Persona pèrdí
Kuerpo Polisial Hulanda Karibense (KPCN) ta pidi búskeda di e hóben Pedro Courtar di 16 aña di edat.
Den oranan lat di anochi di djamars 1 di sèptèmber 2026, alrededor di 10.30 or, e hóben a bandoná un instituto na Hanchi Amboina i no a regresá. Te na e momentunan aki no a logra kontakto òf lokalisá Pedro.
E último biaha ku a mira e hóben, e tabata ful na pretu bistí i ku un tas pretu di e marka Nike riba su lomba.
Polis ta pidi un i tur ku por a mira òf ku por tin mas informashon tokante paradero di Pedro, pa tuma kontakto mesora ku polis na 911, 715-8000 òf via di e liña di tep anónimo 9310.
Detenshon pa enkubrimentu
Djárason 2 di sèptèmber, alrededor di 2.10 or di mardugá, a detené un hòmber di inisial C.L.B.S. di 28 aña di edat riba Kaya Nikiboko Nort pa enkubrimentu. Un patruya a para e sospechoso pa motibu ku a mir’é ta manehá un skuter sin hèlm bistí i sin plachi di number. Despues di investigashon mas aleu a resultá ku e skuter ta registrá komo hòrtá i ku 31 di ougùstùs 2026 a entregá keho di ladronisia. Pa e motibu aki a detené e sospechoso i a konfiská e skuter. Ademas e sospechoso a haña but pa manehá sin reibeweis, sin dokumentunan di seguro bálido, sin plachi di number i sin hèlm bistí.
Detenshon pa destrukshon
Djamars 1 di sèptèmber, alrededor di 11.25 or di anochi, a detené un hòmber di inisial R.G.C. di 26 aña di edat den Bario Mamparia Kutu pa destrukshon. E sospechoso a destruí bentana di un kas. Investigashon den e kaso ta kontinuá.
A topa ku persona ilegal
Den oranan di anochi di djamars 1 di sèptèmber, polis a para un pikòp ku dos okupante riba Kaya Wals pa kòntròl rutinario. Durante kòntròl, e shofùr no por a mustra un reibeweis ni dokumentunan di seguro i a haña but pa esaki. E okupante no por a identifiká su mes i despues di investigashon mas aleu a resultá ku e no tabatin dokumentunan bálido di estadia. A bai kuné warda di polis pa motibu ku e ta permanesé di forma ilegal riba nos isla. Despues a hib’é JICN pendiente deportashon pa su pais di orígen.
Ladronisia for di outo
Djamars 1 di sèptèmber a drenta keho di ladronisia for di un outo stashoná riba Kaya J.N.E. Craane. Deskonosínan a bai ku un tas ku un telefòn di marka Iphone i tambe sèn kèsh. Esaki na momentu ku e okupantenan no tabatin bista riba e vehíkulo. Ta investigando e kaso.
Ladronisia di baiskel eléktriko
Djaluna 31 di ougùstùs a drenta keho di ladronisia di un baiskel eléktriko, koló pretu di e marka Tamobyke, modèl V20. E baiskel tabata stashoná na un skol riba Kaya Korona na momentu ku deskonosínan a bai kuné. Ta investigando e kaso.
Detenshon den kaso di hinkamentu
En konekshon ku e investigashon tokante e kaso di hinkamentu ku a tuma lugá den oranan di mardugá di djadumingu 2 di ougùstùs na altura di un bar na Kaya Korona, di kua un persona a resultá heridá, rishèrshi a hasi detenshon di un di dos sospechoso den oranan di atardi di djárason 26 di ougùstùs. Ta trata di e víktima ku a resultá heridá den e kaso, un hòmber di inisial J.M.F.P. di 51 aña di edat. A detené na Kaya Korona pa maltrato i intento di maltrato severo. Investigashon den e kaso ta kontinuá.