Violashon di orario di sera
Den oranan di mardugá di djaluna 17 di ougùstùs, alrededor di 3.20 or, polis a sera un establesimentu di hóreka na Kaya Aguila. Durante kòntròl, tabatin un grupo di mas o ménos 7 persona den e lokalidat. Ademas tabata bende bebida ku kliente via un bentana. Debí na violashon di e orario di sera pèrmití, lo traha un prosèsferbal pa violashon di Lei di Bebida i Hóreka BES (de Drank- en Horecawet BES).
Detenshon pa menasa
Djadumingu 16 di ougùstùs, alrededor di 4 or di atardi, a detené un hòmber di inisial E.M.C. di 49 aña di edat na Kaya Zambezi pa menasa i violashon di Lei di Arma BES. Detenshon di e sospechoso a tuma lugá despues ku a drenta notifikashon tokante molèster di muzik na e kaya menshoná. Despues ku polis a papia ku e sospechoso, kende tabata kousa molèster, el a menasá su bisiña ku un machete. A detené i hib’é warda di polis. Tambe a konfiská un machete.
Detenshonnan pa manehá bou di influensia di alkohòl
Durante e fin di siman ku a pasa, polis a detené dos(2) shofùr pa manehá bou di influensia di alkohòl.
Djadumingu 16 di ougùstùs, alrededor di 3.10 or di mardugá, a detené un hòmber di inisial Q.J.F. di 40 aña di edat riba Kaya Lodewijk D. Gerharts. Un patruya a para e sospechoso pa kòntròl despues ku a mir’é manehá den direkshon prohibí. Durante kòntròl, e shofùr tabata mustra karakterístikanan di un persona ku ta bou di influensia di alkohòl i a hasi un tèst di supla kuné. A resultá ku tabatin indikashon ku e sospechoso a konsumí mas alkohòl ku ta pèrmití pa lei. Na warda di polis a hasi un análisis di rosea kuné i el a haña prohibishon di manehá pa 1 ora.
Djasabra 15 di ougùstùs, alrededor di 7 or di anochi, a detené e hòmber di inisial C.F.M. di 43 aña di edat riba Kaya Nikiboko Sùit. E sospechoso tabata enbolbí den un aksidente entre dos vehíkulo, ku solamente daño material. Konforme e maneho di ‘botsen is blazen’, a hasi un tèst di supla ku ámbos shofùr. Aki tabatin indikashon ku e sospechoso a konsumí mas alkohòl ku ta pèrmití pa lei. A hib’é warda di polis pa un análisis di rosea i a konfiská su reibeweis. E otro shofùr a haña but pa manehá ku un reibeweis ku no ta bálido.
Ademas a traha un prosèsferbal pa tur sospechoso enbolbí.
A topa vehíkulo prosedente di ladronisia kompletamente kimá
Djasabra 15 di ougùstùs, alrededor di 11.30 or di mainta, ‘meldkamer’ sentral a risibí notifikashon ku a topa ku un vehíkulo den e área di Santa Clara. E vehíkulo tabata kompletamente kimá. Despues di investigashon mas aleu a resultá ku ta trata di un pikòp di e marka FIAT, ku deskonosínan a bai kuné resientemente durante ladronisia na un kas na Kaya Beethoven. Ta investigando e kaso.
Kòntròl planiá di tráfiko
Den oranan di mainta di djasabra 15 di ougùstùs, a tene un kòntròl di tráfiko riba Kaya Libertador Simon Bolivar. Durante e kòntròl aki a para i kontrolá alrededor di 20 vehíkulo i a duna nuebe(9) but.
E butnan tabata pa e siguiente violashonnan:
-
4x pa manehá sin faha di seguridat bistí;
-
4x pa manehá sin reibeweis bálido;
-
1x pa manehá sin plachi di number pegá dilanti na e vehikulo.
Kòntròlnan di tráfiko ta kontinuá!
Kiebro den negoshi
Djabièrnè 14 di ougùstùs a drenta keho di kiebro den un negoshi situá na Kaya Industria. Den oranan di mardugá, deskonosínan a haña akseso na e edifisio i a bai ku entre otro sèn kèsh. Ta investigando e kaso.