Aksidente entre outo i skuter
Djaluna 31 di ougùstùs, alrededor di 8.50 or di mainta, ‘meldkamer’ sentral a risibí notifikashon tokante un aksidente entre un minivan i un skuter riba E.E.G. Bulevar. Na e sitio a resultá ku e skuter a dal den e minivan na momentu ku esaki a bai lora. Shofùr di e skuter a resultá heridá i ambulans a transport’é pa hòspital pa tratamentu médiko. Dokumentunan di ámbos shofùr tabata na òrdu.
Djadumingu 30 di ougùstùs, alrededor di 1.25 or di mèrdia, ‘meldkamer’ sentral a risibí notifikashon tokante un aksidente ku herido na altura di e krusada di Kaya Kitara i Kaya Viol. Shofùr di un skuter no a duna preferensia i a dal den un pikòp na e krusada menshoná. Ambulans a transportá shofùr di e skuter pa hòspital pa tratamentu médiko. Konforme e maneho di ‘botsen is blazen’, a hasi tèst di supla ku ámbos shofùr i no tabatin indikashon tokante konsumo di alkohòl. Dokumentunan di esnan enbolbí tabata na òrdu.
A konfiská vários hùls
Djadumingu 30 di ougùstùs, alrededor di 10.45 or di anochi, ‘meldkamer’ sentral a risibí notifikashon tokante lòsmentu di bala na altura di Kaya Dr. Jose G. Hernandez. Deskonosínan a pasa i a lòs bala den e área. Despues di investigashon mas aleu, polis a topa ku vários hùls riba Kaya Filomena. A konfiská e hùlsnan pa mas investigashon. No tabatin herido.
KPCN ta pidi tur persona ku a mira, tende òf tin informashon tokante e kasonan aki pa tuma kontakto ku polis na 715 8000 òf via di e liña di tep anónimo 9310.
Aksidente entre outo i ‘fatbike’
Djadumingu 30 di ougùstùs, alrededor di 2.40 or di atardi, ‘meldkamer’ sentral a risibí notifikashon tokante un aksidente entre un outo i un ‘fatbike’ riba Kaya Sonmontuno. Na e sitio a resultá ku e baiskel a dal den e outo. Personal di ambulans a duna tratamentu médiko na shofùr di e fatbike, un menor di edat, i no mester a transport’é pa hòspital. Konforme e maneho di ‘botsen is blazen’, a hasi tèst di supla ku shofùr di e outo i no tabatin indikashon tokante uso di alkohòl. Shofùr di e outo a haña but pa manehá sin reibeweis.
A topa ku pikòp hòrtá den mondi
Den oranan di mèrdia di djadumingu 30 di ougùstùs a drenta keho di ladronisia di un pikòp koló shinishi di e marka Toyota, tipo Hilux, ku plachi di number V-8424. E vehíkulo tabata stashoná na un kompleho di apartamentu riba Bulevar Gobernador N. Debrot na momentu ku deskonosínan a bai kuné. Den oranan trempan di anochi di e mesun dia, alrededor di 6.30 or, a enkontrá e pikòp den mondi den besindario di Seru Angola. A konfiská e vehíkulo pa mas investigashon.
Outo ta dal den kurá di kas
Djadumingu 30 di ougùstùs, alrededor di 3.35 or di mardugá, ‘meldkamer’ sentral a risibí notifikashon tokante un aksidente riba Kaya Nikiboko Sùit. Un outo a dal den kurá di un kas. Na yegada di polis, a topa ku un outo ku daño konsiderabel i e shofùr tabata heridá. Ademas e tabata mustra diferente karakterístika di un persona ku ta bou di influensia di alkohòl. A purba hasi un tèst di supla kuné pero sin resultado. Ambulans a transportá e víktima pa hòspital pa tratamentu médiko.
Detenshonnan pa manehá bou di influensia di alkohòl
Durante e fin di siman ku a pasa, polis a detené dos(2) shofùr pa manehá bou di influensia di alkohòl.
Djasabra 29 di ougùstùs, alrededor di 12.30 or di mardugá, a detené un dama di inisial M.B.I. di 36 aña di edat riba Kaya Amsterdam. E sospechoso tabata enbolbí den un aksidente frontal entre dos outo na altura di Kaya Caribe. Konforme e maneho di ‘botsen is blazen’, a hasi un tèst di supla ku ámbos shofùr. Aki tabatin indikashon ku e sospechoso a konsumí mas alkohòl ku ta pèrmití pa lei. A hib’é warda di polis pa un análisis di rosea. El a haña prohibishon di manehá pa 3 ora.
Djasabra 29 di ougùstùs, alrededor di 2.30 or di mardugá, a detené un hòmber di inisial M.J.C. di 45 aña di edat riba Kaya Barakuda. Un patruya a para e sospechoso pa kòntròl despues ku a konstatá ku e tabata kore zeilu riba kaminda. Durante kòntròl, e shofùr tabata mustra karakterístikanan di un persona ku ta bou di influensia di alkohòl i a hasi un tèst di supla kuné. A resultá ku tabatin indikashon ku e sospechoso a konsumí mas alkohòl ku ta pèrmití pa lei. Na warda di polis a hasi un análisis di rosea kuné i a konfiská su reibeweis.
Ademas a traha un prosèsferbal pa ámbos sospechoso.
Bringamentu
Djabièrnè 28 di ougùstùs, alrededor di 9.40 or di anochi, ‘meldkamer’ sentral a risibí notifikashon tokante bringamentu na altura di un establesimentu di horeka riba Kaya Korona. Na yegada di polis, a resultá ku e sospechosonan a bandoná e sitio. For di investigashon a resultá ku un diskushon entre e víktima i dos hòmber a eskalá, despues di kua e dos hòmbernan aki a maltratá e víktima. Aki a dal'é ku un baranka di piedra. Personal di ambulans a duna e víktima tratamentu médiko i despues a transport’é pa hòspital. Ta investigando e kaso.
Outo a resultá den roi
Djabièrnè 28 di ougùstùs, alrededor di 7.30 or di anochi, ‘meldkamer’ sentral a risibí notifikashon tokante un vehíkulo ku a resultá den roi riba Kaya Gilberto F. Croes. Dos persona a resultá heridá. Na yegada di polis a resultá ku e shofùr a pèrdè kòntròl, despues di kua e outo a resultá den roi. Brantwer tambe tabata na e sitio i a ehekutá e trabounan nesesario. Despues ku brantwer a saká e víktimanan for di e vehíkulo, a entregá nan na personal di ambulans pa tratamentu médiko. Pa motibu ku tabatin indikashon tokante uso di alkohòl i konforme e maneho di ‘botsen is blazen’, a hasi un tèst di supla ku e shofùr. A resultá ku el a konsumí mas alkohòl ku ta pèrmití pa lei. Pa motibu di prioridat médiko no por a hiba e shofùr warda di polis pa un análisis di rosea.
A topa ku opheto serka alumnonan na skol
Djamars 25 di ougùstùs, alrededor di 12 or di mèrdia, polis a risibí notifikashon ku a topa un alumno ku un opheto skèrpi den su tas na un skol riba Kaya Frater Odulfinus. A resultá ku tabata trata di un kuchú di kushina. Dosentenan a konfiská e kuchú. Despues polis a tene un kòmbersashon severo ku e alumno.
Djabièrnè 28 di ougùstùs, alrededor di 8.20 or di mainta, polis a risibí notifikashon atrobe di e mesun skol. E biaha aki a topa ku un opheto similar na un arma di kandela serka un alumno. A konfiská e opheto i a tene un kòmbersashon severo ku e alumno aki tambe.