Kiebro den negoshi
Djaluna 14 di sèptèmber a drenta keho di kiebro den un negoshi situá na Bulevar Gobernador. N. Debrot. Deskonosínan a haña akseso na e negoshi i a bai ku un estuche ku sèn kèsh. Ta investigando e kaso.
Ladronisia di baiskel
Djadumingu 13 di sèptèmber a drenta keho di ladronisia di tres baiskel. E baiskelnan tabata stashoná dilanti, den kurá di un kas na Kaya Kapachi. Un di e baiskelnan tabata di marka Redline i e otronan su marka ta deskonosí. Despues di investigashon mas aleu, polis a topa ku dos di e tres baiskelnan na Kaya Shoshori. Ta investigando e kaso.
Detenshon pa enkubrimentu
Djadumingu 13 di sèptèmber, alrededor di 5.30 or di atardi, a detené un mucha hòmber di 17 aña di edat na Kaya Caribe pa enkubrimentu. Un patruya a mira e sospechoso ku un baiskel eléktriko (fatbike) i despues di mas investigashon a resultá ku ta trata di un baiskel probablemente prosedente di ladronisia. A konfiská e fatbike i a detené e sospechoso. Investigashon den e kaso ta kontinuá.
Detenshon pa menasa, maltrato i destrukshon
Djadumingu 13 di sèptèmber, alrededor di 9 or di mainta, a detené un hòmber di inisial M.R.I.M. di 30 aña di edat na Kaya Generoso pa menasa, maltrato i destrukshon. E sospechoso a destruí glas di un outo ku un piedra, maltratá un agente polisial durante su detenshon i pa menasá polis ku morto. Investigashon den e kaso ta kontinuá.
Detenshonnan pa manehá bou di influensia di alkohòl
Durante e fin di siman ku a pasa, polis a detené tres(3) shofùr pa manehá bou di influensia di alkohòl.
Djadumingu 13 di sèptèmber, alrededor di 2.25 or di mardugá, a detené un dama di inisial L.P.V.A. di 38 aña di edat na Kaya Nikiboko Sùit pa manehá bou di influensia di alkohòl. E sospechoso a baha kaminda ku su outo i keda pegá. Konforme e maneho di ‘botsen is blazen’, a hasi un tèst di supla kuné i tabatin indikashon ku e sospechoso a konsumí mas alkohòl ku ta pèrmití pa lei. A detené i a hib’é warda di polis pa un análisis di rosea. Ademas el a haña but pa manehá sin reibeweis i sin seguro bálido.
Djasabra 12 di sèptèmber, alrededor di 7.20 or di anochi, a detené un hòmber di inisial W.V.P. di 39 aña di edat na Kaya Karpitan. Detenshon di e sospechoso a tuma lugá despues ku a drenta notifikashon tokante un pikòp ku tabata manehá di forma inresponsabel. Despues di búskeda, a topa ku e vehíkulo riba Kaya Karpitan i a par’é. Despues di investigashon mas aleu a resultá ku e sospechoso a okashoná un aksidente riba Kaminda Djabou i a bandoná e sitio. Konforme e maneho di ‘botsen is blazen’, a hasi un tèst di supla kuné i tabatin indikashon ku e sospechoso a konsumí mas alkohòl ku ta pèrmití pa lei. A detené i a hib’é warda di polis pa un análisis di rosea. A konfiská su reibeweis i ademas el a haña but pa manehá sin seguro bálido i pa bandoná sitio di aksidente.
Djasabra 12 di sèptèmber, alrededor di 1.45 or di mardugá, a detené un hòmber di inisial V.D.J.V. di 45 aña di edat riba Kaya Nikiboko Sùit. E sospechoso a kai ku su bròmer na altura di e rotònde sùrnan di Roosendaal. Konforme e maneho di ‘botsen is blazen’, a intentá pa hasi un tèst di supla ku e sospechoso pero e no tabata ke koperá pa supla korektamente. A detené i a bai warda di polis kuné pa un análisis di rosea. Pa motibu ku na e momentu ei e no por a mustra un reibeweis, a dun’é òrdu pa entregá su reibeweis.
Ademas, tur sospechoso detené a haña prosèsferbal pa manehá bou di influensia di alkohòl.
Persekushon ta terminá ku detenshon
Den oranan lat di anochi di djasabra 12 di sèptèmber, alrededor di 11.30 or, un agente polisial a duna un pikòp señal pa para riba Kaya Prinsès Marie. Esaki pa motibu ku polis a mira e vehíkulo tabata skuer, a dal den un outo pa despues bandoná e sitio. E shofùr no a baha velosidat i a sigui kore den direkshon di e agente polisial. E agente polisial a hañ’é obligá pa kita for di riba kaminda pa evitá ku e vehíkulo ta alkans’é.
Pa e motibu aki a surgi un persekushon den outo i a aktivá e lusnan óptiko(zwaailicht) i sirena pa para e vehíkulo. E shofùr a hisa velosidat i no a duna oido na òrdu di polis pa para. E persekushon a terminá na Kaminda Lagun na momentu ku e vehíkulo a drenta un kurá di kas.
A detené e shofùr, un hòmber di inisial R.M.M.T. di 21 aña di edat pa intento di asesinato, pa no kumpli ku òrdu di polis i pa hinka tráfiko den peliger dor di komportashon di manehá. E shofùr tabata akompañá pa un ménor di edat. E sospechoso no por a mustra un reibeweis i a konfiská e pikòp. Dos agente polisial a entregá keho di intento di asesinato den e kaso aki.
Ladronisia den kas
Djasabra 12 di sèptèmber a drenta keho di ladronisia den un kas situá na Lagoen Hill. Deskonosínan a bai ku entre otro karchinan di banko i sèn kèsh. Ta investigando e kaso.
Detenshon pa insulto di ámtenar den funshon
Djasabra 12 di sèptèmber, alrededor di 3.10 or di mardugá, a detené un hòmber di inisial C.V.B. di 50 aña di edat na Bulevar Julio A. Abraham pa violashon di Lei di Identifikashon, pa resistí detenshon, pa no kumpli ku òrdu di polis i pa insulto di un ámtenar den funshon. Detenshon di e sospechoso a tuma lugá despues ku a drenta notifikashon ku e sospechoso tabata kousa molèster den un kasino na un akomodashon turístiko. Ademas el a menasá di kometé destrukshon den e edifisio. Na yegada di polis a purba papia kuné pero el a insultá un agente polisial. A detené pa di un ámtenar den funshon, el a resistí i no tabata ke sigui òrdu di polis. Ademas e no por a identifiká su mes. A transport’é pa warda di polis.
Kòntròl planiá di tráfiko
Den oranan di anochi di djabièrnè 11 di sèptèmber, a tene un kòntròl di tráfiko riba Kaya Nikiboko Nort. Durante e kòntròl aki a para i kontrolá alrededor di 17 vehíkulo i a duna tres but.
E butnan tabata pa e siguiente violashonnan:
-
2x pa manehá sin seguro bálido;
-
1x pa manehá sin reibeweis bálido.
Kòntròlnan di tráfiko ta kontinuá.