Kòntròl di velosidat
Den oranan di anochi di djaweps 10 di sèptèmber a tene kòntròl di tráfiko dirigí riba velosidat di vehíkulonan. E kòntròl a tuma lugá riba Bulevar Gobernador N. Debrot. Ku un 'lasergun' a midi velosidat di 53 outo aserkando i a duna shete (7) but.
E butnan tabata pa siguiente violashonnan:
5x pa surpasá e velosidat máksimo permití di 40 km/ora;
1x pa manehá sin reibeweis:
1x pa manehá sin seguro bálido.
KPCN lo sigui tene kòntròlnan di velosidat na vários sitio riba e isla i ta atvertí outomobilistanan pa paga tinu riba nan velosidat. Den área urbanisá (bebouwde kom), 40 km pa ora ta e velosidat máksimo permití i pafó di bebouwde kom ta 60 km pa ora.
Aksidente entre dos outo
Djaweps 10 di sèptèmber, alrededor di 7.15 or di mainta, ‘meldkamer’ sentral a risibí notifikashon tokante un aksidente entre dos outo na e krusada ku ta konektá Kaya Sonmontuno i Kaya Mendelsson. Personal di ambulans a hasi chekeo médiko ku ámbos shofùr i tambe algun menor di edat ku tabata den e vehíkulonan enbolbí. A transportá un di e shofùrnan pa hòspital pa kòntròl médiko mas aleu. Konforme e maneho di ‘botsen is blazen’, a hasi un tèst di supla ku ámbos shofùr i no tabatin indikashon tokante uso di alkohòl.
Detenshon pa manehá bou di influensia di alkohòl
Djárason 9 di sèptèmber, alrededor di 3.35 or di atardi, a detené un hòmber di inisial S.E.A. di 60 aña di edat riba Kaminda Tras di Montaña pa manehá bou di influensia di alkohòl. E sospechoso tabata enbolbí den un aksidente entre dos outo. Konforme e maneho di ‘botsen is blazen’ a hasi test di supla ku ámbos shofùr enbolbí i a resultá ku e sospechoso a konsumí mas alkohòl ku ta pèrmití pa lei. A detené i hib’é warda di polis pa un análisis di rosea. E sospechoso a haña prohibishon di manehá pa 3 ora i tambe un proses vèrbal.
Aksidente entre pikòp i skuter
Djárason 9 di sèptèmber, alrededor di 1.15 or di mèrdia, ‘meldkamer’ sentral a risibí notifikashon tokante un aksidente ku herido entre un pikòp i un skuter riba Bulevar Gobernador N. Debrot. Na yegada di polis, a kondusí un investigashon na e sitio i a resultá ku e pikòp no a duna preferensia na e skuter. Shofùr di e skuter a resultá heridá i ambulans a transport’é pa hòspital pa tratamentu médiko. Konforme e maneho di ‘botsen is blazen’, a hasi tèst di supla ku shofùr di e pikòp i no tabatin indikashon tokante konsumo di alkohòl. Pa motibu di prioridat médiko no por a hasi tèst di supla ku shofùr di e skuter. Shofùr di e pikòp a haña but pa manehá sin seguro bálido.
