Detenshonnan pa manehá bou di influensia di alkohòl
Durante e dianan ku a pasa, polis a detené sinku(5) shofùr pa manehá bou di influensia di alkohòl.
Djárason 26 di ougùstùs, alrededor di 3.35 or di mardugá, a detené un hòmber di inisial K.J.W.G. di 24 aña di edat na Kaya Grandi. Un patruya a para e sospechoso pa kòntròl despues ku polis na diferente okashon e anochi, a top’é i a dun’ é atvertensia pa no manehá outo, pa motibu ku e tabata mustra karakterístikanan di un persona ku ta bou di influensia di alkohòl. Na e okashonnan promé, polis a mir’é tras di stür pero e outo tabata stashoná. Pues na e momentunan ei, no a mir’ é ta manehá. Mas lat e anochi, a bolbe topa e outo i a biaha aki a gara e sospechoso ta stür. A hasi un tèst di supla kuné i a resultá ku tabatin indikashon ku e sospechoso a konsumí mas alkohòl ku ta pèrmití pa lei. Na warda di polis a hasi un análisis di rosea kuné i a konfiská su reibeweis.
Djárason 26 di ougùstùs, alrededor di 1.50 or di mardugá, a detené un dama di inisial J.H.M. di 18 aña di edat riba Kaya J.N.E. Craane. Un patruya a para e sospechoso pa kòntròl rutinario. Durante kòntròl, e tabata mustra karakterístikanan di un persona ku ta bou di influensia di alkohòl i a hasi un tèst di supla kuné. A resultá ku tabatin indikashon ku el a konsumí mas alkohòl ku ta pèrmití pa lei. A bai kuné warda di polis pa un análisis di rosea i el a haña prohibishon di manehá pa 5 ora.
Djamars 25 di ougùstùs, alrededor di 9.55 or di anochi, a detené un dama di inisial S.S.N.G. di 40 aña di edat na Kaya Grandi. E sospechoso a bèk i dal ku su outo den un otro outo stashoná. Konforme e maneho di ‘botsen is blazen’, a hasi un tèst di supla kuné. Aki tabatin indikashon ku e sospechoso a konsumí mas alkohòl ku ta pèrmití pa lei. A hib’é warda di polis pa un análisis di rosea. A konfiská su reibeweis.
Djaluna 24 di ougùstùs, alrededor di 11.35 or di anochi, a detené un hòmber di inisial J.A.M.S. di 45 aña di edat na Kaya Neerlandia. E sospechoso a kore kai ku su skuter riba e kaya menshoná. Personal di ambulans a dun’é tratamentu médiko na e sitio mes. Konforme e maneho di ‘botsen is blazen’, a intentá pa hasi un tèst di supla kuné pero e no tabata koperá pa supla korektamente. A bai warda di polis kuné pa un análisis di rosea. Despues di mas investigashon, e sospechoso no por a mustra un reibeweis i tampoko dokumentunan di seguro. Ademas e skuter no tabatin plachi di number. Pa esakinan e lo haña but.
Djaluna 24 di ougùstùs, alrededor di 6.50 or di anochi, a detené un hòmber di inisial E.B. di 33 aña di edat riba Kaya IR. Randolph Statius van Eps. E sospechoso tabata enbolbí den un aksidente i a dal ku su skuter den un outo na momentu ku esaki tabata lora pa subi e kaya menshoná. Konforme e maneho di ‘botsen is blazen’, a hasi un tèst di supla ku ámbos shofùr. Aki tabatin indikashon ku e sospechoso a konsumí mas alkohòl ku ta pèrmití pa lei. A hib’é warda di polis pa un análisis di rosea i el a haña prohibishon di manehá pa 3 ora.
Ademas a traha un prosèsferbal pa tur sospechoso enbolbí.
Kiebro na akomodashon turístiko
Djamars 25 di ougùstùs a drenta keho di kiebro den un akomodashon turístiko situá na Kaya Internashonal. Deskonosínan a haña akseso na e área di resepshon i a bai ku entre otro sèn kèsh. Durante búskeda di polis den e área, a topa ku un outo sospechoso den skuridat. A konfiská esaki pa mas investigashon.