A konfiská ‘fatbike’
Den oranan di anochi di djamars 15 di sèptèmber, polis a konfiská un baiskel eléktriko ‘fatbike’ pa violashon di reglanan di tráfiko. Esaki despues ku a duna un hóben ménor di edat, señal pa para riba Kaya Libertador Simon Bolivar. E tabata manehá e baiskel riba asera, sin lus patras i a lanta para riba e asiento.
Durante kòntròl a konstatá ku entre otro e baiskel no tabata disponé di un kadena i por a manehá esaki solamente via e tròt di man ku ayudo di un bateria. Debí na lokenan ku a konstatá, por a konkluí ku abase di e Ordenansa di Tráfiko Bonaire 2019, e baiskel tabatin tur karakterístika pa konsider’é un bròmfits. Pa mester tin entre otro un reibeweis, hèlm, seguro i un plachi di number. E hóben no tabata kumpli ku esaki.
A konfiská e ‘fatbike’ i a hasi un kòntròl di velosidat riba un ‘rollerbank’ na warda di polis. A resultá ku e baiskel ta kore 25 km pa ora via e tròt di man ku ayudo di bateria. A pone mayor di e hóben na altura tokante konfiskashon di e baiskel.
Kiebro den kasnan di konteiner
Djamars 15 di sèptèmber a drenta keho di kiebro den dos kas di konteiner situá na Kaminda Essequibo. Deskonosínan a haña akseso na ámbos kas i a bai ku sèn kèsh, un telefòn koló pretu di e marka Samsung i un map ku algun dokumentu. Ta investigando e kaso.
A konfiská skuter
Djamars 15 di sèptèmber, alrededor di 3.10 or di atardi, polis a para dos mucha riba un skuter na Kaya Kabikuchi. Ambos mucha, respektivamente di 13 i 6 aña di edat, no tabatin hèlm bistí. A konfiská e skuter pa motibu ku e shofùr no tin reibeweis i e skuter no ta segurá. Ademas a pone mayornan di ámbos mucha na altura. A yama nan pa un kòmbersashon na warda di polis i pa papia tokante konsekuensia di e akto.
Ladronisia di baiskelnan eléktriko
Djamars 15 di sèptèmber a drenta keho di ladronisia di un baiskel eléktriko(fatbike) di e marka OVYI, koló pretu, modèl V8. E baiskel tabata stashoná pafó di un skol na Kaya Korona, na momentu ku deskonosínan a bai kuné.
Djaluna 14 di sèptèmber a drenta keho di ladronisia di un baiskel eléktriko (fatbike) koló pretu. E baiskel tabata stashoná riba tereno di un skol na Kaya Barakuda, na momentu ku deskonosínan a bai kuné. Huntu ku e baiskel, deskonosínan a bai ku un telefòn selular ku tabata den un tas pegá na e baiskel.
Ta investigando e kasonan.
Detenshon pa maltrato
Djaluna 14 di sèptèmber, alrededor di 10.55 or di anochi, a detené un hòmber di inisial G.A.H.M. di 33 aña di edat na Kaya Kasuela pa maltrato. Investigashon den e kaso ta kontinuá.
Aksidente entre dos outo
Djaluna 14 di sèptèmber, alrededor di 7.10 or di anochi, ‘meldkamer’ sentral a risibí notifikashon tokante un aksidente na altura di e krusada di Kaya Kanari, Kaya Pos di Amor i Kaya Flamingo. Na e sitio a resultá ku pa motibu di keda sin duna preferensia, dos outo a dal den otro. Ambulans a transportá un di e shofùrnan pa hòspital pa tratamentu médiko. Konforme e maneho di ‘botsen is blazen’, a hasi tèst di supla ku un di e shofùrnan i no tabatin indikashon tokante uso di alkohòl. Pa motibunan médiko, e otro shofùr no por a supla korektamente. Ambos shofùr a haña but pa manehá sin seguro bálido.
Kiebro den negoshi
Djaluna 14 di sèptèmber a drenta keho di kiebro i destrukshon den un negoshi situá na Bulevar Gobernador. N. Debrot. No ta konosí ainda kiko deskonosínan a bai kuné. Sí a konstatá ku a kousa basta destrukshon na e edifisio. Ta investigando e kaso.