Pos di Amor i Kaya Flamingo. Na e sitio a resultá ku un outo a alkansá un persona riba un baiskel eléktriko. Despues di e choke, e outo a bandoná e sitio. Ambulans a transportá e siklista pa hòspital pa tratamentu médiko. Kòrtiku despues, e shofùr di e outo a mèldu na warda di polis. A resultá ku e no tin reibeweis i a haña but pa esaki.
Ladronisia for di gòlfkar
Djárason 5 di ougùstùs a drenta keho di ladronisia for di un gòlfkar stashoná na 'Pink Beach', situá na E.E.G. Bulevar. Deskonosínan a bai ku dos tas di lomba ku entre otro pòtmòni ku karchinan i sèn kèsh, telefòn di marka Iphone, paña i prendanan. Esaki na momentu ku e okupantenan no tabatin bista riba e vehíkulo. Ta investigando e kaso.